Amepusho Ukufuma ku Babelenga
Bushe ukulya imikate ya mutuulo iyo Davidi na baume bakwe baliile kulalangisha ukuti lfunde lya kwa Lesa kuti lyatobwa ukwabulwo kukandwa nga ca kuti ifintu fyayafya?—1 Samwele 21:1-6.
Ukulingana na Ubwina Lebi 24:5-9, imikate ya mutuulo iyo balefumyapo pa bushiku bwe Sabata ubuli bonse, yaleliiwa fye na bashimapepo. Icalengele ukuti cibe icalinga kuli bashimapepo ukulya imikate cali pa mulandu wa kuti imikate yali iyashila na kabili yali no kuliiwa fye ku baume abalebomba umulimo wa kwa Lesa—bashimapepo. Ukuupeela ku balebomba imilimo ya cibombebombe nangu ukuuliila mu musamwe kuti kwaba ukwalubana icine cine. Na lyo line, shimapepo Ahimeleke tabembwike pa kupeele imikate kuli Davidi na baume bakwe.
Davidi nalimo alefikilisha umulimo waibela untu Imfumu Shauli yafwaile ukuti acite. Davidi na baume bakwe bali ne nsala. Ahimeleke ashininkishe ukuti bali abasanguluka ukulingana ne funde. Nangu cingatila ukulya imikate ya mutuulo takwali kwa mwi funde, lelo tacapusene ne co wabeleleko. Ici calengele Ahimeleke ukukanakosha ili funde. Nangu fye ni Yesu Kristu alibomfeshe ili ilyashi ukulangilila ifyo abaFarise balebomfya ifunde lye Sabata bubi bubi ukulikosha ukulingana no kwilula kwabo.—Mateo 12:1-8.
Ili lyashi, na lyo line, talipilibula ukuti ifunde lya kwa Lesa kuti lyatobwa ilyo ifintu fyayafya. Ku ca kumwenako, ilyo ifita fya bena Israele fyalelwa na baPelishiti ifintu fyamoneke ukwansha. Imfumu Shauli yasosele ukuti: “Abe uwatiipwa umuntu uulelye cilyo ilyo takulabe cungulo, nsuke njilandule ku balwani bandi!” Baibolo itila: “Bauminepo abaPelishiti kalya kasuba.” Abashilika balifunshike pa mulandu wa bulwi kabili bali ne nsala, kabili abantu batendeke ‘ukwipaila inama pa nshi; kabili baliile inama pamo no mulopa.’ (1 Samwele 14:24, 31-33) Balibembukile Yehova pa kutoba ifunde pa mulopa. Incitilo shabo tashaleumfwana ne nshila yeka fye iyo Lesa asuminishe ukubomfiwa kwa mulopa, uko e kutila “ku kukonsolwele” membu. (Ubwina Lebi 17:10-12; Ukutendeka 9:3, 4) Ku luse, Yehova alipokelele amalambo ayaibela ayapeelwe pa mulandu wa abo ababembwike.—1 Samwele 14:34, 35.
Cine cine, Yehova enekela ifwe ukumfwila amafunde yakwe inshita yonse. Pali 1 Yohane 5:3, umutumwa Yohane atila: “Pantu uku e kutemwa Lesa, ukuti tubake amafunde yakwe.”
[Icikope pe bula 30]
Lyonse pe Sabata kwaleba ukutantika imikate ya mutuulo imbi mwi hema