Americas

Ukusambilila Baibolo mu Lubuuto lwa Kandulo

Bapainiya baibela abaupana abalebombela mu ncende iya kutali mu Brazil, baumfwile ukuti kwali umwanakashi uwe shina lya kuti Valdira, uwasambililepo Baibolo akale ninshi palipita ne myaka 13 ukutula apo alekelesheko ukusambilila. Balyendele mu musebo uwa lukungu sana no ukwabuka imimana iyayafya pa kuti fye bayefika kuli ba Valdira abalefwaisha ukutampa ukusambilila Baibolo na kabili. Apo ba Valdira baleikala ukutali, aba bapainiya balingile ukupekanya bwino sana pa kuti bayemonana nabo. Nangu ca kuti ba Valdira balikwete foni, kwali fye incende imo apo bengalanda bwino ukwabula ubwafya kabili iyo incende yali apatali na apo baleikala. Na kabili ba Valdira balesambilila fye inshita ya ubushiku mu ma 21:00 hrs. Elenganyeni ifyo caleba: Umukashana naikala mu mpanga ubushiku alesambilila Baibolo pa foni mu lubuuto lwa kandulo.

Na kabili ba Valdira balaya mu mpanga mu kukutika ku kulongana kwa pa mulungu pali foni yabo. Pa kuya, balasenda Baibolo, Ulupungu lwa kwa Kalinda e lyo na icitabo ica nyimbo. Nga kuli imfula, balasenda umwamfuli.

Mu March, ba Valdira baliilesangwa ku kulongana kwaibela ilyo Baibolo ya Amalembo ya Calo Cipya yafumine mu ciPortuguese. Uku kulongana kwabelele pa Ng’anda ya Bufumu iyali apalepele amakilomita 96.6 ukufuma uko baleikala. Ala balitemenwe ukupokelela Baibolo iipya! Ilyo babatashishe pa fyo balebombesha pa kusambilila Baibolo, ba Valdira batile, “Awe tacayafya sana.”

“Nalishibe Ukuti Bushiku Bumo Mukesa”

Aba Yukpa bena Amerindian abekala mu Columbia. Ilyo ba Frank, bapainiya baibela, bashilaya kuli iyi ncende balibasokele ukuti imfumu ya kuli iyi ncende, ba John Jairo, balitamfishe abantu bonse abaleya muli iyi incende mu kusambilisha abantu ifyaba mu Baibolo. Inshita imo iyi imfumu yalitamfishe shimapepo umo, uku ninshi ilelisha ne mfuti mu muulu, ilyo yaishibe ukuti alesonkesha abantu indalama.

Ba Frank batile: “Ilyo twafikile fye, uo twabalilepo ukubilako imbila nsuma mwana umukashana wa ba John Jairo! Lintu twamulangile icitabo citila Bushe Cinshi Baibolo Isambilisha? Ilyo line fye atile, ‘Ndefwaya ukulapepa na imwe!’ Uyu umukashana alibutukiile kuli ba wishi no kuyabeba ifyo twalanshenye nankwe. Lyena balitwitile. Nangu ca kuti twalitiinine, twalilebamona. Ilyo tushilalanda nangu cimo batwebele ukuti: ‘Nalishiba ukuti imwe ni mwe bakapepa ba cine. Kwena ilyo nali mu Becerril imyaka 8 iyapitapo, nalitolele icitabo mu fisooso ico mwacipeelako umwana wandi. Nalicibelenga kabili ukutula lilya line fye, ndamulolela pantu nalishibe ukuti bushiku bumo mukesa. Ine no lupwa lwandi ndefwaya mutusambilishe Baibolo kabili namusuminisha ukusambilisha na bantu bonse fye muli uno mushi.’

“Ala aya amashiwi yalimfikile pa mutima nicikanga fye indukushe ne filamba. Abekala mushi bonse balishile mu kukutika ku mbila nsuma kabili ba John Jairo e balepilibwila abantu ifyo twalelanda mu lulimi balanda kuli iyi incende. Ilyo twalefumako, balitwashimishe ne mpunda apa kusendela ifipe. Pali ino inshita tulatungulula amasambililo ya Baibolo 47 ku bena Yukpa 120 abekala mu ncende ishalekanalekana ukubikako fya na ba John Jairo no mwana wabo umukashana.”

Uwalecusha ba Nte Ayaluka

Ba José abekala ku Ecuador, bali ni baKatolika abakamamo na menshi. Balembele ukuti: “Nalipatile sana Inte sha kwa Yehova ica kuti nalibacushishe pa myaka 10. Naletunka abantu ukuti balebacusha no kuboma fye kabili naleeba abantu ukuti ba Nte ni bakabolala. Lyena nga bababika mu fifungo nalefwaya fye ukutila nine ndekoma amaloko ya mu fifungo. Bushiku bumo twalyonawile na motoka ya kwa Nte umo. Ubushiku bumbi twalipoosele honda ya kwa Nte umbi mu cilindi icitali.

“Mu 2010 nalilwele icifine ico beta ukuti swine flu. Badokota abaleng’undapa banjebele ukuti mfwile ukufuma ku ng’anda yandi iyabelele mu mpili sha Andes no kukukila ku incende imbi iya kabako pa kuti mpole. Naile mu kwikala pe farmu ilya kwa lupwa wandi kabili nine natendeke ukulisunga. Apo naleikala fye neka nalefwaisha umuntu uwa kulalanda nankwe. Lelo icampapwishe ca kuti Inte sha kwa Yehova e baishile pa farmu! Apo nalefwaisha aba kulalanda nabo, nalisumiine ukulanshanya nabo kabili nalipapile pa fyo baleyasuka amepusho ukubomfya Baibolo. Nalisumine ukulasambilila Baibolo pantu nalefwaya fye ukwishiba bwino ba Nte ne fyo basumina. Ilyo nasambilile pa myeshi 6, naliile ku kulongana pa muku wa kubalilapo. Nalitemenwe sana ifyo banangile icikuuku no kutemwa ica kuti nalatontonkanya nati, ‘Nalimo aba e bakapepa ba cine.’ Nalilundulwike kabili mu April 2014, nalibatishiwe.

“Naleumfwa ububi pa fyo nalecusha ba Nte. Na lyo line, Yehova alimpeele ishuko lya kulomba ubwelelo kuli bamo abo nalecusha. Pa kulongana kwa muputule ukwaliko pa 4 October, mu 2014 balinjipwishe pa fyo nalecusha ba Nte. Batile: ‘Nga balimupeele ishuko lya kulomba ubwelelo kubo mwalecusha, nani mwingalombako ubwelelo?’ Ilyo line fye natile kuti natemwa ukulomba ubwelelo kuli munyina Edmundo, nomba nshaishiba uko ningamusanga. Lelo icampapwishe ca kuti kangalila wa muputule alitile uyu munyina kabili aikele ku numa ya cisebele. Abasangilwe ku kulongana balilukwishe ifilamba ilyo bamwene uko ine na ba Edmundo twakumbatana pa cisebele no kulila tulelila.”

“Mwe Yehova Lekeni Inte Shenu Bakansange”

Kasuba kamo ninshi nakukaba icine cine, bakasabankanya ababa mwi bumba lya mulimo mu musumba wa Asunción, ku Paraguay, balipwile ukubila imbila nsuma mu ncende babapeele ukubombelamo. Lyena balisalilepo ukutwalilila ukushimikila na ku mayanda ayapalamine na iyi ncende babombelemo. Umo pali aba bakasabankanya atile “Nalimo kuli uulepepa.” Pa ng’anda imo, pali umwanakashi uwaposeshe bankashi ninshi alemwentula no kumwentula e lyo abepusha nga ca kuti bali ni Nte sha kwa Yehova. Uyu mwanakashi alilondolwele ukuti umweshi wafumineko alikukile ukufuma ku Bolivia no kuya mu kubombela ku Paraguay. Atile ilyo aali ku Bolivia alesambilila Baibolo. Ku ca bulanda, uko akukiile takwali umwina mupalamano nangu umo uwaishibe uko engasanga ba Nte, e ico alipepele ati, “Mwe Yehova lekeni Inte shenu bakansange.” Bulya bwine bushiku bankashi balile pa ng’anda kabili balitendeke no ku musambilisha Baibolo.