Bushe Namuipekanya Ukuipeela Kuli Yehova?

1-2. Cinshi ico umuntu afwile ukucita ilyo ashilabatishiwa?

PA MYAKA 5 iyapitapo, abantu ukucila pali 1 milioni balibatishiwa pa kuti babe Inte sha kwa Yehova. Abengi pali aba basambilile icine “ukufuma ku bunya,” nga filya cali ku musambi Timote uwaliko mu nshita ya batumwa. (2 Tim. 3:​14, 15) Bambi basambilile icine pali Yehova ninshi bakalamba, bamo ninshi bakote. Tapalapita sana inshita ukutula apo umwanakashi uwalesambilila Baibo ne Nte sha kwa Yehova abatishiwilwe ninshi ali ne myaka 97.

² Nga ca kuti mulasambilila Baibo nelyo mwikala na bafyashi Inte sha kwa Yehova, bushe mulatontonkanya pa kubatishiwa? Nga mulatontonkanyapo ninshi mulatontonkanya pa cintu icisuma! Ilyo mushilabatishiwa, mufwile ukuipeela kuli Yehova. Cino cipande calalondolola umo ukuipeela kuli Yehova kwalola. Calalondolola na pa co mushilingile ukutiinina ukuipeela no kubatishiwa nga ca kuti namuipekanya.

BUSHE UKUIPEELA E KUCITA CINSHI?

3. Bantu nshi bamo abo Baibo yalandapo abaipeele kuli Yehova?

³ Baibo nga yalanda pa muntu uwaipeela ninshi ilelanda pa muntu uo basalile pa kuti abombe umulimo wa mushilo. Abena Israele bali luko ulwaipeele kuli Yehova. Lelo abantu bamo muli ulu luko baipeele kuli Yehova mu nshila iyaibela. Ku ca kumwenako, Aarone alefwala “icishibilo ca mushilo ica kuipeela.” Ici “icishibilo ca mushilo ica kuipeela” cali kapaapaatu aka golde akabeeka ako alefwala pa ntanshi ya nsalu iyo alepomba ku mutwe. Aka akapaapaatu aka golde kalelangilila ukuti Aarone balimupaatwileko pa kuti alebomba umulimo uwaibela, e kuti ukuba shimapepo mukalamba uwa luko lwa Israele. (Lebi 8:9) AbaNasiri nabo bali-ipeele kuli Yehova mu nshila iyaibela. Ishiwi lya kuti umuNasiri lyafuma kwi shiwi lya ciHebere ilya kuti nazir ilipilibula ukuti “Uo Bapaatulako,” nelyo “Uwaipeela.” AbaNasiri balingile ukulakonka ifyo babebele mu Mafunde ya kwa Mose.—Impe. 6:​2-8.

4. (a) Finshi ifyaibela ifyo mukalacita nga mwaipeela kuli Yehova? (b) Bushe calola mwi “ukuikaana”? (Moneni ne cikope.)

⁴ Nga mwaipeela kuli Yehova, ninshi mwasalapo ukuba umusambi wa kwa Yesu Kristu kabili ninshi mwasalapo ukulamona ukuti ukulacita ifyo Lesa afwaya e cintu icacindamisha. Bushe nga mwaipeela pa kuti mube Umwina Kristu, finshi mufwile ukulacita? Yesu atile: “Umuntu nga alefwaya ukunkonka, aikaane umwine.” (Mat. 16:24) Amashiwi ya ciGriki ayo bapilibula ukuti “aikaane umwine,” kuti bayapilibula no kuti “tafwile ukulacita fye ifyo alefwaya umwine.” Apo muli babomfi ba kwa Yehova abaipeela, tamufwile ukulacita nangu fimo ifingalenga akalipa. (2 Kor. 5:​14, 15) Ici cilepilibula ukuti tamufwile ukulacita “imicitile ya muntu umubembu,” pamo ngo kulacita ubulalelale. (Gal. 5:​19-21; 1 Kor. 6:18) Bushe nga mulekonka aya amafunde ninshi tamwakulakwata ubuntungwa? Awe, mwakulakwata ubuntungwa nga ca kuti mwalitemwa Yehova kabili mwalishininkisha ukuti nga mulekonka amafunde yakwe ifintu fyakulamuwamina. (Amalu. 119:97; Esa. 48:​17, 18) Munyinefwe Nicholas alandile ati: “Nga mulefwaya kuti mwalamona amafunde ya kwa Yehova nge cifungo icicilikila umuntu ukucita ifyo alefwaya, nelyo ngo lubao ulo bapangila ne nshimbi ulucingilila umuntu ku nkalamo.”

5. (a) Finshi mufwile ukucita pa kuipeela kuli Yehova? (b) Bupusano nshi bwaba pa kuipeela na pa kubatishiwa? (Moneni ne cikope.)

⁵ Finshi mufwile ukucita pa kuipeela kuli Yehova? Mufwile ukupepa no kumulaya ukuti e o mwakulapepa fye eka, no kuti ifyo afwaya e fyo mukacindamika sana. Nga mwacita ifi ninshi mwalaya Yehova ukuti mukatwalilila ukumutemwa “no mutima wenu onse, no mweo wenu onse, no kutontonkanya kwenu konse, na maka yenu yonse.” (Marko 12:30) Pa kuipeela kuli Yehova mufwile ukuba fye mweka. Lelo ukubatishiwa kwena ni pa cintubwingi, kabili cilenga abalipo baishiba ukuti mwali-ipeela. Ukuipeela kuli Yehova mulapo uwacindama sana. Ico mufwile ukubikako sana amano, kusunga uyu mulapo kabili Yehova na o amwenekela ukulasunga uyu mulapo.—Luk. Mil. 5:​4, 5.

CINSHI MULINGILE UKUIPEELELA KULI YEHOVA?

6. Cinshi cilenga umuntu aipeela kuli Yehova?

⁶ Icikalamba ico mulingile ukuipeelela kuli Yehova ni co mwalimutemwa. Ifyo mumfwa te fyalenga fye mutemwe Yehova. Lelo icalenga mumutemwe ni co mwalimwishiba bwino kabili ‘muleluka ifyo umupashi wakwe upeela,’ e kutila ifyo mwasambilila pali Yehova ifilenga mulemutemenwako. (Kol. 1:9) Apo mulasambilila Amalembo, mwalishininkisha ukuti (1) Yehova wa cine cine, (2) ukuti Baibo Cebo cakwe, na (3) ukuti abomfya icilonganino cakwe pa kucita ifyo afwaya.

7. Finshi tulingile ukulacita ilyo tushilaipeela kuli Lesa?

⁷ Abaipeela kuli Yehova balingile ukwishiba amasambililo ya kubalilapo ayaba mu Cebo ca kwa Lesa, kabili balingile ukulakonka amafunde yakwe. Balebako abantu ifyo basambilila ukufika apengapela amaka yabo. (Mat. 28:​19, 20) Balitemenwako Yehova kabili ico bafwaisha kulamupepa fye eka. Bushe ifi te fyo na imwe mwaba? Nga mwalitemwa Yehova no mutima wenu onse, tamwakaipeele no kubatishiwa pa mulandu fye wa kuti mulefwaya ukusekesha abamusambilisha Baibo nelyo abafyashi benu, nelyo pa mulandu fye wa kuti e fyo abanenu bonse balecita.

8. Bushe ukutasha kulenga shani mwasalapo ukuipeela kuli Yehova? (Amalumbo 116:​12-14)

⁸ Nga mwatontonkanya pali fyonse ifyo Yehova amucitila, mukalafwaisha ukumutasha kabili mukafwaya ukuipeela kuli ena. (Belengeni Amalumbo 116:​12-14.) Baibo yalilungika ifi ilanda ukuti Yehova e upeela “ica bupe conse icisuma no bupe bonse ubwapwililika.” (Yako. 1:17) Ubupe ubwacila pa fya bupe fyonse ifyo Lesa atupeela, lilambo lya Mwana wakwe Yesu. Tontonkanyeni pa fyo ubu bupe bwawama! Icilubula calilenga mwaba cibusa wa kwa Yehova. Kabili calilenga mwakwata ne shuko lya kwisaikala umuyayaya. (1 Yoh. 4:​9, 10, 19) Ukuipeela kuli Yehova ni nshila imo iisuma sana iyo mwingalangilamo ukuti mulatasha pa fyo Yehova amutemwa na pali fyonse ifyo amupaala. (Amala. 16:17; 2 Kor. 5:15) Mwi sambililo 46 mu cishinka 4, mu citabo ca Kuti Mwaba ne Nsansa Umuyayaya!, e mo balanda sana pa fyo mwingalacita pa kuti muletasha. Mwaliba na vidio iya mamineti yatatu iitila Mulepeela Lesa Ifya Bupe.

BUSHE NAMUIPEKANYA UKUIPEELA KULI YEHOVA NO KUBATISHIWA?

9. Mulandu nshi umuntu ashilingile ukuipeelela kuli Yehova nga talaipekanya?

⁹ Nalimo kuti mwalaumfwa kwati tamulaipekanya ukuipeela kuli Yehova no kubatishiwa. Nalimo kuli na fimbi ifyo mufwile ukwalukamo pa kuti mulekonka amafunde ya kwa Yehova, nelyo mulekabila inshita pa kuti mukoshe icitetekelo cenu. (Kol. 2:​6, 7) Abasambi ba Baibo bonse tabalundulukila pamo mu fya kwa Lesa kabili abacaice bonse tabaipeela kuli Yehova no kubatishiwa pa mushinku umo wine. Mulemona ifyo mufwile ukwalukamo pa kuti mulunduluke mu fya kwa Lesa, kabili mulecita ifyo fine ukucila ukulailinganya ku bantu bambi.—Gal. 6:​4, 5.

10. Finshi mufwile ukucita nga mwaishiba ukuti tamulaipekanya ukuipeela no kubatishiwa? (Moneni na kabokoshi akaleti “Nga ca kuti Mwakulila mu Lupwa lwa ba Nte.”)

¹⁰ Na lintu mwamona ukuti tamulaipekanya ukuipeela kuli Yehova, mufwile ukutwalilila ukutontonkanya pa kuipeela. Mulelomba Yehova ukuti alemwafwa pa kuti mulealuka mu fyo mufwile ukwalukamo. (Fil. 2:13; 3:16) Kuti mwashininkisha ukuti akomfwa ipepo lyenu kabili akamwafwa.—1 Yoh. 5:14.

CINSHI CILENGA BAMO BALESHINGASHINGA UKUIPEELA NO KUBATISHIWA?

11. Bushe Yehova akalatwafwa shani pa kuti tukatwalilile ukuba aba cishinka?

¹¹ Bamo balashingashinga ukuipeela no kubatishiwa nangu ca kuti bali-ipekanya. Nalimo balatiina ukuti bakabatamfya mu cilonganino nga ca kuti bacita ulubembu ulukalamba pa numa ya kubatishiwa. Nga ca kuti mulatiina ukuti nalimo kuti mwacita ulubembu ulukalamba, mufwile ukushininkisha ukuti Yehova akalamwafwa “pa kuti muleikala ukulingana ne fyo Yehova afwaya pa kuti mulecita lyonse ifya kumusekesha.” (Kol. 1:10) Kabili akulamupeela na maka aya kucita ifyalungama. Alilanga ukuti akulacita ifi pantu alyafwa abantu abengi pa kuti balecita ifyalungama. (1 Kor. 10:13) E co na bantu abatamfiwa mu cilonganino ca Bena Kristu bashafulila. Yehova alafwa abantu bakwe pa kuti batwalilile aba cishinka.

12. Finshi twingacita pa kuti tatucitile ulubembu ulukalamba?

¹² Umuntu onse uushapwililika alatunkwa ukucita ifyabipa. (Yako. 1:14) Lelo nimwe bene mufwile ukusalapo ifya kucita nga mwatunkwa ukucita ifyabipa. Icishinka ca kuti mwe bene nimwe mufwile ukwishiba ifyo mwakulaikala. Abantu bamo batila takuli nangu cimo ico twingacita pa fyo tumfwa na pa fyo tucita. Lelo ubu bufi. Kuti mwasambilila ifya kucita pa kuti tamucitile ifyabipa nga mwatunkwa. Kanshi nangu ca kuti mwatunkwa ukucita ifyabipa, kuti mwasalapo ukukanaficita. E ico mulepepa cila bushiku. Muleisambilisha Icebo ca kwa Lesa lyonse. Mulesangwa ku kulongana kwa Bena Kristu. Mule-ebako abantu ifyo mwasuminamo. Nga mulecita ifi twalandapo, mukasunga umulapo wenu uwa kuipeela kuli Yehova. Kabili tekwesha ukulaba ukuti Yehova akulamwafwa pa kuti mukasunge umulapo wenu uwa kuipeela kuli ena.—Gal. 5:16.

13. Fisuma nshi Yosefe acitile ifyo twingasambililako?

¹³ Cikamwangukila ukusunga umulapo wenu uwa kuipeela kuli Yehova nga ca kuti mwasalila calimo ifya kucita nga mwatunkwa ukucita ifyabipa. Baibo yalitweba pa bantu abacitile ifi fine twalandapo nangu ca kuti nabo bene tabali abapwililika. Ku ca kumwenako, pa miku iingi muka Potifa alesembeleka Yosefe pa kuti alaale nankwe. Nomba Yosefe taletwishika ifyo ali no kucita. Baibo itila Yosefe “alekaana,” kabili atile: “Kuti nacita shani ububi bwakula ifyo no kubembukila Lesa?” (Ukute. 39:​8-10) Ukwabula no kutwishika, Yosefe alishibe ifyo ali no kucita ilyo muka Potifa ashilamusembeleka. Ifi acitile fyalengele camwangukila ukukanacita ifyabipa ilyo muka Potifa amutunkile.

14. Finshi twingacita pa kuti twilacita ifyabipa?

¹⁴ Kuti mwapashanya shani Yosefe pa kuti tamucitile ifyabipa nga mwatunkwa? Kuti mwasalilapo limo ifyo mukacita nga mwatunkwa ukucita ifyabipa. Mufwile ukusambilila ifya kukaana ifyo Yehova apata ilyo line fye bamutunka ukuficita. Kabili tamufwile no kulafitontonkanyapo. (Amalu. 97:10; 119:165) Nga mulecita ifi, tamwakulacita ifyabipa nga bamutunka pantu ninshi mwalishiba kale ifyo mufwile ukucita.

15. Bushe umuntu kuti alanga shani ukuti ‘alefwaisha’ Yehova? (AbaHebere 11:6)

¹⁵ Nalimo mwalishiba ukuti mwalisanga icine kabili mulafwaya ukulabombela Yehova no mutima wenu onse lelo mucili muleumfwa ukuti tamulaipekanya ukuipeela kuli Yehova no kubatishiwa. Kuti mwacita ifyo Imfumu Davidi yacitile. Kuti mwalomba Yehova ukuti: “Fwayeni muli ine, mwe Lesa, no kwishiba umutima wandi. Nceeceeteni, no kwishiba amalangulushi yandi, mumone nga muli ine mwaba amapange ya kuntwala mu nshila iibi, kabili muntungulule mu nshila ya muyayaya.” (Amalu. 139:​23, 24) Yehova alapaala bonse “abamufwaisha.” Nga mulecita ifilelanga ukuti mulefwaya ukuipeela kuli ena no kubatishiwa, ninshi mulelanga ukuti mulamufwaisha.—Belengeni AbaHebere 11:6.

TWALILILENI UKUPALAMA KULI YEHOVA

16-17. Bushe Yehova akula shani abana aba kuti abafyashi babo ni Nte sha kwa Yehova? (Yohane 6:44)

¹⁶ Yesu alandile ukuti Yehova e ukula abasambi bakwe. (Belengeni Yohane 6:44.) Tontonkanyeni pali aya amashiwi ayasuma ne fyo yamukuma. Yehova alamona ifintu ifisuma mu muntu umo umo uo akula. Cila muntu amumona ukuti “cipe cakwe ica mutengo” nelyo icacindama. (Amala. 7:6) Ifi fine e fyo na imwe amumona.

¹⁷ Nalimo uli wacaice uulekulila mu lupwa lwa ba Nte. Kuti walatontonkanya ukuti icilenga ulebombela Yehova ni co abafyashi bobe balamubombela, te pa mulandu wa kuti alikukula. Na lyo line, Baibo itila: “Palameni kuli Lesa, na o akapalama kuli imwe.” (Yako. 4:8; 1 Imila. 28:9) Nga waitemenwa ukupalama kuli Yehova, na o akapalama kuli iwe. Yehova takumona ukuti waba fye mwi bumba. Akula umuntu umo umo, ukubikako fye no muntu uwa kuti akulila mu lupwa lwa ba Nte. Umuntu nga aitemenwa ukupalama kuli Yehova, na o alapalama kuli ena, nga fintu Baibo ilanda pali Yakobo 4:8.—Linganyeniko 2 Abena Tesalonika 2:13.

18. Finshi tukasambililapo mu cipande cikonkelepo? (Amalumbo 40:8)

¹⁸ Nga mwaipeela kuli Yehova mwabatishiwa no kubatishiwa, ninshi mwacita ifyo Yesu acitile. Ali-itemenwe ukuituula kuli Wishi pa kuti alecita fyonse ifyo Wishi amweba. (Belengeni Amalumbo 40:8; Heb. 10:7) Mu cipande cikonkelepo, tukalanda pa fyo mwingacita pa kuti mulebombela Yehova ne cishinka pa numa ya kubatishiwa.