Ukushimikila Imbila Nsuma mu Mpili sha Andes

BONSE pamo twali 18, twaleele fye pa nshi apalamba mu kayanda ako bafimbapo amalata. Twaletutuma umulandu kwalitalele sana kabili imfula iikalamba yaleloka. Ilyo twaloleshe ifyo aka kayanda kalemoneka, twamwene kwati ni fwe ba kubalilapo ukulaalamo.

Mulandu nshi twailile kuli iyi ncende? Ico twailile ku Andes ni co twalefwaya ukumfwile funde Yesu atupeela ilya kushimikila imbila nsuma “ukufika ku mpela ya pano isonde.” (Imil. 1:8; Mat. 24:14) Twaile mu kushimikila imbila nsuma ku bantu bekala mu mpili sha Andes mu Bolivia ukushaba Inte sha kwa Yehova.

Ifyo Twapitilemo pa Kuya ku Andes

Ica kubalilapo, pa kuyafika fye ku Andes calyafishe. Batwebele ukuti ku Andes takuya sana imyotoka pantu kutali sana. Lintu twali pa citesheni, twaleenekela ukuti kwalaisa basi iikalamba lelo kwaishile iinono ica kuti ilyo twaninine bamo pali ifwe baiminine fye. Nangu cali fyo, bonse twalifikile uko twaleya.

Ico twalefwaisha kushimikila ku bantu baleikala mu mishi ya mu Bolivia iyaba mu mpili sha Andes. Ilyo twaikile muli basi, twaimishe ifipe fyesu no kutoola ubulendo. Twaleenda mu mulongo ukukonka utushila twaba mu mbali ya mpili shasuluka sana.

Nangu cingati imishi tayakulile, amayanda yalitalukene sana ica kuti casendele amaawala ayengi nga nshi pa kuti tushimikile mu mishi yonse. Kanshi limo kuti twaenda impanga iikulu tulemona kwati amayanda yonse yapwa, e lyo twaisamona ing’anda imbi akatalamukila. Ilingi line twaleluba nga twakonka utushila twashokoloka utwapita mu mbali ya mabala.

“Cinshi Mushaleishila Kuno Kale?”

Umwanakashi umo alitemenwe sana ukumfwa ukuti twafumine ukutali, kabili alitusuminishe ukwipikila ifya kulya twaliile akasuba mu kicini yakwe. Ilyo umwaume umo twamusambilishe ifyo Baibolo ilanda pa ficitika umuntu nga afwa, aipwishe ukuti, “Cinshi mushaleishila kuno kale ?” Uyu mwaume alitemenwe nga nshi ica kuti ilyo twalefuma mu mushi aleikala, alitushindike kabili alipwishe amepusho ayengi. Umwaume umbi uo twashimikileko tatalile alandapo ne Nte sha kwa Yehova kabili alitemenwe sana impapulo shesu. Alitashishe sana ukuti namucita bwino ukwisa kuno kabili alitupeele amakii ya kwiswila mu kayanda twasendememo.

Ubushiku bumo kwali mfifi sana ica kuti tatwaishibe ukuti apo twapangile amatenti e pali umushi wa finyelele fyafita. Tapakokwele fyalifumine kabili fyatendeke ukutusuma. Apo twalinakile sana twalifililwe ukufumapo, lelo icawemeko ca kuti fyalilekele ukutusuma.

Pa kubala fye, inuma ne mbafu fyalikalipe ilyo twaleele pa nshi, nomba lintu bwailile sana twalisuka twabelela. Lelo ilyo bwacele, twalilabile na ku fyalekalipa lintu twaletamba imikonko iyalemoneka bwino sana ninshi na makumbi yalepita panono panono mu mbali. Kabili ilyo twaloleshe akatalamukila, twamwene pa muulu wa mpili apafimbwa bwino bwino na aisi. Kwali fye tondolo, icongo twaleumfwa fye ca menshi ayalepooma no kulila kwa tuni.

Ilyo twasambile mu kamana, twabebetele ilembo lya bushiku no kulya umwikulo. Awe e fyo twatampile ukutumbika ulupili ukuya ku mishi iyali ukutali. Nangu ca kuti twalinakile, ifyafuminemo fyali bwino sana. Twasangile nakulubantu uwalilile ilyo aishibe ukuti ishina lya kwa Lesa, Yehova, emo lyaba mu Baibolo. Alitemenwe nga nshi. Nomba ali no kulalumbula ishina lya kwa Lesa ilyo alepepa!

Shikulubantu umo alandile ukuti Lesa namwibukisha, kabili ilyo line atendeke ukwimba ulwimbo ulwaleti bamalaika e batutumine. Umwaume na umbi uwalwele ica kuti alefilwa no kufuma pa ng’anda, atwebele ukutila takwaba nangu umo mu mushi ekala uwa mupempulapo. Alipapile ukumfwa ukuti twafumine ku La Paz ukushailepela. Umwaume umbi na o alitemenwe nga nshi ukwishiba ukuti Inte sha kwa Yehova batandalila abantu pa mayanda yabo, ilyo aba mu macalici yambi bena balisha fye inyenjele pa kwita abantu ukuya ku macalici.

Kuli iyi ncende takwaba amalaiti, kanshi abantu batila fye nga pafiita baingila kabili bafuma mu mayanda akasuba nga katula. E co, pa kusanga abantu pa mayanda, twaletampa ukushimikila ulucelo, e kutila 06:00 hrs. Nga twacelwa ukutendeka ukushimikila ninshi kusanga abengi nabaya ku mabala. Pa numa, bamo abo twalesanga nabatendeka ukulima baletemwa ukukutika ku mbila nsuma yaba mu Cebo ca kwa Lesa, ici nalimo calelenga ne ng’ombe shalelima ukuti shitusheko. Abengi abo twalesanga pa mayanda baletwanshikila impapa sha mpaanga apo twaleikala kabili baleita bonse pa ng’anda pa kuti bese mu kukutika ku mbila nsuma. Pa kutasha pa mpapulo shilanda pali Baibolo isho twabashiilile, abalimi bamo basangwile imifuko ya mataba iikalamba sana.

“Tamwandabako”

Kwena, pa kuti abantu beshibe icine, tulingile ukubatandalila imiku iingi. Abengi abo twashimikileko balefwaisha ukuti tukabweleleko na kabili. Ici calenga ukuti tuleyako imiku iingi.

Pa lwendo twalekelesheko, ba nakulubantu balitemenwe ukumona twabwelelako, kabili batile: “Mwaba fye kwati bana bandi pantu tamwandabako.” Umwaume umo alitutashishe ukuti umulimo tubomba walicindama kabili atwebele ukuti umuku tukabwelelako tukayefikila mu ng’anda yakwe. Nalimo icilambu icikalamba sana pa fyo tubombesha ca kumfwa ukuti umwanakashi umo uo twashimikileko alikuukila ku tauni kabili alashimikila ne mbila nsuma.

Pa lwendo lwa kubalilapo, ubushiku twalefuma ku Andes, parafini ya mu citofu twalebomfya yalipwile kabili ifya kulya na fyo fyashele fye ifinono. Twatebele inkuni no kukosha umulilo, twaipike ne fya kulya fyashelepo, kabili twatampile ukubwelelamo pa makasa. Uko twali kwalilepele sana na ku tauni ukwa kuyaninina basi. Nangu cibe fyo, twasukile twafika, ninshi napafiita.

Ifyo Twapitilemo pa Kubwelela ku Mwesu

Na lintu twalebwela ukufuma ku Andes tatwaendele bwino pantu basi yalifwile. Ilyo papitile inshita, twasukile twanina icimbayambaya icasendele abantu abengi. Ici calengele ukuti tushimikile kubo twaninine nabo icimbayambaya abalefwaisha ukwishiba ico twaile mu kucita ku Andes. Nangu cingati abantu bekala ku Andes ba nsoni, abengi ba cileela kabili balisansamuka.

Icimbayambaya twaninine caendele amaawala 9 pa kufika ku mwesu. Kabili twafikile ninshi natubomba ku mfula, tulekanka fye pa mulandu wa kukata. Nangu twaculile ifi, ulwendo lwesu lwafuminemo ifisuma. Pa kubwela, twapangene ukulasambilila Baibolo no mwanakashi uwikala ku tauni.

Ala lyali lishuko nga nshi ukuyashimikila imbila nsuma ku bantu abekala kuli shilya ncende shabela ukutali. Twashimikile mu mishi iikalamba ine na mu tumishi utunono utwingi nga nshi. Twaibukishe amashiwi yatila: “Ifyo yayemba pa mpili amakasa ya kwa kabila, uulengo kuumfwe fya mutende, uubile mbila nsuma, uulengo kuumfwo kupususha.”—Esa. 52:7; Rom. 10:15.

[Icikope pe bula 17]

Nabaipekanya ukuya mu kushimikila