Afwilisha Programu wa Kulongana kwa Cintubwingi uwa Cilonganino Cobe mu Kukumanina

¹ Imyaka imo iyapitapo umulumendo asangile handibilu iyalesabankanya ukulongana kwa cilonganino ca cikaya. Apantu alefwaya icine, apingwilepo ukusangwa ku Kulongana kwa Cintubwingi bulya bwine bushiku bwa pa Mulungu, ukufika pa Ŋanda ya Bufumu mu kubangilila. Kasabankanya alimuposeshe mu cikabilila kabili, mu kati ka kulanshanya, amutambike isambililo lya Baibolo, ilyo akeene. Nangu cibe fyo, alyebekeshiwe nga nshi ku lyashi lya cintubwingi ilyapekanishiwe bwino ica kuti ayalwile itontonkanyo lyakwe, kabili pa numa ya kulongana apokelele isambililo. Uyu mulumendo acitile ukulunduluka kwayangufyanya kabili alibatishiwe imyeshi yafulilako pa numa. Kuti twasambililako amasambililo ya kwaafwa mupepi na yatatu ukufuma kuli ici ca kukumanya.

² Ilya kubalilapo, Ukulongana kwa Cintubwingi kwalisabankanishiwe. Ilyo ceyamani alebilisha umutwe we lyashi lya cintubwingi ilili no kupeelwa umulungu ukonkelepo, tontonkanya pa lwa abo mu cifulo cobe ica kubombelamo abengaba abasekelela ukucilisha mu fikalandwapo, nampo nga pali ino nshita balebelenga impapulo shesu nelyo iyo. Bambi abantu tabatemwa ukubelenga, nelyo babelenga mu kuba no bwafya bukalamba, lelo kuti pambi baba abaitemenwa ukukutika ku lyashi pa mutwe wa mu Malembo.

³ Ilya bubili, uyu mupya alipokelelwe mu cikabilila. Nga ca kuti watantika ukufika ku Ŋanda ya Bufumu mu kubangilila ukufika pantu wingapesha, kuti waposha bamunonko ne nkashi pamo pene na balesekelela abali bonse. (Heb. 10:24) Nga ca kuti umupya alesangwako pa muku wa kubalilapo, te kuti pambi eshibe ica kwenekela. Mulondolwele ukuti ukulongana kwesu kutendeka no lwimbo ne pepo, kabili mwebe ifyo ukulongana kwalatungululwa. Nga cingaba icalinga, mulaalike ukwikala nobe pa kuti mwingabomfya bonse Baibolo ne citabo ca lwimbo. Mulaalike ukulanshanya nobe ifipusho ifili fyonse pambi engakwata lintu ukulongana kwasondwelela.

⁴ Ilya butatu, ilyashi lyalipekanishiwe bwino. Abo abapeelwa amashuko ya kwimininako icilonganino nga bakalanda ba pa cintubwingi bapoosa amaawala ayengi ukupekanya no kupituluka mu fyebo pa kuti ibumba lingacincimushiwa ku kutemwa kwakulilako no kubombe milimo isuma. Ifwe bonse twaba pe samba lya kutitikisha ilelo, kabili icine ca kupembesula ukufuma mu Cebo ca kwa Lesa e cintu fye tukabila ku kutwaafwa ukushipikisha. Kwena, te mulandu na fintu ilyashi lya cintubwingi lingesulamo ukufunda, kuti lyaba lya bucindami bunono kuli ifwe nga ca kuti tatupeepekeko ku cilelandwa. Bushe mu nshita mu nshita ulakwata ubwafya bwa kukutikisha mu kati ke lyashi? Kuti pambi caba ica kwaafwa ukulalemba ifyebo ifipi, kwati fye fintu tucita ilingi line pa mabungano yesu. Shininkisha ukukonkamo muli Baibolo yobe ilyo Ilembo limo na limo lilebelengwa no kulondololwa.

⁵ Sosaite yalipayanya amalyashi ya cintubwingi pa mitwe ya mu Malembo iyalekanalekana. Ukubombela pamo na kangalila wa kutangilila nelyo munyina uwalaashikwa na wene, ibumba lya baeluda lyampanya programu wa cilonganino uwa Kulongana kwa Cintubwingi. Imitwe yatantikwa na Sosaite yalisoobolwa ku kulanda pa kukabila kwa cikaya ukwa ndakai. Wipusa ifi fyebo fyakatama ifili fyonse, kabili afwilisha mu kukumanina Ukulongana kwa Cintubwingi ukwa cila mulungu ukwa cilonganino cobe.