Bushe Kuti Mwasumina Muli Lesa wa Cine Cine?
“TAMULEKABILA ukusumina muli Lesa pa kuba Umwina Kristu . . . Bonse tulealuka nomba, lelo mu mwanda wa myaka uwalenga 21 icalici talyakabe na Lesa mu cine cine,” e fyalondolwele shimapepo mukalamba uwa pa yuniversiti wa ku Britain. Aalelandilako akabungwe ka Sea of Faith umo bashimapepo ba ku Britain mupepi na 100 baba bamembala. Aba “Bena Kristu Abakaana Lesa” basoso kuti umuntu e waleteleko imipepele kabili, nga fintu membala umo asosele, Lesa “ca kwelenganya” fye. Tabatontonkanya na kabili ukuti kwaliba Lesa wakwatisha amaka.
Insoselo yaseekele muli ba 1960 ya kuti “Lesa alifwa.” Kwali kutontonkanya kwa wa mano ya buntunse umwina Germany uwa mu mwanda wa myaka uwalenga 19 Friedrich Nietzsche kabili kwapeele abacaice abengi insambu balefwaya isha kucite co batemenwe, ukucito bupulumushi no kubomfya imiti ikola ukwabula ne ca kubakaanya. Lelo bushe ubuntungwa bwa musango yo bwalilengele balya bana baishibikwe nga bacaibela ukuba aba nsansa?
Muli ba 1960 mwine, shikofu wa ku Anglican John A. T. Robinson alembele icitabo cakwe icaletele uluntu ica kuti Honest to God (Ukwebelapo Lesa). Bashimapepo banankwe abengi balimulengulwile nga nshi pa mashiwi asosele ukuti Lesa “lubali fye lwa co umuntu apitamo.” Profesa wa masomo ya fya mipepele Keith Ward aipwishe ati: “Bushe ukusumina muli Lesa kwali fye kutiina imipashi, uko nomba aba mano basuulile?” Umwine ayasukile cipusho ati: “Takwaba icacindama pali lelo mu mipepele ukucila ukwishiba ukuti Lesa wa cine cine.”
Nga Lesa wa Cine Cine E Ko Aba Mulandu Nshi Tuculila?
Abengi abasumina muli Lesa wa cine cine cilabafya ukumfwikisha umulandu utuyofi no kucula ficitikila. Ku ca kumwenako, mu March 1996, abana banono 16, ukusanshako na kafundisha wabo, balipaiwe ku mfuti mu Dunblane, Scotland. Umwanakashi umo uwapelenganishiwa atile: “Ine nalifilwa ukusanga icaba ukufwaya kwa kwa Lesa.” Ubulanda bwafumine muli aka kayofi bwalilumbulwilwe muli kardi bashile pamo na maluba pa nse ye sukulu lyalesambililapo aba bana. Pali fye ishiwi limo ati, “CINSHI?” Ku kwasuka shimapepo we Calici lya mu Dunblane atile: “Tatwishibe ne fya kulondolola. Te kuti twasuke umulandu ici cacitikile.”
Ulya wine mwaka, shimapepo wacaice uwalumbuka uwa Church of England alipaiwe mu bukatu. Church Times yashimike ukuti ulukuta lwapelenganishiwa lwaumfwile uko dikone mukalamba uwa ku Liverpool alelanda ulwa “kukunkunsha pa ciibi ca kwa Lesa aleipusha ati cinshi? cinshi kanshi?” Uyu shimapepo na o takwete amashiwi ya kusansamusha ukufuma kuli Lesa wa cine cine.
Nani, kanshi, twingasuminamo? Calibamo kupelulula ukusumina muli Lesa wa cine cine. E nkama ku kwasuka ifipusho abantu bapatikishiwa ukwipusha ifili pa muulu. Twamulomba ukulanguluka ubushininkisho ubulondolwelwe mu cipande cikonkelepo.
[Icikope pe bula 3]
Uyu kardi aipwishe ati “Cinshi?”
[Abatusuminishe]
NEWSTEAM No. 278468/Sipa Press