England: Bamunyinefwe na bankashi balesengela aba bwananyina abaile ku kulongana ku kalamba ukwa bantu abafumine ku fyalo ifingi
UKUBILA IMBILA NSUMA MWI SONDE LYONSE
Europe
IFYALO 47
IMPENDWA YA BANTU 743,421,605
BAKASABANKANYA 1,614,244
AMASAMBILILO YA BAIBOLO 842,091
Baposeshamo Umuntu Umbi
Abantu abaile mu kulongana ku kalamba ukwa bantu abafuma ku fyalo ifingi e lyo na bekala calo abena Britain balitemenwe nga nshi pa kulongana ukwali mu London ku England. Ba Andrew na ba Elizabeth baliile ku hotela ya mu London ukwali no kufikilila abaile mu kulongana abafumine ku fyalo fimbi pa kuti babaposhe. Ilyo baingile umufikila abeni abesa muli iyi hotela, bamwene umwanakashi uwafwele bwino sana ica kuti ba Elizabeth bailemukumbatila pantu bamwene kwati ni Inte ya kwa Yehova. Uyu mwanakashi alipapile sana e ico ba Elizabeth balombele ubwelelo no kumweba abati, “Unjeleleko nacilamona kwati na iwe wishile mu kulongana!”
Lyena umwanakashi abepwishe ati “Kulongana nshi?”
Ba Elizabeth basontele pa kapampa ako balembelepo amashiwi ya kusengela ba Nte abaile mu kulongana kabili balipapile pa kwishiba ukuti te Nte. Uyu mwanakashi atile, “Cawama sana, nga ndemoneka kwati ndi Nte ya kwa Yehova?”
Mu lyashi, ba Elizabeth baishileishiba ukuti uyu mwanakashi ni Vivien, mwina Nigeria no kuti baali bena mupalamano no uyu mwanakashi. Ba Vivien balisumiine ukulasambilila Baibolo kabili balefwaya ukuti abana babo nabo balesambililako Baibolo. Ba Andrew na ba Elizabeth baliile pa ng’anda ya ba Vivien kabili iyi nshita ba Vivien e bakumbatile aba abaupana. Ba Vivien balitemenwe sana pa fyo ba Andrew na ba Elizabeth bacitile ilyo bamonene nabo umuku wa kubalilapo. Ilyo aba abaupana balangile ba Vivien icitabo ca kuti ico Baibolo Isambilisha, balipapile sana ilyo ba Vivien balandile ukuti balikwata kale ici icitabo kabili balacibelenga na bana babo bane. Lyena ba Andrew na bena mwabo baebele ba Vivien ukuti nga balefwaya kuti batendeka ne sambililo lya Baibolo muli ici cine icitabo ukwabula ukubalipilisha. Ba Vivien balitemenwe nga nshi kabili batile, “Natutendeke ukusambilila ili line!”
Inkalata Ukufuma kuli Munyinefwe Umwina Roma
Icilonganino ca kubalilapo ica Roma mu Slovakia capangilwe mu November mu 2014. Pa kulongana kwa muputule ukwali bakasabankanya 21 abalanda iciRomany balibatishiwe. Bonse bafumine mu mushi umo. Ilyo balongene Icibukisho, abantu abasangilweko aba muli ici cilonganino bali 495. Munyinefwe uwabatishiwe nomba line alembele ati:
Slovakia: Bamunyinefwe babili balebila imbila nsuma ku mwanakashi umwina Roma
“Ndi mwina Roma kabili njikala ku Žehra mu Slovakia. Uko njikala abasungu bamona ukuti tuli maGypsies (uluko lwa bantu abashikala pa ncende imo), tuli basanku, tulabepa no kuti tuli bapupu. Ilyo naile ku calici, abakalamba baili icalici banjebele ukuti nshalingile ukuyako kabili balintamfishe. Ukutula fye ilya nshita, nalipatile abasungu. Lelo Inte sha kwa Yehova balinjitile ukuya ku Ng’anda ya Bufumu. Nalisumine ukuya nangu ca kuti nalemona fye ukuti nabo bene kuti bayantamfya. Lelo icampapwishe ca kuti ilyo nshilaingila na mu Ng’anda ya Bufumu, umusungu alimposeshe ne nsansa. Ilyo kalanda alelanda ilyashi lya ku cintubwingi, nshaleumfwa no kumfwa naikalile fye ukulatontonkanya ukuti, ‘Nga cinshi cilengele aba bantu ukunsansamukila umusango uyu?’
“Bulya bushiku nshalele, naletontonkanya fye pa fyacitike ku Ng’anda ya Bufumu. E ico nalibweleleko pa kuti injemona nga ca kuti cine cine balya bantu bali fye ne cikuuku. Ilyo nafikile pa Ng’anda ya Bufumu, balinsansamukile ukucila ne fyo bansansamukile umuku wa kubalilapo, bali fye kwati banjishibe kale. Nalitwalilile ukulongana kabili mu kupita kwa nshita nalibatishiwe. Na lintu nabatishiwe aba bwananyina tabalekele ukuba ne cikuuku kuli ine, kabili ifyo balecita fyalenenga ukumona ukuti nalicindama. Inshita shimo balampeela ne fya kulya ifisuma ifyo na abene bashilya lyonse. Ndefwaya ukutwalilila ukuba mu cilonganino ca kwa Lesa no kulapepa fye Yehova eka.”
Yehova Alyaswike Ipepo Lya ba Aysel
Ba Aysel baleya ku musumba wa Baku ku Azerbaijan ukufuma ku Ganja. Balipepele kuli Yehova pa kuti abafwe ukubila imbila nsuma ku muntu muli basi. Nangu ca kuti ba Aysel balibapeele apa kwikala muli basi, kwali umwanakashi umo uwabapatikishe ukwikala mupepi nankwe. Ba Aysel balitwalilile ukulanshanya na uyu mwanakashi kabili balitendeke ukumwebako amashiwi ya mu Baibolo. Uyu mwanakashi aebele ba Aysel ukuti alitemwa Yesu kabili alefwaya ukwishibilapo na fimbi. Ba Aysel balipeele uyu mwanakashi inambala ya foni yabo, nao alibapeele inambala ya foni yakwe kabili balilanshenye ukuti bakamonane na kabili. Uyu mwanakashi alilombele na Baibolo kuli ba Aysel.
Ilyo ba Aysel babweleele ku Ganja, baliilemonana na uyu mwanakashi apo abombela. Uyu mwanakashi aebele ba Aysel ukuti alikwata “akatabo ka mapepo” ako abelenga cila bushiku. Ba Aysel balipapile ilyo baumfwile ukuti akatabo ako uyu mwanakashi alelandapo, katabo ka Ukubebeta Amalembo Cila Bushiku aka mu 2013! Ilyo line balitendeke ukumusambilisha Baibolo kabili ba Aysel balitemenwe nga nshi pa fyo Yehova abafwile ukuba abashipa ukubila imbila nsuma mu lyashi fye.
Kalata ya Kutasha Iyafumine ku Mufungwa
Iyi kalata iyafumine ku Spain yatile:
“Ica ntanshi ndefwaya ukumutasha pa fyo mubila imbila nsuma ku bantu fye bonse.
“Umuku wa kubalilapo ilyo nalanshenyepo ne Nte sha kwa Yehova ni lintu nali ku Tiranë ku Albania nomba napapita ne myaka 15. Nalipapile lintu Nte ali uwashipa pa kulanda na ifwe nangu ca kuti twali ifipondo 10 mwi bumba lyesu. Takwali umuntu nangu umo uwalefwaya ukulanda na ifwe lelo uyu munyina ena alishipile ukulanda na ifwe nangu ca kuti twali ne fyanso. Tatiinine ukutwebako amashiwi ya mu Baibolo. Nalitemenwe sana filya ali uwashipa.
“Nomba napapita ne myaka ine (4) ukutula apo Nte umo aishile mu cifungo umo nali kuno kwine ku Spain no kutendeka ukunsambilisha Baibolo. Nalisumine kabili ukutula ilya nshita nalyaluka sana. Nalileka ulubuli kabili napapita ne myaka iingi ukutula apo napangilepo imilandu. Pali lelo nalimwishiba Yehova kabili no bumi bwandi nomba bwaliwama sana. Ndomfwana na bafungwa banandi kabili pali ino nshita nine kasabankanya uushabatishiwa ukucila pa mwaka umo.
“Nangu ca kuti nalikala mu cifungo pa myaka 12, mu myaka ine (4) iyapitapo, nalikwata insansa ukucila ifyo nali. Cila bushiku ndatootela Yehova pa fyo ancitila.
“Napapita imilungu ukutula apo natambiile vidio ya pa jw.org umwaba munyinefwe uo bakakile ku United States. Ifyo natambile muli iyi vidio fyalimfikile sana pa mutima. Kwena mu cifyalilwa fye nshikuntukilwa bwangu lelo ilyo natambile ifyo uyu munyinefwe ayalwike no kutampa ukucita ifisuma, nalilukwishe ifilamba.
“Yehova atwalilile ukulamwafwa pa kuti mulepilibula impapulo mu ndimi ishingi no kulabila imbila nsuma ku bantu bonse ukubikako fye na fwe bafungwa.
“Natootela nga nshi.”
“Nasuka Naba no Mutende”
Ba Felicity abali ne myaka 68 abekala ku Sweden batile, “Nalipopomenwe sana kabili nalefwaisha ukuba no mutende. Apo ba Felicity tabatemenwe ifisambilisho fya mu Katolika, batendeke ukufwaya ukwishiba ifyo abantu bambi basuminamo kabili baishileba abaloshi batendeke no ukupupa ifibanda.
Ba Felicity batendeke ukumona kwati ubumi bwabo tabwacindeme ica kuti balefwaya fye no kuipaya. Ba Felicity batile, “Naebele Lesa ukuti anjebe ifyo alefwaya ukuti incite uku ninshi ndelila no kulila. Ilyo papitile imilungu ibili, naumfwile umuntu alekonkonsha pa cibi. Umwaume uwalekonkonsha anjipwishe nga ca kutila kuti natemwa ukukutika ku Cebo ca kwa Lesa ninshi alemwentula no kumwentula. Lyena natontonkenye nati ‘Mwe Lesa bushe nalombele ukuti muntumine Inte sha kwa Yehova lintu namulombele ukunjeba ifya kucita?’”
Nangu ca kuti ba Felicity balefwaya ukwisalako icibi balisumine ukusambilila Baibolo mu citabo icitila Ico Baibolo Isambilisha. Ba Felicity batile, “Ifyo bansambilishe fyalengele naishiba bwino ifyo Baibolo isambilisha.” Ba Felicity babatishiwe pa kulongana kwa citungu ukwali ku Sweden mu 2014. Pali lelo ba Felicity batila: “Ubu e bumi ubo nalefwaya pa myaka iingi. Nasuka naba no mutende.”