Umukululo wa Fipusho

◼ Bushe icilonganino cilingile ukubika mapu onse uwa cifulo ca kubombelamo mu Ng’anda ya Bufumu?

Ee, mapu onse uwa cifulo ca kubombelamo alingile ukuba mu cimpangilile no kubikwa pa cibumba mu Ng’anda ya Bufumu. Mapu talingile ukubikwa apo bakambatika ifyebo. Alingile ukulangilila umwapelela icifulo icilonganino cibombelamo no mwapelela icifulo umuntu umo umo abombela pamo ne nambala ya ico cifulo. Umwapelela ififulo fibombelamo ifilonganino fimbi ifibomfya Ing’anda ya Bufumu imo iine mulingile ukulangililwa. Ici cikafwa bakasabankanya na balefwaya ukusambilila icine ukumona mu cifulo umubombela icilonganino bekala. Ukulangilila ukubela Amasambililo ya Citabo pa Cilonganino pali mapu na ko kwine kukafwa bonse ukwishiba isambililo lya citabo balingile ukuyako. Mapu alingile ukuba uwa ndakai lyonse.

Ukulangilila mapu wa musango yu kucinkulako bakasabankanya bonse ukuti, nga cingacitika, kuti cawama ukuikwatila icifulo ca kubombelamo. Mapu alafwa balya abalefwaya ukusala icifulo ca kubombelamo mupepi na ku mwabo. Inshita shimo mapu kuti alenga ukuti tamupoosele inshita ikalamba pa kukumana kwa kuya mwi bala, ukulenga katungulula ukweba bwangu bwangu ibumba limo limo ilya bakasabankanya ukuya ku cifulo bapeelwa kale ica kubombelamo.

Uyu mapu na kabili alangilila ukuti icilonganino caliteyanishiwa ukushimikisha ubukombe bwa Bufumu mu cifulo capeelwa ukubombelamo.—Luka 9:6.