Balecita Ifyabalengele Ukuba Sana ne Nsansa—Bushe na Imwe Kuti Mwacita Cimo Cine?

BA MARC ni baNte abekala ku Canada. Balebomba ku kampani kapanga fimashini ifya maka sana ifyo basayantisiti babomfya pa kusambilila pa fyaba mu lwelele. Balebomba amaawala ayanono kabili balebomba na bupainiya bwa nshita yonse. Lyene umukalamba wa kampani aebele baMarc ukuti alabapeela icifulo icikalamba pa ncito, e kutila bali no kulabomba inshita iikalamba no kulafola indalama ishingi. Cinshi baMarc bacitile?

Amy na o ni nkashi uwikala ku Philippines. Ilyo ali mupepi no kupwisha isukulu atampile bupainiya bwa nshita yonse. Ilyo apwishishe isukulu, bamulaile ukumwingisha incito iyali no kulamusendela inshita iikalamba kabili ali no kulafola indalama ishingi. Bushe Amy acitile shani?

Ifyo baMarc na Amy bapingwilepo ukucita fyalipusene, kabili ifi filanga ukuti ifyebo umutumwa Paulo afundile Abena Kristu ba mu Korinti fyalicindama. Atile: “Na babomfya cino calo babe nga bashicibomfya sana.”—1 Abena Korinti 7:29-31.

Mulebomfya Icalo, Lelo Mwilacibomfya Sana

Ilyo tushilalanda pa fyacitile baMarc na Amy, lekeni tumone ifyo ishiwi lya kuti “icalo” (nelyo, mu ciGriki koʹsmos) lipilibula ilyo Paulo abomfeshe muli kalata alembele abena Korinti. Muli filya fyebo alembele, ishiwi koʹsmos lilosha ku fya mu calo, e kutila imikalile ya bantu, ukusanshako ne fintu ifyaseeka ifyo abantu bakabila mu mikalile, pamo nge ng’anda, ifya kulya, ne fya kufwala. Pa kuti tukwate ifi fintu ifyo tukabila mu mikalile yesu, tufwile ukulabomba incito. Kanshi, pa kuti tusange ifyo tukabila ne fyo tulingile ukupekanishisha indupwa shesu nge fyo Amalembo yatweba, tufwile fye ukubomfya ici calo. (1 Tim. 5:8) Na lyo line, twalishiba ukuti cino “calo cileya.” (1 Yoh. 2:17) E ico, ‘tatubomfya sana’ cino calo.—1 Kor. 7:31.

Pa kumfwila uku kufunda kwa mu Baibolo ukwa kukanabomfya sana icalo, bamunyina na bankashi abengi balyalula imikalile yabo, batendeka ukulabombako fye amaawala ayanono ku ncito, kabili balyangusha imikalile yabo. Ilyo batelwile imikalile yabo, batampile ukuba ne nsansa sana pantu balikwata inshita iikalamba iya kuba pamo no lupwa ne ya kubombela Yehova. Na kabili, ukwangusha imikalile yabo kwalenga ukuti belashintilila pa calo lelo bashintilila sana pali Yehova. Bushe na imwe kuti mwayangusha imikalile yenu pa kuti mulekwata inshita iikalamba iya kubombela Yehova?—Mat. 6:19-24, 33.

“Twalipalama Sana Kuli Yehova Ukucila Kale”

BaMarc abo tulandilepo pa ntendekelo ya cino cipande balyumfwilile ukufunda kwa mu Baibolo ukwa kukanabomfya sana icalo. Balikeene icifulo icikalamba ico babapeele pa ncito. Apo umukalamba wa pa ncito alefwaya ukuti baMarc basumine ukulabomba pali cilya cifulo, ilyo papitile fye inshiku ishinono, abebele ukutila bakalafola indalama ishingi sana. BaMarc balanda ukuti: “Ala bwali bwesho, na lyo line nalikeene.” Balanda icalengele ukuti bakaane, batila: “Ine no mukashi wandi Paula, twalefwaya fye ukulabombela sana Yehova. E ico, twapingwilepo ukwangusha imikalile yesu. Twalipepele kuli Yehova pa kuti tube na mano ya kupekanya bwino ifyo tukalabomba kabili twalimike no bushiku ubwa kutendeka ukupoosa inshita iikalamba ukulabombela Yehova ukulingana ne fyo twapangile.”

BaPaula batila: “Inshiku shitatu mu mulungu nalebomba pa cipatala umulimo wa busekilitare kabili nalefola indalama ishalinga fye. Kabili nalebomba na bupainiya bwa nshita yonse. Nangu cibe fyo, na ine wine nalefwaisha ukuyabombela Yehova konse ukwali ukukabila ukukalamba ukwa bakabila ba mbila nsuma kwati ni filya fine fye na baMarc balefwaya. Lelo ilyo natwele kalata ya kulekelapo incito, umukalamba wa pa cipatala anjebele ukuti balinsala ukuba sekilitare mukalamba pa cipatala. Nali no kulafola indalama ishingi,. lelo apo nalefwaya fye ukuleka incito, nalikeene ico cifulo icikalamba. Ilyo naebele umukalamba wa ncito umulandu nakaanine cilya cifulo, alintashishe pa citetekelo candi.”

Tapakokwele, baMarc na baPaula babatumine mu mulimo wa bupainiya bwaibela, kabili baile mu kubombela ukwali icilonganino icinono icabela mu ncende ya mu Canada ukushaba sana Inte sha kwa Yehova. Bushe baleikala shani ilyo bakuukile kulya? BaMarc batila: “Ilyo nalekele incito nabombele pa myaka iingi kabili apo nalefola indalama ishingi, namwene kwati nkacula sana, lelo Yehova alatupaala ilyo tulebomba umulimo wesu uwa kushimikila. Twaliba ne nsansa nga nshi ukulayafwa bambi ukulabombela Lesa. Umulimo wa nshita yonse walikosha icupo cesu. Ilingi line tulanshanya pa fintu ifyacindama, e kuti ifingatwafwa ukulabombela Yehova bwino. Pali ino nshita twalipalama sana kuli Yehova ukucila kale.” (Imil. 20:35) BaPaula nabo batila: “Ilyo mwaleka incito no kufuma mu ng’anda umo mwaleikala bwino, mufwile ukucetekela sana Yehova. Ifwe e fyo twacitile, kabili Yehova alitupaalile. Bamunyinefwe na bankashi ababa mu cilonganino ico batutumako balitutemwa kabili balenga tulefulukisha ukuba nabo. Pali ino nshita amaka nalebomfya pa ncito nalebomba ndeyabomfya ku kwafwa abantu ukwishiba Lesa. Nalitemwa sana ukulabomba uno mulimo.”

‘Aleikala Bwino, Lelo Tali ne Nsansa’

Amy uo tulandilepo pa ntendekelo ya cino cipande, ena apingwilepo ukucita icapuseneko. Alisumine ukutampa ukubomba incito iyo ali no kulafola indalama ishingi. Amy atila: “Umwaka wa kubalilapo ukubomba incito bampeele, nali uwacincila na mu mulimo wa kushimikila lelo panono panono natampile ukubika sana amano ku ncito nalebomba ukucila ukulabombela Yehova. Balendaya ukumpeela ififulo ifikalamba kabili ici calengele ukuti ndebombesha sana. Apo ifya kucita fyatendeke ukufula pa ncito, natampile ukulapoosa inshita iinono mu kushimikila. Mu kuya kwa nshita, nasukile nalekelela fye ukushimikila.”

Amy nga atontonkanya pa fyo ali ilyo alebomba incito, atila: “Nalefola indalama ishingi. Naleya mu kubombela ku ncende ishalekanalekana kabili abantu balincindike sana. Lelo, nshali ne nsansa. Nangu nalekwata indalama, naleba na mafya ayengi nga nshi. Nshaishibe icalengele. Lyena nailwike ukuti pa mulandu wa kutemwisha incito ya muli cino calo, nali mupepi no ‘kulufiwa ukufuma ku citetekelo.’ Nga fintu fye Icebo ca kwa Lesa cilanda, ici calengele ukuti mbe na ‘macushi ayengi.’”—1 Tim. 6:10.

Nomba cinshi Amy acitile? Atila: “Naebele baeluda ukungafwa ukuba cibusa wa kwa Lesa na kabili. Ilyo bangafwile natampile ukulasangwa ku kulongana. Lintu twaleimba ulwimbo, natampile ukulila. Naibukishe ifyo nali uwa nsansa ilyo nali painiya pa myaka 5, nangu ca kutila pali ilya nshita nali umupiina. Nailwike ukuti nalingile ukuleka ukulapoosa inshita iikalamba ku kufwaya indalama no kuti nalekabila kubika Ubufumu intanshi. Nalombele ukuti bampeele icifulo icinono pa kampani, ici calengele ukuti ndefola hafu ya ndalama nalefola kale, kabili natampile ukulabombako umulimo wa kushimikila na kabili.” Amy asosele ukuti: “Pa myaka fye iinono iyo nabomba bupainiya ndaipakisha icine cine. Pali ino nshita naliba ne nsansa nga nshi ukucila ifyo nali ilyo nalepoosa inshita iikalamba ku ncito nalebomba.”

Bushe takuli ifyo mwingacita pa kuti mwangusheko imikalile yenu? Nga mwayangushako imikalile yenu no kulabomfya inshita mukalakwata ku kwafwilisha ifya Bufumu, na imwe bene mukaba sana ne nsansa.—Amapi. 10:22.

[Amashiwi pe bula 19]

Bushe takuli ifyo mwingacita pa kuti mwangusheko imikalile yenu?

[Akabokoshi ne Cikope pe bula 19]

“Muli Iyi Yine Fye Myeshi I Inono Nintemwa Sana Umulimo wa Nshita Yonse!”

BaDavidi, baeluda mu United States, balefwaya ukutampa ukulabomba umulimo wa nshita yonse uo abakashi na bana babo balebomba. Batampile ukulabomba amaawala ayanono pa ncito kabili batendeke bupainiya bwa nshita yonse. Bushe ifyo bacitile fyalibalengele ukuba ne nsansa sana? Ilyo papitile imyeshi iinono, baDavidi balembele abanabo ukutila: “Takwaba ico naipakishapo sana ngo kubombela Yehova capamo no lupwa lwandi. Nalemona kwati cikasenda nshita pa kuti nkabeleshe ukubomba bupainiya, lelo muli iyi yine fye imyeshi iinono nintemwa sana umulimo wa nshita yonse! Mulimo uusuma nga nshi.”

[Icikope pe bula 18]

BaMarc na baPaula baleshimikila