Balilinga Ukupokelela Ubufumu

“Ubu e bushininkisho bwa bupingushi bwalungama ubwa kwa Lesa, ukuti mulengwe abawamino bufumu bwa kwa Lesa.”—2 TES. 1:5.

1, 2. Bushiku bwa kucita cinshi Lesa aabika, kabili nani akabomfya?

MULI ba 50 C.E. umutumwa Paulo aali mu Atena. Taumfwile bwino ilyo amwene abantu abengi mulya balepepe filubi. Ici calengele abashimikile mu nshila iisuma sana. Mu kulekelesha, alandile icishinka cacindama ico bakapepa ba filubi bafwaile ukumfwikisha. Atile: “Nomba, [Lesa] aleeba abantu bonse mpanga yonse ukulapila. Pa mulandu wa kuti alibika ubushiku umo akapingwila aba pano isonde mu bulungami ku muntu uo asonta, kabili alipeela no bushininkisho ku bantu bonse pa kumubuusha ku bafwa.”—Imil. 17:30, 31.

² Kanshi cikankaala sana ukulatontonkanyapo ukuti Lesa alibika ubushiku bwa kupingula abantu bonse! Uukapingula abantu ni Yesu Kristu uwabuukile ku bafwa, nangu ca kuti ilyo Paulo alelanda ku bena Atena, tamulumbwile ishina. Yesu akapingula bamo ukuba no bumi e lyo bambi akabapingula ukufwa.

3. Mulandu nshi Yehova acitiile icipangano na Abrahamu, kabili ni bani apeela umulimo waibela pa kufikilisha ubufwayo bwakwe?

³ Ubushiku bwa Bupingushi bukaba imyaka 1,000. Yesu Imfumu ya Bufumu bwa kwa Lesa, e ukemininako Yehova no kupingula abantu muli iyi myaka, lelo takabe eka. Yehova alisala na bantunse bamo abakateeka na Yesu kabili bakaba bakapingula muli ilya myaka 1,000 iitwa ati ubushiku bwa bupingushi. (Linganyeniko Luka 22:29, 30.) Imyaka 4,000 iyapita, Yehova apangene icipangano na Abrahamu umubomfi wakwe uwa cishinka icakumine Ubushiku bwa Bupingushi. (Belengeni Ukutendeka 22:17, 18.) Ici cipangano catendeke ukubomba mu 1943 B.C.E. Kwena, Abrahamu taishibe fyonse ifyali no kucitika pa mulandu wa cilya cipangano. Lelo ifwe tulamona ukuti ubufyashi bwa kwa Abrahamu e bo Lesa apeela umulimo waibela pa kuti ubufwayo bwakwe ubwa kupingula abantu bukafikilishiwe.

4, 5. (a) Bushe umukalamba mu bufyashi bwa kwa Abrahamu nani, kabili cinshi asosele pa Bufumu? (b) Ni lilali abakateka pamo na Yesu mu Bufumu batendeke ukubasala?

⁴ Umukalamba mu bufyashi bwa kwa Abrahamu aishileba Yesu uwasubilwe no mupashi wa mushilo mu 29 C.E. no kuba Mesia nelyo Kristu uo batile akesa. (Gal. 3:16) Yesu ashimikile abaYuda imbila nsuma ya Bufumu pa myaka itatu. Ilyo Yohane Kabatisha bamwikete, Yesu alilangile ukuti kwali bambi abakaba nankwe mu Bufumu ilyo atile: “Ukufuma mu nshiku sha kwa Yohane ukufika na nomba, ubufumu bwa mu muulu e buyo ubo abantu bapilikitila, na balepilikita e babusompola.”—Mat. 11:12.

⁵ Lelo ilyo Yesu talalanda pa ‘bakasompola’ nelyo ukupeelwa Ubufumu bwa ku muulu, abalile alanda ati: “Cine cine, ndemweba nati, mu bafyalwa ku banakashi tamwaimine umukalamba uwacila pali Yohane Kabatisha; lelo uwacepesha mu bufumu bwa mu muulu mukalamba pali wene.” (Mat. 11:11) Mulandu nshi asosele ifyo? Pantu pali ilya nshita ninshi abantu aba cishinka tabalatendeka ukubapeela ishuko lya kuteka mu Bufumu bwa kwa Lesa. Baishilekwata ili shuko ukutendeka pa Pentekoste wa mu 33 C.E. ilyo Lesa apongolwele umupashi wa mushilo pali bena. Ilya nshita, Yohane kabatisha ninshi alifwa.—Imil. 2:1-4.

Aba mu Bufyashi bwa kwa Abrahamu Balilungama Kuli Lesa

6, 7. (a) Bushe ubufyashi bwa kwa Abrahamu bwali no kuba shani nge “ntanda sha mu muulu”? (b) Mapaalo nshi Abrahamu apokelele, kabili mapaalo nshi aba mu bufyashi bwakwe na bo bapokelela?

⁶ Lesa aebele Abrahamu ukutila ubufyashi bwakwe bukaba “nge ntanda sha mu muulu” nelyo ngo musensenga wa mu lulamba lwa bemba. (Ukute. 13:16; 22:17) Ico alelandapo ca kutila, ilyo Abrahamu ali pano calo takwali uwali no kwishiba impendwa ya ubu bufyashi. Lelo impendwa yakumanina iya ubu bufyashi yalisokolwelwe. Kanshi abakateka na Yesu bali no kuba 144,000.—Ukus. 7:4; 14:1.

⁷ Icebo ca kwa Lesa cilanda pa citetekelo ca kwa Abrahamu aciti: “[Abrahamu] atetekele Yehova; na o amulingile icitetekelo cakwe ukuti bulungami.” (Ukute. 15:5, 6) Kwena takwaba umuntu uwalungama umupwilapo. (Yako. 3:2) Na lyo line, pa mulandu wa citetekelo ca kwa Abrahamu icakulisha, Yehova alemumona ukuti mulungami kabili alemwita no kuti cibusa wakwe. (Esa. 41:8) Abafuma mu bufyashi bwa kwa Abrahamu abakateka pamo na Yesu, na bo bene Lesa abamona ukuti balungami, kabili ici cilabaletela amapaalo ayakalamba ukucila ayo Abrahamu apokelele.

8. Mapaalo nshi ubufyashi bwa kwa Abrahamu bwakwata?

⁸ Abena Kristu basubwa na bo Lesa abamona ukuti balilungama pa mulandu wa kutila balitetekela ilambo lya cilubula ilya kwa Yesu. (Rom. 3:24, 28) Kuli Yehova, ulubembu lwabo lwalipwa kabili balasubwa no mupashi wa mushilo pa kuti babe abana ba kwa Lesa, bamunyina Yesu Kristu. (Yoh. 1:12, 13) Baba mu cipangano cipya no kuba uluko lupya ulwitwa ati, “Israele wa kwa Lesa.” (Gal. 6:16; Luka 22:20) Mwandini ili, lishuko icine cine! Apo Lesa alibasala ukuba muli ulu luko, Abena Kristu basubwa tababa ne subilo lya kwikala umuyayaya pano calo. Bena basuubila ukuya ku muulu uko bakaba na Yesu mu Bushiku bwa Bupingushi e lyo no kuteka nankwe, kabili ici cikabaletela insansa icine cine.—Belengeni Abena Roma 8:17.

9, 10. (a) Ni lilali Abena Kristu basubilwe no mupashi umuku wa kubalilapo, kabili finshi baleenekela ku ntanshi? (b) Bushe Lesa ayafwile shani abasubwa ukuba ne cishinka?

⁹ Pa Pentekoste wa mu 33 C.E., Abena Kristu ba cishinka balipeelwe ishuko lya kuba pa bakateka na Yesu mu Bushiku bwa Bupingushi. Pali iyi nshita, abasambi ba kwa Yesu 120 balipokelele umupashi wa mushilo no kuba Abena Kristu basubwa. Lelo iyo yali ni ntendekelo fye. Ukutule lyo, balekabila ukuba aba cishinka kuli Yehova te mulandu na mesho ayo Satana aali no kuleta pali bena. Balekabila ukuba aba cishinka ukufika na ku mfwa pa kuti bakapokelele icilongwe ca mweo ku muulu.—Ukus. 2:10.

¹⁰ Pa kwafwa Abena Kristu basubwa ukuba aba cishinka, Yehova alebafunda no kubakoselesha ukupitila mu Cebo cakwe e lyo na mu cilonganino. Ku ca kumwenako, umutumwa Paulo alembeele Abena Kristu basubwa mu Tesalonika ukutila: “E ico mwalishiba bwino ukuti, filya wishi acitila abana bakwe, twalemukonkomesha umo na umo uwa muli imwe, no kumusansamusha no kushimiko bunte kuli imwe, ku kuleka mutwalilile ukwendela umwawamina Lesa uulemwita ku bufumu bwakwe no bukata bwakwe.”—1 Tes. 2:11, 12.

11. Fyalembwa nshi Yehova apeele ababa muli “Israele wa kwa Lesa”?

¹¹ Mu myaka yakonkelepo ukufuma apo Yehova asaliile Abena Kristu basubwa aba kubalilapo, amwene ukutila kuti cawama ukulemba imilimo Yesu abombele pano calo, ne milimo apeele Abena Kristu basubwa abaliko mu nshita ya batumwa pamo ne fyo alebafunda. E co pa Malembo ya ciHebere ayaliko, Yehova alilundilepo na Malembo ya Bwina Kristu aya ciGriki. Amalembo ya ciHebere yena pa kubala yalembeelwe fye uluko lwa bena Israele ilyo bali ifibusa fyaibela ifya kwa Lesa. Lelo Amalembo ya ciGriki aya Bwina Kristu yalembeelwe sana sana aba muli “Israele wa kwa Lesa,” abasubwa no mupashi, bamunyina Kristu, abana ba kwa Lesa. Kwena, ici tacalola mu kutila abashili bena Israele te kuti basambililemo icili conse mu Malembo ya ciHebere. Abena Kristu abashasubwa no mupashi wa mushilo na bo bene balanonkelamo sana mu kusambilila no kukonka ifyaba mu Malembo ya Bwina Kristu aya ciGriki.—Belengeni 2 Timote 3:15-17.

12. Finshi Paulo acinkwileko Abena Kristu basubwa?

¹² Lesa alemona Abena Kristu ba kubalilapo ukuti bali abalungama no kubasuba no mupashi pa kutila balinge ukuyaikala ku muulu. Filya abasubile no mupashi wa mushilo tacalolele mu kuti bali no kuba imfumu pa Bena Kristu banabo abasubwa ilyo bonse bali pano calo. Cimoneka ukuti Abena Kristu bamo balilabile ici cishinka kabili batendeke ukufwaya ukucindikwa sana kuli bamunyinabo mu cilonganino. Ici calengele Paulo ukubepusha ukuti: “Bushe mwaikuta kale? Bushe mwaba no bukankaala kale? Bushe mwalitendeka ukuteeka nge shamfumu ukwabula ifwe? Iye, kanshi nga mwalitendeka ukuteeka nge shamfumu, ukuti na ifwe tuteekele pamo na imwe.” (1 Kor. 4:8) E ico, Paulo acinkwileko abasubwa pali ilya nshita ukuti: “Te kutila ni fwe bacibinda pa citetekelo cenu, lelo tuli babomfi banenu ku kumuletelo kusekelela.”—2 Kor. 1:24.

Ukukumanisha Impendwa Iyo Lesa Asobele

13. Bushe ukusala abasubwa kwali shani pa numa ya 33 C.E.?

¹³ Te Bena Kristu basubwa bonse 144,000 abasalilwe mu nshita ya batumwa. Ukufuma mu nshita ya batumwa ukufika fye na mu nshiku shesu, Lesa alitwalilila ukusala abasubwa. Na lyo line, ilyo inshita ya batumwa yapitile, te bengi alesala. (Mat. 28:20) Nomba ilyo Yesu atendeke ukuteka mu 1914, ifintu fyalyendele mu kwangufyanya.

14, 15. Bushe imisalile ya basubwa muno nshiku yaba shani?

¹⁴ Intanshi, Yesu aliwemye umuulu, afumyamo bonse abalelwisha ukuteka kwa kwa Lesa. (Belengeni Ukusokolola 12:10, 12.) Lyene atendeke ukusala abasheleko pa basubwa aba kuteka nankwe mu Bufumu pa kuti impendwa ya 144,000 ikumanine. Pa kufika mu 1935, ninshi abasubwa abengi balisalwa, kabili abengi abalepokelela ubukombe bwalebilwa, tabaleba ne subilo lya kuya ku muulu. Umupashi tawalebapeela ubunte bwa kutila bali bana ba kwa Lesa. (Linganyeniko Abena Roma 8:16.) Lelo baleba pe bumba lya “mpaanga shimbi,” abasuubila ukwikala pano calo mu paradaise. (Yoh. 10:16) E co ukutula mu 1935, umulimo wa kushimikila abantu imbila nsuma, wabeleleko ukulonganika “ibumba likalamba,” ilyo umutumwa Yohane amwene mu cimonwa, ilikapusuka “ubucushi bukalamba.”—Ukus. 7:9, 10, 14.

¹⁵ Na lyo line, mu myaka yapita ukufuma muli ba 1930, bamo bamo balisalwa ukuyateeka na Yesu ku muulu. Mulandu nshi? Pantu bamo abasalwa bapyana pali balya abasalilwe abaleka ukupepa Lesa. (Linganyeniko Ukusokolola 3:16.) Paulo alilandilepo na pa bantu bamo abo aishibene na bo abalekele ukupepa. (Fil. 3:17-19) Ni bani Yehova asala ukupyana abaleka ukupepa? Kwena Lesa umwine e umona uo engasala. Lelo afwile asala abamubombela ne cishinka pa nshita ntali nga filya fyali abasambi abo Yesu ali na bo ilyo atendeke Icibukisho ca imfwa yakwe. Kanshi cilemoneko kuti te bapya engasala.a—Luka 22:28.

16. Cinshi Lesa acita icakuma abasubwa ico twingamutashishapo, kabili finshi twacetekela?

¹⁶ Lelo, cimoneka ukutila te bonse abasalwa ukutula mu myaka ya ba 1930 abasalilwa ukupyana pa baleka ukupepa. Te ca kutwishika ukutila Yehova afwaya ukuti twakwata Abena Kristu basubwa muli shino nshiku sha kulekelesha ukufikila fye akonaule “Babiloni Mukalamba.”b (Ukus. 17:5) Kabili twalicetekela ukuti inshita ya kwa Yehova umwine nga yafika, abasubwa bonse 144,000, bakakumanina kabili bakatendeka no kuteka mu Bufumu bwa ku muulu. Twalicetekela no busesemo bwa kutila, ababa mwi bumba likalamba bakatwalilila ukuba aba busumino. Tapakokole sana, aba bantu ‘bakafuma mu bucushi bukalamba’ ubukesa pa calo ca kwa Satana no kwingila mu calo cipya ica kwa Lesa.

Impendwa ya Bakateka mu Bufumu ili no Kukumana ku Muulu Nomba Line!

17. Ukulingana na 1 Abena Tesalonika 4:15-17 na Ukusokolola 6:9-11, cinshi cacitika ku Bena Kristu basubwa ababa ne cishinka mpaka ne mfwa?

¹⁷ Ukutula mu 33 C.E., Abena Kristu basubwa abengi nga nshi balitwalilila ukuba ne citetekelo cakosa kabili aba cishinka kuli Yehova mpaka ne mfwa. Aba bonse balilinga ukupokelela Ubufumu, kabili cimoneka ukutila ukutula apo Kristu atendekele ukuteka, papitile fye inshita inono batampa no kupokelela icilambu cabo ica kuya ku muulu.—Belengeni 1 Abena Tesalonika 4:15-17; Ukusokolola 6:9-11.

18. (a) Cinshi abasubwa abacili pano calo bacetekela? (b) Bushe ababa mwi bumba lya mpaanga shimbi bamona shani bamunyinabo abasubwa?

¹⁸ Abasubwa abacili pano calo nabo balicetekela ukutila nga ca kuti batwalilila aba cishinka kuli Lesa, tapakokole sana bali no kupokelela icilambu cabo ica kuya ku muulu. Ababa mwi bumba lya mpanga shimbi abengi nga nshi ilyo batontonkanya pa fyo bamunyinabo abasubwa batwalilila aba cishinka kuli Lesa, balasumina filya umutumwa Paulo alandile pali bamunyina basubwa mu Tesalonika, ukuti: “Pali uyu mulandu ifwe tutakishisha muli imwe mu filonganino fyonse ifya kwa Lesa pa kushipikisha kwenu no kutetekela kwenu muli fyonse ifya kumupakasa na mu fya bucushi ifyo muleshipikishako. Ubu e bushininkisho bwa bupingushi bwalungama ubwa kwa Lesa, ukuti mulengwe abawamino bufumu bwa kwa Lesa, ubo muleculila icine cine.” (2 Tes. 1:3-5) Ilyo uwasubwa uwa kulekeleshako akafuma pano calo no kuya ku muulu, nampo nga ni lilali ico cikacitika, e lyo impendwa ya bakateeka mu bufumu bwa kwa Lesa ikakumana ku muulu. Ala ico cikaleta insansa ishingi sana pano calo na mu muulu!

[Amafutunoti]

Bushe Kuti Mwalondolola?

• Cinshi Lesa asokolwele kuli Abrahamu icakumine Ubushiku bwa Bupingushi?

• Ninshi Lesa amwenene Abrahamu ukuti ali mulungami?

• Lishuko nshi aba mu bufyashi bwa kwa Abrahamu bakwata ifi Lesa abamona ukuti balungami?

• Bushe Abena Kristu bonse bacetekela finshi?

[Icikope pe bula 20]

Yesu akoseleshe abakonshi bakwe ukubombesha pa kuti bakabe mu Bufumu

[Icikope pe bula 21]

Pa Pentekoste mu 33 C.E., Yehova atendeke ukusala na bambi aba mu bufyashi bwa kwa Abrahamu

[Ifikope pe bula 23]

Ababa mwi bumba lya mpaanga shimbi balatasha Lesa pa mulandu wa kuti bacili na Bena Kristu basubwa pano calo muli shino nshiku sha kulekelesha