Lundulula Ubuseko mu Bufumu bwa kwa Lesa Ubwa Mutende
1 Mu mweshi wa February, tukalatambika icitabo ca Kuti Waikala Kuli Pe na pe muli Paradise Pe Sonde. Ubuyo bwesu bulingile ukuba bwa kwaafwa abantu ba mitima ya bufumacumi ukulundulula ukutesekesha Ubufumu bwa kwa Lesa na cintu bukapwishishisha. Ifipusho fya kufwailisha imimwene kuti fyatwaafwa ukufika kuli ubu buyo.
2 Pa numa ya kuposha kwa bucibusa, limbi kuti twasosa icapale ci:
◼ “Ukwaluka kwa kusungusha mu makamfulumende kulecitika mu kusaalala kwe sonde, kabili ubuyo bwa mutende bulelumbulwa ilingi line. Bushe muleyumfwa ukuti umutende wa cine ukatala aunonkwa? [Leka alandepo.] Nangu ca kuti abengi mu kubamo isubilo balolesha kuli bakateka ba buntunse ku kuletako umutende, moneni ifyo Lesa alaya ukuleta umutende nga fintu calondololwa pe Ilumbo 46:9. [Belenga.] Kwaluka nshi pe sonde uko muletontonkanya incitilo ya kwa Lesa ikaleta? [Kutika ku kwankulako kwa kwa mwine ŋanda, kabili lyene langisha trakiti wa Ubumi mu Calo Cipya Ica Mutende.] Bushe kuti mwaelenganya icili pali ici cikope?” Languluka ifyebo pe samba lya kamutwe kanono “Ubumi mu Calo Cipya ica kwa Lesa.” Nga ca kuti imibele yasuminisha, ifyebo fyalundwapo ukufuma mu citabo ca Ukupelulula, amabula 258-62, pe samba lya cipusho “Cinshi cintu Ubufumu bwa kwa Lesa bukapwishishisha?,” kuti fyalangulukwapo. Kuti twasondwelela ukulanshanya pa kwipusho kuti: “Bushe muletontonkanya ukuti kamfulumende ya kwa Lesa kuti yaletako uku kwaluka?” Ba uwashininkisha ukucita ukutantika kwa cipempu ca kubwelelamo.
3 Nelyo kuti pambi twatila:
◼ “Ukusakamikwa ukwingi kulalumbululwa pa lwa mpika sha kufulunganya isho ifwe bonse tuli no kubomba na sho cila bushiku. Bushe muleyumfwa ukuti kuliko isubilo ilili lyonse ilya kwilulukwa ukufuma kuli ishi mpika? [Leka alandepo.] Bamo kuti pambi bayumfwo kuti Lesa tayangwako ku kalanda kesu. Moneni, nangula ni fyo, cintu alaya pa Ukusokolola 21:3, 4.” Belenga ifikomo. Pali ino nshita kuti pambi watambika icitabo ca Ikala Kuli Pe na pe, magazini wa nomba line, nelyo trakiti wa Bushe ici Calo Cikapusunsuka? Nga ca kuti trakiti atambikwa, kuti mwalanguluka ifyebo pa mabula 2 na 3 pe samba lya mutwe “Inshita ya ku Ntanshi iya ici Calo.” Nga ca kuti ubuseko bwalangwa, kuti pambi wapingulapo ulupapulo lumbi ulwa kutambika. Nga ca kuti watambika broshuwa wa Bushe Lesa mu Cituntulu Alatusakamana?, icipusho kuti caipushiwa ica kuti: “Mulandu nshi Lesa asuminishisha ukucula?” Alwila ukusakamana ku lubali 6 muli broshuwa, kabili tantika ukulanshanyapo pa kutandala kuli no kukonkapo.
4 Kuti pambi wasalapo ukulangisha icipande ukufuma muli imo iya bamagazini ba nomba line pa kulandapo pa cishinka cimo ica kulungatika mu cipande usobwele.
Nga ca kuti mwine ŋanda alumbulula ubuseko, langisha magazini, nakalimo pa kusoso kuti:
◼ “Ici cipande cilalonsha uyu mutwe. [Belenga sentensi umo nelyo babili abasalilwe kabela.] Icipande cilepayanya amatontonkanyo yalundwapo ayakashininkisha ukuba aya kukoselesha kuli imwe no lupwa lwenu. Apantu mulemoneka ukuba abasekelela pa fintu tulelanshanyapo, kuti twatemwa ukumushila uyu magazini no unankwe.” Lyene lumbula umusangulo wa bamagazini.
5 Abantu ilelo ilingi line balafulunganishiwa lintu caisa ku kwishiba ukwa kwalukila ku fyasuko ku mpika shilolenkene no mutundu wa muntu. Twalikwata ishuko lya kwakana na bene isubilo lyalengama ilya nshita ya ku ntanshi. (Imil. 17:27) Shi lyene, mu kuswatuka natutungulule ukusakamana kwa bantu ku Bufumu bwa kwa Lesa, intulo ya cine iya mutende.