Icalici Lyayakanikana—Ibipile Shani Imibele?

“UKUPALA ulupwa lukalamba kabili ulwatulumushiwa, ulwikala mu ŋanda ili apepi no kuwa iya kale iyo icibumba ca ku ntanshi cibongolweke mu kupumikisha, mwamoneka ukuba ukukansana mupepi fye na mu muputule uuli onse—mu kuba no kulisha kwa kaoma ba mwana Yesu balepaatila abalaalana aba bwamba bumo bwine abafwele amasuti yayemba aya silika ayafiita aba muli baKatolika ba ku England.”—The Sunday Times, London, April 11, 1993.

Ulu lupwa lwaba ni Church of England. Ukukansana kuli pa mulandu wa kusuminisha abanakashi ukuba bashimapepo. Ubulondoloshi bwamonekesha ubwa kukanaikatana kukalamba bulabomba mu kupalako kuli Kristendomu onse fye. Mu kuba ne fikolwe fya Orthodox Church na papa ukusenuka ukupingulapo kwa kusuminisha abanakashi ukuba bashimapepo, ica kufumamo ca cinkumbawile, e fyasondwelela lipoti imo, ca kuti “iciloto ca kwikatana cipya cipya na Kristendomu onse caba ukutali ukucila kale lyonse.”

Bushe Icalici Lyayakanikana Shani?

Nga fintu tubelenga pali Mateo 7:21, Yesu Kristu asosele ukuti abengi baali no kutunga ukukwata icitetekelo muli wene pamo nga Shikulu lelo nalyo line ukufilwa ‘ukucita icifwaya Wishi.’ Magazini etwa Maclean’s alandapo kuti: “Bakabelenga ba kwa Mateo abalefwaya ipusukilo kuti baelelwa pa lwa cimfulumfulu pa caba mu cine cine ukufwaya kwa kwa Lesa, lintu Abena Kristu, na macalici yabo, bapusana apakalamba nga nshi pali ici cipusho.” Ukukonka pa kufwailisha kwacitilwe pa kati ka bena Canada, yasondwelele ukuti kwalibako “ukupusana kushaikulila mu fisumino fya Bena Kristu ba mu Canada ne fibelesho—paliba ukupusana ukwingi pa kati ka filundwa fya kabungwe ka butotelo akali konse, na kuba, ukucila ukwaba pa kati ka tubungwe twa butotelo.”

Ukulingana no kufwailisha kwa iko, amaperesenti 91 aya baKatolika balasumina ukubomfya inshila sha kulaminamo bufyashi ishishili sha cifyalilwa nelyo fye cingati icalici lyabo lyalisenuka shene; amaperesenti 78 batontonkanya ukuti abanakashi balingile ukusuminishiwa ukuba bashimapepo; na maperesenti 41 balapokelela ukuponya amafumo “mu mibele imo.” Ukukanaumfwana mu kati na nkati ka tubungwe twa butotelo utwapusanapusana pa “fipusho fya butotelo ifingi,” e fyasosa Maclean’s, “kwebekesha ukuti amalekano yalebilulula apalundanina amacalici ayakalamba.”

Ifipimo fya Mbali Shibili

Ifipimo fya mbali shibili capamo ne fipimo fipinkana e ko fyaba pa mibele isuma. Bamo batunga ukwikatilila ku fishinte fya Baibolo, lelo bambi balasuusha fyene. Bushe ukusefya kwa “cupo” ukwa kuufya abalaalana ba bwamba bumo bwine abanakashi mu Metropolitan Church of Toronto, ku ca kumwenako, kwaliba mu kumfwana no kufwaya kwa kwa Lesa? Abaleakanako mu kumonekesha batontonkenye ifyo. “Tulefwaya ukusefya ukutemwa kwesu pa cintubwingi na pa menso ya kwa Lesa,” e fyo basosele.

Kalemba wa mikululo umo aipwishe umo calolele lintu “shikofu mukalamba uwa ciKatolika uyo bailishenyeko imiku ne miku, akuushishe bashimapepo bacenda abana kwi bumba lyapusanako ilya bakampenga.” Shimapepo Andrew Greeley atubululo kuti ukufuma pali bashimapepo 2,000 ukufika kuli 4,000 pambi bafwile balicenda ifinakabupalu fya mushinku unono 100,000, ilingi line mu kuba fye ne finono ukucitwa pa lwa cene.

Icalici lishaikatana liletako abantu bashaikatana. Mu fitungu fya Balkans, “Abena Kristu” bonse aba ku Serbia na ku Croat bayumfwa ukuti Kristu aliba na bo mu nkondo yabo iya “bulungi.” Abengi bafwala imisalaba mu bulwi, umo, cacitwa lipoti ukuti, “lyonse afubete umusalaba wakwe mu kanwa kakwe lintu ubulwi bwakosele.”

“Peba na Malekano Pali Imwe”

Ca cine, Baibolo ishiila imilandu imo kuli kampingu, lelo ici tacilingile kushako incende ku kupaatukana kwa musango yo. Umutumwa Paulo mu kumfwika alondolola ukuti: “Musose bonse akanwa kamo kene, peba na malekano pali imwe.”—1 Abena Korinti 1:10; Abena Efese 4:15, 16.

Ukulolesha kwa bufumacumi pa “buKristu” imyaka mupepi na 2,000 pa numa umutumwa Paulo alembele ayo mashiwi kwimya ifipusho fyakakala nga nshi. Mulandu nshi “Abena Kristu” babela abayakanikane fyo? Bushe Icalici lyayakanikana ilya musango yo kuti lyapusunsuka? Bushe kukatala akubako Kristendomu waikatana? Icipande cikonkelepo calalanguluka ifi fipusho.

[Icikope pe bula 3]

Ukuilishanya kwa bashimapepo ukwa kulwisha ukuponya amafumo

[Abatusuminishe]

Pa nkupo na apa pa muulu: Eleftherios/Sipa Press