Twali Imimbulu—Nomba Tuli Mpaanga!

Ilyo ine na Sakina twali utukashana, twali abena mupalamano. Sakina ali uwapamfuka kabili uwakosa, lelo ine nali na kamubili akanono. Ilingi line twaleumana, lelo bushiku bumo twalilwile icabipisha. Ukufuma bulya bushiku, tatwalesoshanya nelyo ukuposhanya. Bonse twasukile twakuuka no kukanaishiba uko twakuukile.

Mu 1994, natendeke ukusambilila Baibolo ne Nte sha kwa Yehova kabili nayalwile imibele yandi panono panono. Pa numa ya myaka ine ilyo nali pa kulongana kwaibela mu Bujumbura, ku Burundi, nalipapile ilyo nakumenye Sakina. Nalitemenwe ukuti e ko ali, lelo tatwaposhenye sana na bucibusa. Inshita imbi bulya bwine bushiku, nalipapile nga nshi ilyo namumwene ali pa baleya ku kubatishiwa! Na wene alyalwike nga nshi. Tali nga filya ali kale uwa lubuli uo nalelwa nankwe libili libili. Ala caliweme ukumumona aleipeela kuli Lesa pa kubatishiwa mu menshi!

Ilyo afumine mu menshi, nabutukile ku kuyamukumbatila, no kumutepelesha mu kutwi ati: “Bushe uleibukisha ifyo twalelwa?” Atile: “Ee, ndeibukisha, lelo filya fya kale. Nomba nalyaluka.”

Bonse tuli aba nsansa ukuti twalisambilila icine ca mu Baibolo icikatanya kabili twalyalula imibele yesu iyali nge ya mimbulu no kuba impaanga sha kwa Kacema Mukalamba, Yehova Lesa. Ca cine ukuti icine ca mu Baibolo cilalula ubumi.