Icipangano Icacindama nga Nshi
N ALIPANGA icipangano icacindama nga nshi. Lekeni nondolole icalengele ukuti ne mukashana umwina Spain mpange ici cipangano.
Mu lupwa lwesu mwali amafya nga nshi. Twali no bulanda sana ilyo ndume yandi umwaice afwile mu busanso bwa pa musebo ninshi ali fye ne myaka ine. Na kabili, batata bali ne misango iyabipa iyalengele ukuti bamayo belaba ne nsansa. Nangu cingati bamayo balepita muli aya mafya, balitwalilile ukusambilisha ine na ndume yandi umukalamba imibele iisuma.
Ilyo papitile inshita, ndume yandi alyupile na ine nalyupilwe. Tapakokwele, bamayo baishilelwala kansa, kabili balifwile. Nomba ilyo bashilafwa, batushilile icintu icacindama sana.
Umwanakashi umo uo bamayo baishibene nankwe abashimikile pa fyo Baibolo yalanda ukuti abafwa bakabuuka, kabili ilyo abepwishe nga kuti batemwa ukusambilila Baibolo, balisumine. Ilyo bamayo bali mupepi no kufwa, ifyo basambilile mu Baibolo fyalengele bakwate isubilo ilyalengele ukuti babe ne nsansa.
Ilyo twamwene ifyo bamayo bashipile ne nsansa bakwete pa mulandu wa fyo basambilile mu Baibolo, ine na ndume yandi twatendeke ukusambilila Icebo ca kwa Lesa. Nabatishiwe ninshi kwashele fye umweshi umo uwa kupaapa umwana uwa kulenga bubili, umwana mwanakashi uwayemba, uo twainike ukuti Lucía.
Ubushiku nabatishiwe bwalicindeme nga nshi kuli ine. Cimo icalengele ukuti bucindame ca kuti ukutula lilya, nasangwike umubomfi wa kwa Yehova, pantu naliipeela kuli ena ku kulamubombela ku ciyayaya. Cimbi icalengele ca kuti nomba nali no kulasambilisha abana bandi babili, umulumendo no mukashana, ifyo nasuminamo.
Lelo tapakokwele, umo pa bana bandi abo nalefwaisha ukusambilisha ifyo nasuminemo, atampile ukulwala. Ilyo Lucía ali ne myaka ine, atampile ukulwala mu mala, kabili mwalekalipa sana. Pa numa ya kumupima imiku iingi, dokota alondolwele ukuti kwi libu lya kwa Lucía kwali icafimbile icakulile nge cungwa. Dokota alandile ukuti Lucía ali no bulwele bwa neuroblastoma, kansa iyalekula bwangu sana. Ubu bulwele bwacushishe Lucía pa myaka 7, ica kuti ilingi line aleba fye mu cipatala.
Aleitemenwa Ukwafwa Bambi
Imyaka yonse iyo Lucía alecula, ifyo alenkumbatila no kuntomona fyalenkoselesha sana. Ababomfi ba mu cipatala nabo balipapile sana ifyo ashipile ilyo alecula kuli ubu bulwele. Alefwaya lyonse ukulayafwako banasi imilimo imo pamo nga ukutwala yogurt, ifya kunwa, na fimbi ku bana abo batekele mu cipatala mu miputule iyali mupepi. Banasi bapeele Lucía ikoti lyabuta na baji ya kubika pe koti iyalemwishibisha ukuti “aleyafwa banasi.”
Umwanakashi umo uubomba mu cipatala atile: “Ifyo Lucía alecita fyalimfikile sana pa mutima. Alicincile, alitemenwe utwa kupangapanga, kabili alitemenwe sana no kupenta. Ali uwacenjela kabili alecita ifintu kwati mukalamba.”
Icebo ca kwa Lesa e calengele Lucía ukuba uwashipa kabili uwatekanya. (Heb. 4:12) Alicetekele ukuti nga fintu fye Icebo ca kwa Lesa calanda, mu calo cipya “imfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo.” (Ukus. 21:4) Apo alitemenwe abantu, lyonse aleebako bambi pa fyo Baibolo isambilisha. Nangu cingati ubulwele Lucía alwele tabwali na kupola, alitwalilile ukuba ne subilo mu kubuuka ica kuti ali uwashipa kabili uwa nsansa. (Esa. 25:8) Tanenwike ukufika fye na pa bushiku afwile kuli kansa.
Ni pali bulya bwine bushiku epo napangile icipangano icacindama nga nshi. Lucía alefilwa ukulolesha. Bawishi bamwikete ku kuboko kumo na ine naikete ukunankwe. Namwebele mu kapoopo ukuti: “Wisakamana, nshakushe, ulepema fye panono panono. Ilyo walabuuka, walaumfwa bwino. Tawaumfwe ubukali na kabili, ndeba pamo na iwe.”
Mfwile ukufikilisha cilya cipangano. Nalishiba ukuti cikangafya ukulolela mpaka akabuuke. Lelo nalishiba ukuti nga mu mutekatima nashintilila pali Yehova no kutwalilila ukuba ne cishinka kuli ena, nkamonako uko umwana wandi akabuuka.
Icacindama ico Lucía Atushilile
Ukushipa kwa kwa Lucía e lyo no kutungilila kwa bamunyina mu cilonganino, fyafikile abalume bandi pa mutima pantu tabali Inte ya kwa Yehova. Ubushiku Lucía afwile, abalume bandi banjebele ukuti bafwile ukucitapo cimo. Ilyo papitile imilungu iinono, baipwishe eluda umo mu cilonganino ukuti alesambilila nabo Baibolo. Tapakokwele abalume bandi batampile ukusangwa ku kulongana konse. Yehova alibafwile ica kuti balilekele ukupeepa fwaka, ico bafililwe ukucita kale.
Nangu cingati na nomba ndomfwa ubulanda pa mfwa ya kwa Lucía, ndatasha sana kuli Yehova pa cintu cacindamisha ico Lucía atushiila. Ine na balume bandi tulakoseleshanya ilyo tulanda pe subilo lya kubuuka, ica kuti tulelenganya ifyo cikaba lintu tukamona Lucía na kabili, ukumona ali uwacincila, amenso yakwe ayabulungana, ne cinso cakwe ica nsansa.
Ifyo umwana wesu apitilemo, fyafikile umwina mupalamano umo pa mutima. Pa Cibelushi ulucelo ninshi ne mfula ileloka, umwanakashi umo uwakwete umwana umwaume uwalesambilila pa sukulu limo line na Lucía aishile pa ng’anda. Umwana wakwe na umbi umwaume uwali ne myaka 11 alifwile ku bulwele bumo bwine. Ilyo uyu mwanakashi aumfwile ifyo Lucía apitilemo, aipwishe uko twaleikala kabili alitutandalile. Alefwaya ukwishiba ifyo naleumfwa pa numa ya mfwa ya kwa Lucía kabili alandile ukuti tupange akabungwe pa kuti tulesansamusha abafyashi bambi abali no kulaponenwa no bwafya bumo bwine.
Naebele uyu mwanakashi ukuti nalisanga ubulayo ubwa mu Baibolo ubunsansamusha, ubu bulayo bulampeela icisansamushi ukucila pa fyo abantu bengacita. Ilyo nabelengele amashiwi yaba pali Yohane 5:28. 29, alitemenwe nga nshi. Alisumine ukusambilila Baibolo kabili tapakokwele atendeke ukuba “no mutende wa kwa Lesa uwacila amatontonkanyo yonse.” (Fil. 4:7) Ilingi line nga tulesambilila Baibolo, tulabala twaleka e lyo twalaelenganya tuli mu calo cipya, tulesengela abatemwikwa besu abalebuuka.
Nangu ca kuti Lucía afwile umwaice, kwena alitushila icintu icacindama sana ico tukatwalilila ukukwata ku ciyayaya. Icitetekelo cakwe calenga ulupwa lonse ukulabombela Lesa capamo kabili calenga mpingulepo ukutwalilila ukuba ne citetekelo icakosa. Ukwabula no kutwishika, ifwe bonse fwe bafwilwa balupwa abo twenekela ukubuuka, twalikwata icipangano icacindama nga nshi.
[Icikope pe bula 20]
Paradaise iyo Lucía alengele