Bushe Icebo ca kwa Lesa Cilamwafwa mu fyo Mucita Cila Bushiku?

Nga tulebelenga Baibolo cila bushiku kuti twaba “abalimbwa” kabili ‘abakuulwa ne citetekelo icakosa.’ (Kol. 2:6, 7) Na lyo line, pa kuti Icebo ca kwa Yehova ciletwafwa ukwaluka mu bumi bwesu, tufwile ukulacitontonkanyapo no kulabomfya amashiwi ya kwa Lesa ayakututungulula ayabamo. (Heb. 4:12; Yako. 1:22-25) Baibolo pali Yoshua 1:8 ilanda pa fintu fitatu ifyo tufwile ukulacita: (1) Ukulabelenga Icebo ca kwa Lesa “akasuba no bushiku.” (2) Nga tulebelenga tufwile “ukwetetulapo,” ici calola mu kuti ilyo tulebelenga Baibolo tufwile ukulabelenga ica kuti tulekwata ne nshita ya kutontonkanyapo no kwelenganya ifyo ifyalembwamo fyalecitika ne fyo caleba. (3) Tufwile “ukulakonka fyonse ifyalembwamo.” Nga tulecita ifi batweba, e lyo fye ‘tukatunguluka kabili ‘tukaba aba mano.’