Ifyo Tusambiilila Kuli Yesu

Pa Bufumu bwa kwa Lesa

Bushe Ubufumu bwa kwa Lesa Cinshi?

Ubufumu bwa kwa Lesa buteko ubukateka isonde lyonse. Yesu atile: “Mufwile ukupepa ifi amuti: . . . ‘Ubufumu bwenu bwise. Ukufwaya kwenu kucitwe pano isonde nga mu muulu.’”—Mateo 6:9, 10; Daniele 2:44.

Ni bani bakalateka mu Bufumu bwa kwa Lesa?

Ico Yesu afyalilwe, kuba Kateka mu Bufumu bwa kwa Lesa. Malaika aebele nyina wa kwa Yesu ukuti: “Yehova Lesa akamupeele cipuna ca Bufumu ica kwa Davidi Wishi, kabili akabe mfumu.” (Luka 1:30-33) E lyo kabili, Yesu alisalile abasambi bakwe bamo ukuteka nankwe. Aebele abatumwa bakwe ukuti: “Ni mwe mwe batwalilila na ine mu fya kunjesha; kabili ndepangana na imwe icipingo, ifyo na Tata apangana na ine icipingo ca Bufumu.” (Luka 22:28, 29; Daniele 7:27) Abasambi ba kwa Yesu abakateka nankwe, bonse pamo baba 144,000.—Ukusokolola 5:9, 10; 14:1.

Ni kwi Ubufumu bukabela?

Ubufumu bwa kwa Lesa bukalatekela ku muulu. Yesu aebele abasambi bakwe ukuti: “Nga naya no kumupekanisha apa kwikala [ku muulu], nkesa kabili, no kumupokelela ku mwandi, ukuti uko nkaba e ko na imwe mukabe. . . . Ndeya kuli Tata.”—Yohane 14:2, 3, 12; Daniele 7:13, 14.

Cinshi Ubufumu bwa kwa Lesa bukacitapo pa bubifi?

Yesu akafumya ababifi bonse pano calo. Umwine atile: “Ilyo Umwana wa muntu akesa mu bukata bwakwe, na bamalaika bonse pamo nankwe, e lyo akekala pa cipuna cakwe ica bufumu ica bukata. Ne nko shonse shikalonganikwa ku cinso cakwe, kabili akapaatukanya abantu. . . . Kabili aba [abashalungama] bakaya ku kuputulwa kwa muyayaya, lelo abalungama bakaya ku bumi bwa muyayaya.”—Mateo 25:31-34, 46.

Ni bani bakaba pe sonde abakalatekwa no bu Bufumu?

Yesu atile: “Ba nsansa abafuuka imitima, pantu bakapyana isonde.” (Mateo 5:5; Amalumbo 37:29; 72:8) Abakaba fye pe pano isonde, bantu abalesambilila ukutemwana na ino ine nshita. Yesu aebele abasambi bakwe ukuti: “Ndemupeele ifunde lipya, ilya kuti muletemwana; Ifyo namutemenwe, e fyo na imwe muletemwana. Muli ici e mo bonse bakeshibilo kuti muli basambi bandi, nga mwaba no kutemwana.”—Yohane 13:34, 35.

Cinshi Ubufumu bwa kwa Lesa bukacitila abantunse pano calo?

Yesu akaposha amalwele yonse aya bantunse. Ilyo aali pano calo, Yesu alelanda ku bantu abengi pa “bufumu bwa kwa Lesa, kabili aposeshe abalekabila ukundapwa.” (Luka 9:11) Ilyo umutumwa Yohane amwene icimonwa ca kwa Yesu wabuushiwe, atile: “Namwene umuulu upya ne sonde lipya . . . Naumfwile ishiwi likalamba ukufuma ku cipuna ca Bufumu lileti: ‘Moneni! Ihema lwa kwa Lesa lili pamo na bantunse . . . Kabili akafuuta ifilamba fyonse ku menso yabo, ne mfwa tayakabeko kabili iyo.’”—Ukusokolola 21:1-4.

Ubufumu bwa kwa Lesa bukabwesha Paradaise pe sonde. Ulya ncitatubi uo baipaile pamo na Yesu atile: “Mwe Yesu, mukanjibukishe ilyo mukengila mu bufumu bwenu.” Na Yesu amwebele ati: “Icine cine ndekweba lelo, Uli no kuba na ine mu Paradaise.”—Luka 23:42, 43; Esaya 11:4-9.

Nga mulefwaya ifyebo na fimbi pali ili lyashi, moneni icipandwa 8, mu citabo ca kuti: “Bushe Cinshi Baibolo Isambilisha?a

[Futunoti]