Ipusukilo—Cintu Lipilibula mu Cine Cine

‘BUSHE mwalipusuka?’ Ilingi line, abepusha icipusho ici bayumfwa ukuti balipusuka pa mulandu wa kuti ‘balipokelela Yesu nga Umupusushi wa pa lwabo.’ Bambi na bo bayumfwa ukuti kwaliba inshila shalekanalekana ishitungulula kwi pusukilo no kuti kulila fye ‘Yesu ali mu mutima wenu’ ninshi tacaba na mulandu fintu mwasuminamo nelyo ku calici mupepa.

Baibolo isose fyo yaba mifwaile ya kwa Lesa ukuti ‘abantu [ba misango, NW] yonse bakapusuke.’ (1 Timote 2:3, 4) Abali bonse abasumina ipusukilo, kuti bapusuka. Lelo bushe ukupusuka kupilibula nshi? Bushe cine cine cintu icingacitika kuli imwe ukwabula mwe bene ukubombelapo nelyo ukubombelapo fye panono?

Ishiwi “ipusukilo” lipilibula “ukulubulwa ukufuma ku busanso nelyo ku bonaushi.” E ico, ipusukilo line line lisanshamo ifingi ukucila pa cibote ca mutima. Lipilibula ukupusushiwa ku bonaushi bwa iyi micitile ya fintu iyabipa iilipo na mu kupelako ku mfwa iine! Lelo kanshi ni bani Lesa akapususha? Pa kwasuka, lekeni tubebete cintu Yesu Kristu asambilishe pa lwa ici. Napamo mwalapapa ifyalafuma mu kubebeta kwesu.

Ipusukilo—Bushe Lisangwa mu Mipepele Yonse?

Pa kashita kamo, Yesu alilanshenyepo no mwanakashi umwina Samaria. Nangula tali umuYuda, alicetekele ukuti Mesia aali no kwisa “uwitwa Kristu.” (Yohane 4:25) Bushe ukusumina fye ico kwali ukwakumanina ukuti engapusuka? Iyo, pantu Yesu alyebele uyu mwanakashi mu kushipa ukuti: “Imwe mupepe co mushaishiba.” Yesu alishibe ukuti nga ca kuti uyu mwanakashi ali no kupusuka, alekabila ukwalula inshila ya mipepele yakwe. Na muli fyo Yesu alondolwele ukuti: “Lelo inshita ileisa, na nomba e ko ili, ilyo bakapepa bene bene bakapepela Tata mu Mupashi na mu cine; pantu na Tata afwaya aba musango uyu babe aba kumupepa.”—Yohane 4:22, 23.

Akashita na kambi Yesu asokolwele fintu amona ipusukilo cali ni lintu alelanda na baFarise, icakaniko ca mipepele yalumbuka iya baYuda. AbaFarise balipangile imipepele yabo no kutetekelo kuti yalisuminishiwa na Lesa. Lelo kutikeni ku mashiwi ya kwa Yesu ku baFarise: “Mwe ba bumbimunda, Esaya amusesemene bwino, ati, Aba bantu banshinshimuna pa tunwa twabo, lelo imitima yabo yataluka kuli ine: lelo kwa fye ukushinshimuna banshinshimuna, amasambilisho basambilisha mafunde ya bantu.”—Mateo 15:7-9.

Ni shani pa lwa mipepele iingi ilelo iitunga ukutetekela muli Kristu? Bushe Yesu kuti asuminisha yonse nge nshila shalungama isha kwisapusukilamo? Tatufwile ukutunganya fye ukulosha kuli ci, pantu Yesu asosele mu kumfwika ukuti: “Te onse uutila kuli ine, Shikulu, Shikulu, akengila mu bufumu bwa mu muulu iyo; kano uucite cifwaya Tata wa mu muulu. Abengi muli bulya bushiku bakatila kuli ine, Mwe Shikulu, mwe Shikulu, bushe tatwasesemene mwi shina lyenu? bushe tatwafumiishe ifiwa mwi shina lyenu? bushe tatwacitile ifya maka ifingi mwi shina lyenu? Kabili e lyo nkasosa kuli bene, nkatila, Nshamwishiba nakalya; fumeni apa, mwe bacita amampuulu.”—Mateo 7:21-23.

Ukwishiba Yesu mu Kulungika Kwalikatama pa Kuti Tupusuke

Aya mashiwi ya kwa Yesu yalikwata ubupilibulo ubulenga ukutontonkanya. Yalangisho kuti abantu abengi abaipeelesha balefilwa ‘ukucite cifwaya Lesa.’ Lyene, ni shani fintu umo enganonka ipusukilo lya cine? Timote wa Ntanshi 2:3, 4 (NW) asuko kuti: “[Lesa afwaya] ukuti abantu ba misango yonse bengapusuka no kufika ku kwishiba kwalungikwa ukwa cine.”—Linganyeniko Abena Kolose 1:9, 10.

Ukwishiba kwa musango yu kwalikatama pa kwisapusuka. Lintu kalinda wa cifungo Umwina Roma aipwishe umutumwa Paulo no mubiye, Sila, ukuti; “Bushe mfwile ukucita shani ukuti mpusuke?” baaswike ati: “Tetekela Shikulu Yesu Kristu, e lyo ukapusuka, iwe na ba mu ŋanda yobe.” (Imilimo 16:30, 31) Bushe capilibwile ukuti kalinda wa cifungo no lupwa lwakwe balekabila fye ukukwata ukuyumfwa kumo ifi mu mitima epela? Iyo, umulandu umo wa kuti, te kuti ‘batetekele Shikulu Yesu,’ icine cine kano nga balishibeko fimo pali Yesu ifya kuti ali ni ani, fintu acitile, na fintu alesambilisha.

Ku ca kumwenako, Yesu asambilishe ukwimikwa kwa buteko bwa mu muulu—“ubufumu bwa kwa Lesa.” (Luka 4:43) Alimike ne fishinte pa lwa mibele ya Bwina Kristu ne ncitilo. (Mateo, ifipandwa 5-7) Alangilile ifyo abasambi bakwe bafwile ukwiminina ukukuma ku fya bupolitiki. (Yohane 15:19) Aimike programu wa kusambilisha uwa mwi sonde lyonse no kutuma abakonshi bakwe ukusambilishako. (Mateo 24:14; Imilimo 1:8) Ee, ‘ukutetekela Yesu’ kwapilibwile ukumfwikisha ifintu ifingi! Kanshi, e mulandu wine Paulo na Sila “balandile icebo ca kwa Shikulu kuli [kalinda wa cifungo], na kuli bonse aba mu ŋanda yakwe” lintu aba batetekela abapya tabalabatishiwa.—Imilimo 16:32, 33.

Ukwishiba Lesa mu Kulungika na ko Kwalikatama

Ulubali lwakatama ulwa kutetekela Yesu mu cine cine lusanshamo ukupepa Lesa untu Yesu wine apepa. Yesu apepelo kuti: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.”—Yohane 17:3.

Ilyo aletumikila pe sonde, Umwana wa kwa Lesa lyonse alelosha abantu kuli Wishi te ku mwine iyo. Tabalile aitungapo ukuba Lesa Wa maka yonse. (Yohane 12:49, 50) Pa nshita ishingi Yesu alondolwele bwino bwino icifulo akwata mu kutantika kwa kwa Lesa ukupitila mu kusosa ukuti wene mwaice pali Wishi. (Luka 22:41, 42; Yohane 5:19) Yesu umwine asoselo kuti: “Tata mukalamba pali ine.” (Yohane 14:28) Bushe ku calici ku myenu balimusambilisha ukwampana kwa cine ukwaba pali Lesa na Kristu? Nelyo bushe mwalilengwa ukutetekela ukuti Yesu e Lesa wine Uwa maka yonse? Ipusukilo lyenu lishintilile pa kumfwikisha mu kulungika.

Mwi Pepo lya kwa Shikulu, Yesu akonkomeshe abasambi bakwe ukupepo kuti: “Ishina lyenu libelwe akatiina.” (Mateo 6:9) Amabupilibulo ya Baibolo ayengi yalifimbilisha ishina lya kwa Lesa, ukulipilibula ati “Shikulu.” Lelo mu fyalembwa fya kale ifya “Cipingo ca Kale” ishina lya kwa Lesa lyalimo ukucila na pa miku 6,000! E ico Ilumbo 83:18 lisosa ukuti: “Ku kuleka beshibe ukuti imwe mweka, ishina lyenu Yehova, mwapulamo pano isonde ponse.” Bushe mwalisambilishiwa ukubomfya ishina lya kwa Lesa, Yehova? Nga te fyo ninshi ipusukilo lyenu lili mu busanso, pantu “onse uukalilila kwi shina lya kwa [Yehova, NW] akapusuka.”—Imilimo 2:21; linganyeniko Yoele 2:32.

Mu Mupashi na mu Cine

Na kabili Yesu Kristu lyonse alelosha abantu ku Cebo ca kwa Lesa, Baibolo. Lintu alekolobonda mu mimwene ya kwa Lesa pa milandu imo, ilingi line alesosa ukuti: “Calembwa, aciti.” (Mateo 4:4, 7, 10; 11:10; 21:13) Ubushiku ilyo talafwa, Yesu alipepeeleko abasambi bakwe ukuti: “Bashishisheni ku cine cenu: icebo cenu e cine.”—Yohane 17:17.

Ukumfwikisha ifisambilisho fya Cebo ca kwa Lesa, Baibolo, muli fyo cintu cifwaika pa kupusuka. (2 Timote 3:16) Ni Baibolo fye yeka iyasuka ifipusho pamo nga: Ubumi bupilibula nshi? Mulandu nshi Lesa asuminishisha ububifi ukutwalilila pa nshita iitali fi? Cinshi cicitika ku muntu nga afwa? Bushe cine cine Lesa alacululusha abantu mu helo wa mulilo? Bushe mifwaile nshi intu Lesa akwatila isonde?a Umo te kuti apepe Lesa bwino ukwabula ubwishibilo bwalungama ubwa iyi milandu, pantu Yesu asoselo kuti: “Bakapepa bene bene bakapepela Tata mu Mupashi na mu cine.”—Yohane 4:23.

Icitetekelo Cilalenga Ukucitapo Cimo

Ipusukilo lisanshamo ifingi ukucila pa kulakwata fye ifyebo. Mu mutima uwankulako bwino, ukwishiba kwalungikwa ukwa kwa Lesa kulete citetekelo. (Abena Roma 10:10, 17; AbaHebere 11:6) Icitetekelo ca musango yu cilalenga ukucitapo cimo. Ku ca kumwenako, Baibolo ikoselesho kuti: “E ico lapileni, kabili pilibukileni ku kupashilwe membu shenu, ukuti kukese inshita sha kupuupuutula ukufuma ku cinso ca kwa Shikulu.”—Imilimo 3:19.

Ee, ipusukilo na kabili lisanshako ukuinashisha ku fipimo fya kwa Lesa ifya myendele ne mibele isuma. Amaka ya Cebo ca kwa Lesa ayaalula, yalalenga ifibelesho fya kale ifya kubepa no kufutika ukupyanwa no bufumacumi na bucine. (Tito 2:10) Imibele yabipa pamo nga ukulaala na ba bwamba bumo bwine, ubucende, ubulalelale, ilalekwa no kupyanwa ne mibele isuma iya musangwela. (1 Abena Korinti 6:9-11) Ici tacilepilibulo kuti kuleka fye imibele yabipa ukwa pa kashita fye pa kucilimushiwa ne nkuntu lelo kwaluka ukubelelela ukulengwa pa mulandu wa kusambilila no kubomfya Icebo ca kwa Lesa mu kusakamanisha.—Abena Efese 4:22-24.

Mu nshita, ukutemwa no kutesekesha Lesa kulalenga umuntu wa mutima wa bufumacumi ukuipeela kuli Lesa no kulangishe ci ukupitila mu kubatishiwa mu menshi. (Mateo 28:19, 20; Abena Roma 12:1) Abena Kristu babatishiwa balipusuka mu menso ya kwa Lesa. (1 Petro 3:21) Mu bonaushi bwa ici calo cibifi ubuleisa, Lesa akabapususha umupwilapo ukupitila mu kubasungilila ukupulinkana muli bulya bucushi bukalamba.—Ukusokolola 7:9, 14.

Cintu Ipusukilo Lingapilibula Kuli Imwe

Nacumfwika ukufuma kuli uku kulanshanya ukwipi ukuti ukupusuka kusanshamo ifingi ukucila ‘pa kukwata fye Shikulu Yesu mu mutima wenu.’ Kupilibula ukukwata ukwishiba kwalungikwa pali Yehova Lesa na Yesu Kristu no kwalula fimo ifilekabilwa ukwalula mu bumi. Ukucite ci kuti kwaumfwika ukwa kutiinya, lelo Inte sha kwa Yehova shili ishaipeelesha ukumwafwa muli uku kwesha. Ukupitila mwi sambililo lya Baibolo ilya mu ng’anda ilya pa fye, kuti bamwafwa ukutendeka ukwenda mu nshila iitungulula kwi pusukilo lya cine cine.b

Pa mulandu wa kupalamina kwa bushiku bwa kwa Lesa ubuleisa ubwa bupingushi, ukucite co kuli ukwe pamfya sana ukucila kale lyonse! Ino e nshita iya kumfwila amashiwi ya kwa kasesema aya kuti: “Ilyo ubushiku bwa bukali bwa kwa Yehova tabulaisa pali imwe. Fwayeni Yehova, mwe bafuuka ba mu calo bonse; mwe bacito bupingushi bwakwe, fwayeni ubulungami, fwayeni ubufuke; napamo kuti mwabelama mu bushiku bwa bukali bwa kwa Yehova.”—Sefania 2:2, 3.

[Amafutunoti]

[Akabokoshi pe bula 6]

Ipusukilo Kuti Lyaishila . . .

◻ Mu kunonka ukwishiba kwalungikwa pali Lesa na Yesu.—Yohane 17:3.

◻ Ukukwata icitetekelo.—Abena Roma 10:17; AbaHebere 11:6.

◻ Ukulapila no kwaluka.—Imilimo 3:19; Abena Efese 4:22-24.

◻ Ukuipeela no lubatisho.—Mateo 16:24; 28:19, 20.

◻ Ukutwalilila ukushimikila.—Mateo 24:14; Abena Roma 10:10.

[Ifikope pe bula 7]

Ukusambilila Baibolo, ukubomfya ifyo tulesambilila, ukuipeela, no lubatisho ni ntampulo shitungulula kwi pusukilo