Ukufwaya Ifilubo Kwanengele Ukusambilila Icine

Abashimika ili lyashi ni ba R. Stuart Marshall

Umupatili wa lukuta lwa ba Jesuit anjebele ati: “Tatulanda ne Nte sha kwa Yehova. Balabomfya Baibolo.” Ifi anjebele fyalimpapwishe sana, pantu nalimulombele ukuti afweko umwina mwandi pa kumulanga ifilubo ifyaba mu fyo Inte sha kwa Yehova basambilisha. E ico natile nali no kusambilila Baibolo na ba Nte pa kuti nange umwina mwandi ifilubo fyabo.

PALI iyi nshita, ninshi ndi ne myaka 43, e lyo natampile ukufwaya ukulanga ukuti ifyo Inte sha kwa Yehova basambilisha fya bufi, ukubomfya fye ifyo naishibe e lyo ne fyo nasambilile pa fya mapepo. Amasukulu nasambililepo ukutula ku bwaice ukufika na ku koleji yonse yali ya baKatolika. Nangu ca kuti nalisambilile ifya bunonshi bwa calo mu 1969 no kusambilila pa mano ya bantunse e lyo na pa fya mapepo, muli fyonse ifi nasambilile pa masukulu ya baKatolika, tabalesambilishamo Baibolo.

Ilyo napwishishe ukusambilila ku koleji, naupile Patricia McGinn, uo twalepepa nankwe ku Katolika. Twalisambilile no kupoka amadigri pa Stanfold University. Umwana wesu, Stuart, afyelwe mu 1977, kabili twakuukile ku musumba wa Sacramento, mu citungu ca California, ku United States of America. Imyaka 23 iyakonkelepo, nalebomba pa maofeshi ya buteko aya mu California mu cipani ca Legislative Analyst’s Office (LAO), umo twalebebeta ukumona ifyo ubuteko bwalepanga ukubomfya indalama fyali no kukuma amasukulu. Nalebombesha kabili naleikala bwino. Nalitemenwe sana umwana wesu ilyo alekula. Umwina mwandi uo natemwa e walengafwa sana, kabili na ine nalemwafwa.

Icasuko pa Mutengo Uunono

Ilyo umwana wesu ali ne myaka ibili, Patricia apokele Baibolo ku Nte sha kwa Yehova no kutendeka ukusambilila Baibolo na bo. Ilyo papitile imyaka itatu alibatishiwe. Ine nalemona kwati Inte sha kwa Yehova tabaletontonkanya bwino pa kusefya inshiku sha mwikalwe e lyo no kubikwamo umulopa, lelo fimo ifyo balesambilisha pa fintu fimbi fyalemfika sana pa mutima. Icampapwishe ca kuti bushiku bumo, mu 1987, naebele abantu ifyo naleumfwa pa Nte sha kwa Yehova ilyo banjitile ku balolekesha pa masukulu ukuti ndeya nondolole ifyo natile kuti cawama bamonapo ukukuma ku masukulu.

Isukulu lya University of California lyalefwaya indalama pa kuti licimfyanye na ba mu fitungu fimbi pa kuti e bo bapeele umulimo umo apali no kupooswa indalama amadola amabilioni 6. Uyu mulimo wali wa kupanga cimashini icikalamba ica kubomfya mu fya sayansi. Ine natile te kuti ciwame ukupoosa indalama shafula ifi, pantu tacali no kwafwa ubuteko ukuya pa ntanshi. Aba pali ili isukulu baletele abaume babili abasambilila sana sayansi, abo bapeele ne filambu pa kubombesha kwabo, ukuti na bo balandepo pa kuti bashinine ukuti ifyo nalelanda fya bufi. Umo umo pali aba baume alondolwelele ifyo ici cimashini cali no kwafwa mu kusambilila ifya sayansi. Umo atile cali no kwafwa ukusanga ifyasuko pa fyo imyulu yapangilwe. Umbi atile cali no kwafwa ukwishiba ifyo ubumi pano calo bwatendeke.

Uwali ceyamani nomba ayalukile kuli ine.

Anjipwishe ati: “Bushe iwe uleti ukwishiba fyonse ifi takucindeme nga kulinganya ku madola amabilioni 6?”

Na-aswike ati: “Kwena ninjishiba ukuti ukwishiba ifi fyonse kwalicindama sana. Lelo, Inte sha kwa Yehova balesa pa mwandi pa Cibelushi ulucelo kabili balakwata amamagazini ayasuka ifi fipusho kabili aya amamagazini bashitisha fye pa ndalama ishinono. Nalimo ifyasuko bapeele pa ndalama fye ishinono fyaliwama ukucila ne fyasuko twingasanga nga twabomfya ici cimashini apengapooswa indalama ishingi nga nshi.”

Bonse abasangilweko balisekele sana, ukubikako fye na balya babili abasambilila sana sayansi. Nangu ca kuti balisumine ukuti bali no kufumya ishi ndalama pa kuti bapange ici cimashini, tapali nangu umo uwakeene ifyo nalandile.

Umuya inshiku, nasangile ukuti pali ubwafya bumo pa ng’anda ubo nalekabila ukubombelapo. Pa numa ya kulanshanya na Patricia pa myaka 6 pali Baibolo na pa Nte sha kwa Yehova, nshatemenwe ilyo anjebele ukuti alefwaya ukulabombesha sana mu mulimo wa kusambilisha abantu ifya mu Baibolo. Pa kuti acite ifi, alingile ukulabomba inshita fye inono pa universiti. Calinkalipe sana ukumona umuntu uwa mano asalapo ukucita ifi, kabili tapali nangu cimo ico nali no kulanda nangu ukucita icali no kumulenga ukwaluka.

Naipwishe umuntu umo uwaishibe sana Baibolo ukuncila, uo nalemona kwati kuti alanga umwina mwandi ubupusano bwaba pa fyo Baibolo isambilisha e lyo ne fisambilisha Inte sha kwa Yehova. Nga ca kuti alanga fye ukuti cimo ico basambilisha bufi, ninshi fyonse fyali no kutwishikwa. Ifi e fyo fye nali no kucita pa kuti nshinine umwina mwandi uwasambilile sana. Naile ku mupatili wa ku calici uko ine na Patricia twaleya kale. Pa kupwisha ukulanshanya kwesu, uyu mupatili alandile yalya mashiwi nshimike pa kutendeka. Ilyo umupatili akeene ukulanshanya no mwina mwandi, nalishibe ukuti nine nali no kusanga ifilubo no kulondolwela Patricia, nangu ca kuti ici kwena cali no kunsendelako inshita.

Ukufwailisha Ifilubo

Ilyo nalesambilila Baibolo ne Nte sha kwa Yehova, ico natemenwe sana kusesema kwa mu Baibolo. Mwi buuku kasesema Esaya alembele, nalibelengele pa kuwa kwa Babiloni, ukwalembelwe imyaka 200 ilyo kushilacitika, e lyo ne fyo aseseme ukuti Sailasi e wali no kucimfya e lyo no kulondolola ifyo ali no kwalula ukwaleya Umumana wa Yufrate pa kucimfya Babiloni. (Esaya 44:27–45:4) Imyaka imo ku numa, nalisambilile pa kuwa kwa Babiloni ku sukulu ilyo twalesambilila pa bashilika. Nasambilile no kuti kasesema Daniele alisobele pa mfumu ya maka iya ku Grisi iyo ubufumu bwa iko bwali no kwakanishiwa mu mabufumu yane ayashali no kukwata sana amaka ilyo yafwa, kabili asobele ifi imyaka 200 ilyo fishilacitika. (Daniele 8:21, 22) Nalibukishe ifi fyebo pali Alekisanda Mukalamba mu fyo twalesambilila pa lyashi lya kale ku sukulu. Nalifwaile ifyebo mu fitabo fimo kabili nasangile ukuti aya mabuuku ya mu Baibolo yalembelwe ilyo ifi fintu fishilacitika.

Ilyo nalesambilila ne Nte sha kwa Yehova, nalishininkishe ukuti Baibolo Cebo ca kwa Lesa. Nalifililwe ukusumina ici cishinka mu myaka yonse ilyo nalesambilila mu Katolika. Cinshi nali no kucitapo pali ifi naishibe? Napingwilepo ukuipeela kuli Yehova no kuba Inte yakwe. (Esaya 43:10) Nabatishiwe mu 1991, imyaka fye ibili pa numa ya kulanshanya na ulya mupatili. Umwana wesu abatishiwe umwaka wakonkelepo.

Nomba twalyalwile ne fyo twalefwaya ukucita mu lupwa lwesu. Cimo ico nacitile ilyo nabatishiwe kupekanya ukuti pa numa ya myaka isano umwina mwandi akaleke ukusambilisha pa universiti ilyo afisha imyaka 50. Alefwaya ukuba painiya, e kutila ukulabomba ama-awala 1,000 cila mwaka, nelyo ama-awala 83 cila mweshi, pa kuti aleafwa bambi ukusambilila ifyaba mu Baibolo. Mu 1994 alilekele ukubombako fimo ku ncito ica kuti atendeke na bupainiya. Cimo ico nalefwaya ukucita ukufuma fye pa kubala kulabomba bwino umulimo wa kushimikila, ukwafwilishako mu cilonganino, no kuitemenwa ukwafwako mu fya kupenda indalama mu makuule ya Mayanda ya Bufumu mu ncende twaleikala.

Pali inshita imo twalanshenye Baibolo pa ncito. Umo uwatendeke ukubombela ku LAO ali ni Nte lelo pali iyi nshita tali uwakosa mu kupepa. Ukutwishika Baibolo kwalengele icitetekelo cakwe ukunaka. Nalitemenwe sana ilyo namwafwile ukutendeka ukupepa na kabili. Alibwelelemo uko akuuliile no kutendeka bupainiya.

Mu 1995, nasangilwe ku kukumana kwaibela ukwa balolekesha pa masukulu pali fimo ifyo bafwailishe ilyo ubuteko bwabafwileko. Ceyamani aipwishe uwaleimininako ubuteko pa fyacitike kuli cilya cimashini balefwaya ukupanga. Atile bapeele aba ku Texas ukuti e bo bapange ici cimashini, lelo tabapwile pa milandu itatu. Uwa kubalilapo indalama shalekabilwa shalininine ukufuma pa madola amabilioni 6 ukufika pali 9 ninshi tabalatampa no kucipanga. Ica bubili, ubuteko bwalefwaya indalama ukubomfiwa kuli fimbi, sana sana ku nkondo ya mu 1991 iyali ku Iraq. Ica butatu, basangile ukuti kuti basanga ifyasuko ku mepusho ya fyo ubumi bwatendeke, ku Nte sha kwa Yehova pa ndalama fye ishinono! Cimoneka kwati abantu baile balelanda pali filya nalandile e lyo na kabili balefwaya ukulandapo.

Ilyo bonse basekele, bamo pa balolekesha pa masukulu balindoleshe. Naebele bonse abaliko ifyo caba nomba no kutila, “Nomba kuti mwasanga ifyasuko ukwabula ukulipila nga mwabelenga fye ifitabo fyesu.”

Ubumi Busuma Kabili Ubwa Nsansa

Ilyo umwina mwandi alekele incito, twatantike ifyo ine nali no kucita mu myaka isano iyali no kukonkapo. Nalipwisheko ifipani fimbi nga kuti ndebombako fye limo limo pantu nomba nalefwaya ukulapoosa inshita iikalamba ukwebako bambi ifya mu Baibolo. Nalipapile ilyo ba LAO banjebele ukuti kuti ndebombako ama-awala fye ayanono. E ico mu 1998, na ine natendeke bupainiya.

Bushiku bumo ulucelo ilyo ine no mwina mwandi twaleipekanya ukuya mu kushimikila, twapokelele foni ukufuma ku maofeshi ya Nte sha kwa Yehova mu Brooklyn, ku New York, mu United States of America. Abatumine foni banjipwishe nga kuti natemwa ukubombako umulimo umo ku Brooklyn. Nalisumine. Ici calengele ukuti tubombe pa maofeshi yakalamba aya ba Nte pa myeshi 18. Nasukile naleka incito bwangu pa kuti mpwishe uyu mulimo. Pa numa, twali-itemenwe ukubomba mu kukuula Icikuulwa ca Kulonganino ica Nte sha kwa Yehova, mu Fairfield, ku California. Twalishitishe ing’anda yesu mu Sacramento no kukuukila mu ng’anda iinono ku Palo Alto. Ukuleka bwangu incito kwalengele ukuti mpokelele amapaalo na yambi. Twalibombela mu maofeshi ya Nte sha kwa Yehova ku Nigeria, ku South Africa, ku Canada, ku Britain, na ku Germany.

Nomba ine no mwina mwandi twalikwata ishuko lya kwaafwa abantu abengi ukusambilila pali Baibolo, nga filya fyacitile ba Nte abatwafwile. Nalisumina ukufuma pa nshi ya mutima ukuti amasambililo Yehova asambilisha e yacindamisha pa masambililo yonse ayo nasambilila. Yalicila amasambililo yonse pa calo pantu balasambilisha ifyalekanalekana. Yehova alisambilisha Inte shakwe ukusambilisha icine ca mu Baibolo mu nshila iya kuti umuntu aumfwa, camufika na pa mutima. Ici e cinenga ukutwalilila ukulasambilila. Ine no mwina mwandi tulatasha sana pa bumi twakwata ino nshita na pe shuko lya kubomfya ifyo twasambilila mu kubombela Yehova Lesa, Kateka mukalamba.

[Amashiwi pe bula 27]

Ilyo nalesambilila Baibolo na ba Nte, ico natemenwe sana kusesema kwaba mu Baibolo

[Icikope pe bula 27]

Ine na Patricia pa bwinga bwesu

[Icikope pe bula 29]

Tulomfwa bwino ukwafwako bambi ukusambilila icine ca mu Baibolo