Bushe Baibolo Kuti Yatwaafwa Pali Lelo?

UKULANDA pa lwa kubelenga Baibolo, umulumendo umo atile: “Akaciputulwa akanono fye e ko tufwile ukubelenga mu Baibolo, ifingi tafibomba kabili fya kale.” Abengi kuti basuminisha uyu mulumendo. Nelyo cingati Baibolo e buuku lyacilapo kushitwa pa mabuuku yonse muno calo, abengi tabaiposako amano nangu ukubeleshanya na fintu isambilisha.

Inyunshipepala ya ku Germany iya Süddeutsche Zeitung iya mu 1996 iyalembelwe pa nshita ya Krisimasi yasosele ukuti “abalebelenga Baibolo nabacepelako nga nshi. Pali ino nshita ilyo abantu bapoosele sana amano kuli sayansi ne fya ku calo, ifyaba muli Baibolo filamoneka ifyeni kabili ifyayafya ukumfwa ku bengi.” Ukufwailisha kulelangilila ukuti uyu lipoti wa cine. Ukufwailisha kumo kwasokolola ukuti abacaice abengi nga nshi tabaishiba na bwino bwino untu Yesu aba. Mu kufwailisha kumbi, abantu bamo balipushiwe ukulondolola amalyashi ya mu Baibolo pa lwa mwana umonaushi no mwina Samaria musuma, lelo abalondolwele bwino bwino tabafikile na kuli hafu wa baipushiwe.

Ulupapulo lwa baSwiss Evangelical Church ulwitwa Reformiertes Forum lushimiko kuti mu Switzerland abantu tabafwaya ukushita Baibolo nga fintu cali kale. Nangu ni abo abakwata Baibolo, tabaibelenga lelo ikunga fye ulukungu pa shelufu apo baibika. Nangu fye ni mu Britain cimo cine. Ukufwailisha kumo kushimike fyo abantu abengi balikwata Baibolo, lelo tabaibelenga.

Lubali lumbi, kuli abantu amamilioni mu calo abamona Baibolo mu kupusanako. Balishiba ukuti Baibolo Cebo ca kwa Lesa icacindama kabili ica kunonsha. Na muli fyo, balaibelenga lyonse. Umukashana umo alembele ukuti: “Cila bushiku ndesha ukubelenga icipandwa cimo nelyo fibili muli Baibolo. Ndaipakisha sana lintu ndebelenga.” Abantu ba musango yu balomfwikisha cintu Baibolo ifunda, kabili balabomfya na fintu isambilisha mu mikalile yabo. Basumino kuti Baibolo kuti yabaafwa muli cino calo ca mafya.

Nga imwe muletilapo shani? Bushe Baibolo tayacindama muli shino nshiku? Nelyo bushe yalicindama atemwa ilanonsha? Bushe Baibolo kuti yatwaafwa pali lelo?