Umukululo Wa Fipusho

◼ Mulandu nshi tulekabila ukupoosa sana amano ku fyo tufwala na ku kupempenkana ilyo tuletandalila ifikuulwa fya Sosaite mu Brooklyn, Patterson, na Wallkill, New York, na maofesi ya Sosaite mwi sonde lyonse?

Abena Kristu balekabila ukumoneka abapempenkana. Lyonse imifwalile yesu no kupempenkana fifwile ukulangisha ukuti twaliba no mucinshi uo ababomfi ba kwa Yehova Lesa bafwile ukukwata. Cifwile ukucilamo maka maka ilyo tuletandalila amaofesi ya Sosaite mu New York na ya mu fyalo fimbi.

Mu 1998, kukaba amabungano ya citungu na ya pa kati ka nko. Amakana ya bamunyinefwe ukufuma ku fyalo ifingi bakatandalila amaofesi yakalamba aya Sosaite ku New York pamo na maofesi mu fyalo fimbi. Ilyo tuletandalila aya maofesi, pali iyi nshita e lyo na pa nshita iili yonse imbi, tulekabila ukuba “abaishininkisha nga bakapyunga wa kwa Lesa muli fyonse,” ukusanshako ne mifwalile ya mucinshi no kupempenkana.—2 Kor. 6:3, 4.

Mu kulanda pa bucindami bwa mifwalile no kupempenkana, icitabo ca Abateyanishiwa ku Kupwilikisha Ubutumikishi Bwesu cilanda pa lwa bucindami bwa busaka bwa ku mubili, imifwalile ya mucinshi no kupempenkana kusuma ilyo tuli mu butumikishi bwa mwi bala na lintu tuli ku kulongana kwa Bwina Kristu. Lyene pe bula 131, paragrafu 2, citila: “Cimo cine cingabomba lintu tuletandalila ing’anda ya [Bethel] ku Brooklyn nelyo amaofesi ya misambo ya Sosaite. Ibukisha, ishina [Bethel] lipilibula ‘Ing’anda ya kwa Lesa’ e co ukufwala kwesu, ubusaka ne myendele fifwile ukupala ku cilecetekelwa ulwa ifwe lintu tulesangwa ku kulongana kwa kupepa ku Ng’anda ya Bufumu.” Icipimo ca pa muulu cimo cine e co na bakasabankanya ba Bufumu bafwile ukukwata aba mupepi na bafumine ukutali ku kwisamona no kubishanya na baba mu lupwa lwa Bethel na ku kutandala pa maofesi.

Imifwalile yesu ifwile ukulenga bambi ukumona bwino ukupepa kwa cine ukwa kwa Yehova. Nangu cibe fyo, calimonwa ukuti lintu baletandalila amaofesi ya Sosaite, bamo bamunyina na bankashi balafwala ifishabamo sana umucinshi. Ifya kufwala fya musango yu tafyalinga lintu tuletandalila amayanda ya Bethel. Muli ulu lubali, nga fintu caba mu mbali shonse shimbi isha bumi bwa Bwina Kristu, tufwaya ukusungilila icipimo cimo cine ica pa muulu icipusanya abantu ba kwa Lesa ku ba ku calo ukupitila mu kucitila fyonse ku kucindika Lesa. (Rom. 12:2; 1 Kor. 10:31) Na kabili caliwama ukulanshanya na basambi besu aba Baibolo na bambi abengalatandalila Bethel umuku wa kubalilapo no kubacinkulako pa lwa bucindami bwa kupoosa amano ku mifwalile no kupempenkana.

E co lintu muletandalila amaofesi ya Sosaite, ipusheni mwe bene ukuti: ‘Bushe imifwalile yandi no kupempenkana fya mucinshi?’ (Linganyeniko Mika 6:8.)‘Bushe filalangisha bwino Lesa mpepa? Bushe bambi kuti bakalifiwa nelyo ukupunwishiwa pa mimonekele yandi? Bushe ndeimika ica kumwenako cisuma kuli bambi abaletandala umuku wa kubalilapo?’ Shi lyonse ‘natupulamike isambilisho lya kwa Lesa Umupusushi wesu muli fyonse’ ukupitila mu mifwalile yesu no kupempenkana.—Tito 2:10.