Bushe Lesa Alishiba Ifyo Twaba ne fyo Tumfwa?

IFYO TUSAMBILILA KU FYO LESA ABUMBA

Tontonkanyeni pa fyo ciba kuli bampundu abapalana. Balatemwana sana kabili baleshibana bwino. Ba Nancy Segal ni bampundu, kabili e bakalamba mu kabungwe ka Twin Studies Center. Balandile ukuti: Bampundu bamo “baleshiba ifyo umunankwe alelandapo nangu talondolwele bwino.” Umwanakashi umo alandile pa fyo aleumfwana na mpundu munankwe ukuti: “Twalishibana bwino sana.”

Cinshi cilenga baleishibana bwino ifi? Abafwailisha pa fintu balanda ukuti nangu ca kuti ifyo abafyashi babakusha ne fyo uko bakulila kwaba filalenga baleishibana bwino, icikalamba icilenga baleishibana bwino ni co ifyo imibili yabo yaba ne fyo ibomba filapalana sana.

TONTONKANYENI PALI ICI: Kabumba wesu uwabumbile imibili yesu muli iyi nshila alitwishiba bwino sana. Ici e calengele Davidi uwalembeleko Amalumbo ukulemba ukuti: “Mwancingilile mu nda muli mayo. Amafupa yandi tayafishilwe kuli imwe ilyo nalepangwa umwafisama. . . . Ilyo fye nalepangwa amenso yenu yalimwene, Kabili mwi buuku lyenu mwalembelwe ifilundwa fyandi fyonse.” (Amalumbo 139:13, 15, 16) Ni Lesa fye e waishiba bwino ifyo twapangwa e lyo ne fyalenga tube ifyo twaba. Ifi Lesa atwishiba bwino filalenga twashininkisha ukuti aleshiba bwino ifyo tumfwa.

IFYO BAIBOLO ILANDA PA FYO LESA ATWISHIBA BWINO

Davidi alembele ukuti: “Mwe Yehova, mwafwayafwaya muli ine, kabili mwalinjishiba. Imwe mwaishiba ukwikala kwandi no kwima kwandi. Mwaishiba amatontonkanyo yandi nangu mwaba ukutali. Ilyo ishiwi talilaisa pa lulimi lwandi, Moneni, mwe Yehova, ninshi namwishiba kale.” (Amalumbo 139:1, 2, 4) Na kabili Yehova aleshiba bwino ifyo tumfwa kabili “aleluka na matontonkanyo yonse.” (1 Imilandu 28:9; 1 Samwele 16:6, 7) Finshi aya amalembo yatusambilisha pali Lesa?

Nangu ca kuti ilyo tulepepa tatulandile fyonse ifyo tulefwaya ukulanda ne fyo tuleumfwa, Lesa alafishiba kabili aleshiba ne cilengele tuleumfwa ifyo. Na kabili aleshiba ne fisuma ifyo twingatemwa ukulacita, nangu ca kuti kuli ifilelenga tulefilwa ukucita ifyo. Kanshi apo Lesa e walenga tuleba no kutemwa, alafwaisha ukumona ifyo tufwaya ukulanga ukutemwa.—1 Yohane 4:7-10.

Ifyo Baibolo ilanda

• “Amenso ya kwa Yehova yaba pa balungama, na matwi yakwe yomfwa ukupapaata kwabo.”—1 PETRO 3:12.

• Lesa atulaya ukuti: “Nkakucenjesha no kukusambilisha inshila iyo ufwile ukuyamo. Nkakupanda amano ninshi na menso yandi yali pali iwe.”—AMALUMBO 32:8.

LESA ALIBA SANA NO LUSE KABILI WA CIKUUKU

Bushe ukwishiba ukuti Lesa aleshiba bwino ifyo tulepitamo ne fyo tumfwa, kuti kwatwafwa nga tuli na mafya? Natulande pa fyacitikiile ba Anna aba ku Nigeria. Balandile ukuti: “Amafya nakwete yalengele ndemona kwati ubumi tabwacindama. Abena mwandi bafwile ninshi umwana wesu balimuteka mu cipatala pa mulandu no kulwala ubulwele ubulenga amenshi ukufula kuli bongobongo, kabili pali iyi ine nshita balinsangile na kansa ya kwi bele. E ico balindepwile, balempeela imiti iikali icine cine e lyo balempisha na muli fimashini fya myengelele pa kuti bangundape. Naleumfwa sana ububi pa kuba mu cipatala e lyo ninshi no mwana wandi alilwala kabili na o balimuteka.”

Cinshi cayafwile ba Anna ukushipikisha? Balandile ukuti: “Naletontonkanya sana pa mashiwi yaba pa Abena Filipi 4:6, 7 apalanda ukuti ‘umutende wa kwa Lesa uwacila amatontonkanyo yonse ukalinda imitima yenu na matontonkanyo yenu.’ Lyonse ilyo naletontonkanya pa fyo ili ilembo lilanda, nalemona ukuti Yehova alintemwa, pantu aleshiba ifyo ng’umfwa ne fyo mpitamo ukucila fye ne fyo ne mwine nayishiba. Na kabili Abena Kristu abo nongana nabo balenkoselesha sana.”

Balandile no kuti: “Nangu ca kuti ncili ndalwala, pali ino nshita, ine no mwana wandi tulomfwako bwino. Apo Yehova alatwafwa, tatumfwa sana ububi pa fyabipa ifitucitikila. Baibolo pali Yakobo 5:11 itila: ‘Tuletila balipaalwa abashipikisha amacushi. Mwalyumfwa ukushipikisha kwa kwa Yobo kabili mwalishiba ne fyo Yehova acitile pa kulekelesha, icilanga ukuti Yehova wa nkumbu nga nshi kabili wa luse.’” Yehova alishibe bwino ifyo Yobo alepitamo kabili aleshiba bwino ifyo na ifwe tupitamo.