Bushe Walipusuka?

JOHNNY aali fye ne myaka 10 lintu umwaume umo amwimike ilyo aali ku bulangisho no kumwipusha ati: “Mulumendo, bushe walipokelela Yesu Kristu ukuba Shikulu obe kabili Umupusushi?” Ico cipusho caumfwike iceni kuli Johnny, pantu ukutula fye na kale alitetekela Yesu. E co Johnny ayaswike ati, “Ee mukwai.” Uyu mwaume abilikishe ukuti bonse bomfwe ati: “Lesa apaale, na umbi apusuka aaba kuli Kristu!”

Bushe ukupusuka e fyo kwayanguke fyo fine? Bushe Johnny “alipuswike” ukufuma fye ilya ine nshita alandile yalya mashiwi, te mulandu na cintu aali no kucita ubumi bwakwe bonse ubwashala? Abantu bafumaluka abengi kuti bayasuka abati ee. Amatrakiti ya fya mapepo yamo yamo yalanda no kuti lemba ubushiku “wapuswike” pa kuti ukalebwibukisha.

Shimapepo umo alembele ukuti “pa kashita umo akwata icitetekelo fye muli Kristu . . . ninshi uyo capwa inshita ya ku ntanshi yaimikwa.” Atungile fyo Baibolo isosa ukuti ipusukilo lyashintilila pa “ncitilo ya citetekelo” imo fye, iya pa kashita kamo, “te pa kutwalilila ukuba uwa citetekelo.” Kalemba na umbi uwa fya mapepo alembele ukuti: “Uyu mulimo wapwishishiwa. Walipusuka kale kale . . . ‘Ubulwi bobe bwalipwa.’ ‘Amasambi yobe yalifuutwa.’” Lelo nangu fye bantu abo abashininwa pa lwa ici pano pena balemonapo ubwafya. Calimoneka ukuti abantu abengi abaebwa ukuti “balipusuka” tabekalila mu nshila Baibolo itila balingile ukwikalilamo. Umulandu upeelwa ilingi line wa kuti napamo “tabapokelele” Kristu mu cine cine.

Cinshi kanshi, cintu “ukupokelela” Yesu mu cituntulu cipilibula? Bushe ni ncitilo ya pa kashita kamo iya citetekelo, nelyo bushe ni nshila ya bumi iya kutwalilila? Bushe ukutetekela kwesu kulingile ukuba ukwakosa ica kuti kwatucincisha ukuti tulebomba? Bushe mu cituntulu kuti twapokelela ubunonshi bwe lambo lya kwa Kristu ukwabula icishingamo icili conse mu kumukonka?

Abantu abengi balafwaya amapaalo lelo tabafwaya icishingamo caba mu kukonka no kumfwila Yesu. Na kuba, ishiwi lya kuti “umfwila” tabafwaya na kulyumfwa. Lelo Yesu atile: ‘Isa unkonke.’ (Luka 18:18-23) Na kabili Baibolo ilondololo kuti: “Abashinakila mbila nsuma ya kwa Shikulwifwe Yesu . . . [bakamona] uboni bwa muyayaya.”—2 Abena Tesalonika 1:8, 9; Mateo 10:38; 16:24.

Paliba ifintu ifingi ifyo Baibolo ilanda ifyo fiimya ifipusho fyakakala pa lwa casambilishiwa pa lwa kupusuka. Nga ulefwaya ukwishiba bwino cintu Baibolo mu cine cine isosa pa lwa uyu mulandu, walasanga ifili mu mabula yakonkelepo ukuba ifya kulengo buseko. Kupukula Baibolo yobe, no kubelenga amalembo yabikilwemo ukumona fintu Yesu na batumwa bakwe basambilishe pa lwa uyu mulandu.