‘Nge Libwe Lyakashika Ilyaumo Mutengo’

UMUTUMWA Yohane amwene mu cimonwa cakwe icipuna ica bukata mu muulu. No waikele pa cipuna alemoneka “nge libwe lya yaspi.” Ali kabili nge “libwe lyakashika ilyaumo mutengo.” (Ukusokolola 4:2, 3) Bushe yali mabwe nshi aya yene?

Aya tayali mabwe yashalengama ayabeka ku nse. Kale, ishiwi lya ciGriki ilyapilibulwa “yaspi” lyalebomfiwa ukwimininako amabwe ayakwete amalangi yapusanapusana, ukusanshako amabwe yaumo mutengo ayali ayalengama. Mwi buuku litwa Word Pictures in the New Testament A. T. Robertson atile: “Icine cine ilibwe lya yaspi ilyaba pa Ukusokolola 4:3 te limo line nge libwe ilishakosa umutengo ilyaishibikwa muno nshiku nga yaspi.” Kabili pa numa, Yohane alondolola mwi buuku lya Ukusokolola, umusumba wa ku muulu, Yerusalemu ati: “Ukubengeshima kwa uko kwali nge libwe lyaumo mutengo nga nshi, nge libwe lya yaspi ilyabeeka nga krustali.” (Ukusokolola 21:10, 11) Amabwe Yohane aleloshako cilemoneka kwati, yalepisha ulubuuto.

Uwaimininwako ngo waikala pa cipuna mu cimonwa ca kwa Yohane Muntu uwakatamisha, uwacilishapo ukusanguluka no kushila mu bubumbo bonse, Yehova Lesa. Bumushilo no kusanguluka kwakwe fyumfwana na fintu umutumwa Yohane alembele ukuti: “Lesa lubuuto, kabili tamwaba mfifi nakalya muli wene.” (1 Yohane 1:5) E ico Yohane akonkomeshe abasumina banankwe ‘ukuisangulula abene nge fyo Yehova aba uwasanguluka.’—1 Yohane 3:3

Cinshi tulingile ukucita pa kuti Lesa aletumona abasanguluka? Ukukwata icitetekelo mu mulopa uwasumiwa uwa kwa Kristu ku kwelelwa imembu shesu kulafwaikwa icine cine. Tufwile na kabili “tuleenda mu lubuuto” pa kulasambilila Baibolo lyonse no kwikala mu kumfwana ne fyo isambilisha.—1 Yohane 1:7.