Bushe Yesu Apususha Shani?
Icasuko ca mu Baibolo
Yesu alipuswishe abantu aba cishinka ilyo apeele ubumi bwakwe ukuba icilubula. (Mateo 20:28) E mulandu wine Baibolo iitila Yesu ati “Umupusushi wa ba muli ici calo.” (1 Yohane 4:14) Na kabili itila: “Tamwaba ipusukilo mu muntu umbi iyo, pantu takwaba ishina limbi mwi samba lya muulu ilyapeelwa na Lesa mu bantu, umo tufwile ukupusukila.”—Imilimo 4:12.
Yesu “afwilile umuntu onse.” (AbaHebere 2:9; Yohane 3:16) Pa numa “Lesa alimwimishe ku bafwa,” kabili Yesu alibwelele ku muulu nge cibumbwa ca mupashi. (Imilimo 3:15) Ifi Yesu aba ku muulu “alapususha umupwilapo bonse abalepalama kuli Lesa muli ena, pantu lyonse aba uwa mweo ku kubapapaatilako.”—AbaHebere 7:25.
Mulandu nshi tukabila ukuti Yesu aletupapaatilako?
Bonse tuli babembu. (Abena Roma 3:23) Ulubembu lwalitutalusha kuli Lesa, kabili lulalenga tulefwa. (Abena Roma 6:23) Lelo Yesu alatupususha pantu ni “kaafwa” wa bantu abacetekela ilambo lyakwe ilya cilubula. (1 Yohane 2:1) Alabapapaatilako, alalomba Lesa ukuti alekutika ku mapepo yabo no kulababelela uluse pa membu shabo ukubomfya ilambo Yesu apeele ilyo afwile. (Mateo 1:21; Abena Roma 8:34) Lesa alakutika Yesu nga atupapaatilako pantu ifyo alomba filomfwana no bufwayo bwa kwa Lesa. Lesa atumine Yesu pano isonde “mu kuti aba mu calo bakapusukile muli ena.”—Yohane 3:17.
Bushe tulingile fye ukusumina muli Yesu epela pa kuti tukapusuke?
Awe. Nangu ca kuti tulingile ukusumina muli Yesu pa kuti tukapuske, kwaliba na fimbi ifyo tulingile ukucita. (Imilimo 16:30, 31) Baibolo itila: “filya fine umubili uwabula umupashi wafwa, e fyo ne citetekelo icabula imilimo cafwa.” (Yakobo 2:26) Pa kuti tukapusuke tulingile:
Ukusambila pali Yesu na pali Wishi, Yehova.—Yohane 17:3.
Ukuba ne citetekelo muli Yesu na Yehova.—Yohane 12:44; 14:1.
Ukulakonka ifyo batweba pa kuti tulelanga ukuti twalikwata icitetekelo. (Luka 6:46; 1 Yohane 2:17) Yesu asambilishe ukuti te bonse aba mwita ati “Shikulu” bakapusuka lelo ni abo fye ‘abacita ififwaya [Wishi] uwaba mu muulu e bakengilamo.’—Mateo 7:21.
Ukutwalilila ukuba ne citetekelo nangu twakwata amafya. Yesu alilandile ukwabula no kupita mu mbali ati: “Uwashipikisha ukufika na ku mpela, e ukapusuka.”—Mateo 24:13.