Balamuneni Ukukula Ukupitila mu Fipempu fya Kubwelelamo Fyabamo Ubupilibulo
1 Ku kwaafwa abo abalangisha ubuseko, caliba icakatama ukuti tutwalilile ukubapayanishisha ukukonkoloka kwa fya kulya fya ku mupashi ukupitila mu fipempu fya kubwelelamo ifya lyonse. Ukutandala kwesu mu kulundulukilako kukaafwa ukubalamuna ukukula kwabo ukwa ku mupashi. (1 Kor. 3:6-9) Pa kuti ukutandala kwesu kubemo ubupilibulo, nangu ni fyo, caliba icakabilwa ukuti tupekanishishe libela, ukukwata uyo muntu mu muntontonkanya.
2 Ukubwelela Kuli abo Twashilile Trakiti: Nakalimo trakiti wa Ubumi mu Calo Cipya Ica Mutende yalishalikwe pa kutandala kwa kubalilapo.
Pa numa ya kupituluka mu kwipifya mu fyalanshanishiwe, kuti pambi twaipusha icapale ci:
◼ “Ni kamfulumende nshi ingaletako uku kwaluka? [Leka alandepo.] Ukwabulo kutwishika ne mwe bene kuti mwaipakisha ukwikala mu mibele iyapale yi. Ni shani fintu pa lwesu twingaipakisha imibele ya musango yo?” Lyene kuti mwalanguluka ifyebo pe samba lya kamutwe kanono akaleti “Ifyo Cingacitikako Kuli Iwe.” Kuti mwaalwila ukusakamana ku citabo ca Ikala Kuli Pe na pe, icipandwa 15, “Ukusanguko Mutekwa wa Kamfulumende wa kwa Lesa.” Kuti pambi twalanshanya amaparagrafu ya kubalilapo yabili kabili lyene ukwipusha icipusho: “Ni shani fintu ukusambilila pa lwa kwa Lesa kulingile ukutwambukila?” Ukutantika kuti pambi kwacitwa ku kwasuka ici cipusho no kulanshanya ifyafulilako ifya ici cipandwa pa kutandala kuli no kukonkapo.
3 Lintu twabwelela kuli abo twashilile broshuwa wa “Bushe Lesa mu Cituntulu Alatusakamana?,” kuti pambi twatila:
◼ “Umuku wafumako lintu natandele, twalanshenye impika ishingi ishilolenkene no mutundu wa muntu na fintu Lesa alaya ukucita pa lwa shene. Mulandu nshi, nangula ni fyo, Lesa asuminishisha ukucula pa nshita yalepe fi? Icasuko ca kulengo buseko cisangwa mu lubali 6 ulwa broshuwa twalanshenyepo.” Ipusha mwine ŋanda ukubuula kope wakwe nga cingacitika. Pa numa ya kulanguluka amaparagrafu yanono, kuti pambi twaipusha ukuti: “Cinshi tulekabila ukucita pa kunonkelamo mu malayo ya kwa Lesa?” Kuti pambi mwakomaila pa fyebo pe samba lya lubali 11, “Icitendekelo ca Calo Cipya Nomba Cilepangwa,” pa mabula 28-31, ku kwisalanshanyapo pa kutandala kuli no kukonkapo.
4 Ukubwelela Kuli abo Twashilile Bamagazini: Nga ca kuti wasobwele icipande cimo icasekeshe mwine ŋanda, lundulula ifishinka fyalundwapo ukufuma mu cipande lintu wabwelelako, ukutonta ukulandapo kobe pe lembo limo ilya mpikwe ne fyebo filelanda pali lyene. Nga ca kuti kuli ubuseko bwatwalilila, ubunonshi bwa bamagazini kuti bwalanshanishiwapo. Na kabili, ukusakamana kuti kwayalwilwa kuli magazini uukafumo ukakonkapo nga ca kuti ukwetemo icipande icilelanda pa mutwe umo wine. Nga te ifyo, kuti twayalwila ukusakamana ku fyebo mu citabo ca Ikala Kuli Pe na pe pali uyo mutwe no kucita ukutantika ku kulanshanya wene pa kutandala kwesu ukuli no kukonkapo.
5 Ukulangisha kwesu ubuseko bwa pa lwesu mu kukonkeshapo mu kuba ne fipempu fya kubwelelamo ifyabamo ubupilibulo kukalangisha ukutemwa kwesu ukwa bantu no kwa kuli Yehova. (Yoh. 13:34, 35) Shi natutwalilile ukubalamuna ukukula kwa ku mupashi ukwa abo ababa mu cifulo cesu ica kubombelamo ukupitila mu kucita ifipempu fya kubwelelamo ifyabamo ubupilibulo.