Kalata Ukufuma ku Dominican Republic
“Takwaba Abantemwapo nge Fi”
UNO MULUNGU Niurka alilanda ilyashi lya mu Baibolo umuku wa kubalilapo mu cilonganino cesu. Ilyo alepekanya ilyashi, alembele ifyebo mu filembo fya mpofu e lyo afisungila ku mutwe. Nali nankwe ku ntanshi no kuba kwati nine nalefwaya ukwishiba ifya mu Baibolo e lyo ena alenshimikila. Nalelandila mu cisoselo e lyo ena aleumfwila muli tulya tukusha iciunda uto afwele mu matwi. Ilyo twapwile, abantu balyumfwile bwino, balitoota ica kutila no mwine aumfwa. Ukumwentula kwakwe kwatulangile ukutila na o wine alyumfwile bwino sana. Na ine wine nalitemenwe. Ala bumishonari mulimo uuleta insansa sana!
Ndebukisha umuku wa kubalilapo namonene na Niurka. Papita imyaka ibili. Ilyo naendele na motoka amaminiti 30 mu musebo wa mu mushi, naishilemona umwanakashi naikala mu lukungu lwa ng’anda. Iyi ng’anda yali iya ya fimuti na matafwali e lyo yakwete umutenge wa malata aya ndalawa. Pa ng’anda palenunka icena ca mbushi, bakalulu, ne mbwa kwali ne congo ca ishi nama. Nasangile Niurka naikala eka alemoneka fye uwa bulanda ninshi nainamina na panshi. Alemoneka umukulu sana, kanshi ali fye ne myaka 34.
Namwikete pa kubeya, awe ainuka no kucebukila kuli ifwe nangu ca kutila apa ninshi palipita ne myaka 11 apo alekele ukumona. Nabilikishe amashiwi mu matwi yakwe, no kumweba ishina lyandi ne lya munandi twali nankwe. Twaishileishiba ukutila Niurka alifyalwa no bulwele beta ati Marfan syndrome ubumucusha sana, ubwamonaula na menso. Niurka alilwele no bulwele bwa shuga ubwalemucusha sana ica kutila alefwaikwa ukuti balemupima ifyo shuga ili mu mulopa wakwe pantu yalenina sana.
Ilyo nabikile Baibolo mu minwe yakwe, aliyishibe no kutweba ati kale ilyo ashilapofula, alitemenwe sana ukubelenga Baibolo. Natendeke ukuipusha mu mutima nati, nomba kuti nacita shani pa kuti uyu mwanakashi wa nkumbabulili, umupiina, kabili uwa malangulushi asambilile Icebo ca kwa Lesa? Apo alishibe ifilembo fipanga amashiwi, natampilepo ukulamubika ifilembo fya pulastiki mu minwe. Tapakokwele atendeke ukwishiba icilembo cimo na cimo. Icakonkelepo, natampile ukupangila ifishibilo fya mu lulimi lwa bankomamatwi mu minwe yakwe, kabili atendeke ukwishiba ifyaba icishibilo ca cilembo cimo na cimo. Asukile aishiba ne fishibilo fimbi. Apo e lyo natendeke fye ukusambilila ululimi lwa bankomamatwi, calemposela sana inshita pa kupekanya isambililo. Lelo Niurka na ine wine twalibikileko sana amano, e calengele tusambilile bwangu ululimi lwa bankomamatwi.
Cimo icalengele Niurka ukusambilila bwangu, twa kumfwilako uto akabungwe kafwilisha abalanda kamupeele. Nangu ca kuti tatwali twa mutengo sana, twalimwafwile nga nshi. Ilyo aikele imyaka ukucila pali 10 ukwabula ukumona no kumfwikisha, Niurka atendeke ukulaikala fye eka. Lelo umupashi wa kwa Yehova walisansamwishe umutima wakwe pantu walengele asambilila pali Lesa, akwata isubilo e lyo kabili asambililila no kutemwa abantu. Tapakokwele, Niurka afwaile inkonto no kutendeka ukulaebako abantu ifya mu Baibolo uko ekalila.
Niurka alasambilisha banyina mwaice Icebo ca kwa Lesa pamo no mwana wabo e lyo na mulamu wakwe. Alapekanya bwino no kuswatila ifili mwi sambililo. Abo asambilisha Baibolo e babelenga amaparagrafu, e lyo Niurka abelenga icipusho mu citabo cakwe ica filembo fya mpofu. Uo balebomba nankwe, aleba Niurka ifyo abo alesambilisha bayasuka. Limo bamupundila fye mu kutwi pa kuti omfwe e lyo limo bapanga fye ifishibilo mu minwe yakwe.
Bonse mu cilonganino balamwafwa sana Niurka no kumukoselesha. Bamunyina abengi balamwafwa ukuya mu kulongana kwa cilonganino e lyo na ku kulongana kukalamba. Bamo balaya nankwe mu kushimikila. Ni nomba line Niurka anjebele ati: “Takwaba abantemwapo nge fi.” Alefwaya ukwisabatishiwa pa kulongana kukalamba ukuleisa.
Ilyo twaponene mu musebo umo ekalila, twamwene Niurka naikala mu lukungu lwa ng’anda pa kasuba nainuna no mutwe alemwentula no kumwentula. Ilyo namwipwishe ico alemwentwila atile: “Ndetontonkanya pa fyo icalo cikawama ku ntanshi nga caba paradaise. Pano njikele nde-elenganya ati ndi mu paradaise.”
[Icikope pe bula 25]
Niurka ali na bamo bamo ababa mu cilonganino cesu pa Ng’anda ya Bufumu
[Icikope pe bula 25]
Niurka alebako bambi ifyo asambilila