Abacaice Bepusha Ukuti . . .

Kuti Nacita Shani pa Kuti Ndeipakisha Nga Nshi Ukubelenga Baibolo?

Annalieza, uwa myaka 17 atila: “Inshita shimo Baibolo ilafya ukumfwa, kabili ici cilafuupula.”

Kimberly, uwa myaka 22 na o atila: “Ukubelenga Baibolo kwalentendusha.”

ABANTU abengi tabatemwa ukubelenga. E co icitabo icikulu nga Baibolo kuti camoneka ica kutiinya—na ku batemwisha fye ukubelenga. Tammy, uwa myaka 17 atila: “Nalemona Baibolo ukuba icitabo icatikama umwaba amashiwi ayakosa ukumfwa. Ukubelenga Baibolo kufwaya ukupooseshako amano no kushipikisha.”

Kabinge, umulimo wa ku sukulu uwa kubombela ku ng’anda, utumilimo twa pa ng’anda, no kukokoloka kuti fyasenda inshita yobe iikalamba na maka. Ici na co kuti calenga ukukosa pa kupoosa amano no kutemwa ukubelenga Baibolo. Inte ya kwa Yehova uwe shina lya Alicia, alapaatulako ne nshita ya kupekanya no kusangwa ku kulongana kwa Bwina Kristu no kwebako bambi ifyo asuminamo. Atila: “Ukubelenga Baibolo kuti kwaba ukwayafya pa mulandu wa fya kucita ubwingi ifishipwa na kupwa.”

Lelo, Alicia, Tammy, na bacaice bambi abengi balicimfya ubu bwafya. Pali nomba balabelenga Baibolo lyonse kabili balasangamo insansa. E fyo cingaba na kuli iwe! Mona ifintu fitatu ifyo wingacita pa kuti uleipakisha nga nshi ukubelenga Baibolo.

Paatulako Inshita ya Kubelenga Baibolo

Kelly uwa myaka 18 atila: “Ndemona kwati ico abacaice abengi basosela abati ukubelenga Baibolo kulatendusha ni co tabaibelenga sana.” Filya fine uipakisha ukwangala ubwangalo ubo uteya libili libili, e fyo ukalaipakisha no kubelenga Baibolo nga ulecite co lyonse.

Lelo ni shani nga tawakwata sana inshita? Umutumwa Paulo apanda amano ati: “Cenjeleni pa kwenda kwenu, te kwenda nga batumpa iyo, kano nga ba mano; mube ababomfye [“abalubule,” NW] nshita ico ishi nshiku sha bubifi.” (Abena Efese 5:15, 16) Kuti ‘walubule nshita’ nga taulepoosa sana inshita ku fishacindama pamo ngo kutamba TV. Ishiwi Paulo abomfeshe ilyapilibulwa “inshita” kuti lyalosha ku nshita iyasalwa ukucitamo icintu ca kulungatika. Ni nshita nshi iwe wingasala ku kubelenga Baibolo?

Abengi babelenga Baibolo ulucelo, pa numa ya kubebeta ilembo na mashiwi yalelanda pali ilyo ilembo ayasangwa mu katabo ka Ukubebeta Amalembo Cila Bushiku.a Bambi na bo basalapo ukubelenga ilyo bashilasendama. Sala inshita ya kulungatika iilebomba bwino kuli iwe, kabili yalula ukutantika kobe ukulingana ne yo iine nshita. Alicia atila: “Ico namona maka maka icafwa pa kutwalilila ukubelenga Baibolo lyonse kwalula inshita.”

Abacaice bamo Abena Kristu batantika ukubelenga Baibolo cila bushiku pali baminiti 10 ukufika ku 15. Pa kucite fyo, balapwisha ukubelenga Baibolo yonse mu mwaka umo nelyo ibili! Nangu ca kutila te kuti upwishe Baibolo, ba no buyo bwa kubelengako iciputulwa ca Baibolo cila bushiku. Ukutemwa kobe ukwa Cebo ca kwa Lesa kwakulakula nga waba no mupampamina wa kubelenga Baibolo pa nshita watantika—Amalumbo 119:97; 1 Petro 2:2.

Lomba Amano

Ca cine ukuti nangu fye ni balya babelenga Baibolo lyonse balasanga ifiputulwa fimo ifya mu Cebo ca kwa Lesa ukuba ifyakosa ukumfwa. Katendeka wa Baibolo, Yehova Lesa, afwaya iwe ukumfwikisha Icebo cakwe. Ibuuku lya Imilimo lishimika ulwa muyendo umwina Etiopia uwafililwe ukumfwikisha ukusesema kwa muli Esaya icipandwa 53. Uyu mwaume aali uwaitemenwa ukulomba ukwafwa, kabili malaika wa kwa Yehova atumine mishonari Filipi ku kuyamulondolwela kulya kusesema.—Imilimo 8:26-39.

E co ukubelenga Baibolo ukwatunguluka takutendekela fye no kubelenga lelo kutendekela ne pepo. Ilyo bashilakupukula Baibolo, bamo balapepa lyonse kuli Yehova ku kulomba amano ku kumfwikisha no kubaka ifyo balasambilila mu fyo balebelenga. (2 Timote 2:7; Yakobo 1:5) Umupashi wa kwa Lesa kuti wakwibulula fye ne fikomo fya mu Baibolo ifikakwafwa ukwasuka ifipusho nelyo ukushipikisha ifya kwesha.

Umwina Kristu umo umulumendo ebukisha ukuti: “Ilyo nali ne myaka 12, batata balifumine pa ng’anda. Bushiku bumo nalepepa pa busanshi bwandi, ukupaapaata Yehova ukuti batata babwelele ku ng’anda. Lyene nabuulile Baibolo no kubelenga Amalumbo 10:14 apatila: ‘Kuli imwe [Yehova] e ko uwashama atuulo mulandu wakwe; ni mwe mwaba kaafwa wa nshiwa.’ Nalikutumene panono. Namwene ifyo Yehova aalelanda kuli ine ukunjeba ukuti e kaafwa wandi; e tata. Nga Mufyashi nshi umbi uwingacila wene?”

Bushe na iwe kuti walapepa lyonse ilyo waipekanya ukutendeka ukubelenga Baibolo? Adrian atubululo kuti: “Pepa ilyo ushilatendeka ukubelenga—e lyo na kabushe, na cilya wapwisha ukubelenga—pa kuti cibe kwati imwe babili, Yehova na iwe, mulelanshanya.” Ipepo lya kufuma pa nshi ya mutima likakosha umupampamina obe uwa kubelenga Baibolo lyonse pa nshita yatantikwa kabili likakosha bucibusa bobe na Lesa.—Yakobo 4:8.

Leka Ifyo Ulebelenga Fimoneke Ukuti Fya Cine Cine

Kimberly, uo tulandilepo pa kutampa, asangile Baibolo ukuba iya kutendusha. Ca cine, Baibolo citabo ca kale nga nshi—calembelwe kale sana ilyo kushilaba bakompyuta, ama TV, nelyo indeke—kabili abalandwapo muli Baibolo baafwile imyaka iingi iyapitapo. Lelo, umutumwa Paulo alembele ukuti: “Icebo ca kwa Lesa ca mweo, kabili caliluma.” (AbaHebere 4:12) Icitabo ca musango yo ica kale kuti caba shani icaluma?

Mu nshiku sha kwa kalemba Esra, abaume abengi na banakashi, na “onse uwacenjela ku kuumfwa” balilonganikwe mu Yerusalemu ku kuumfwa ilyo Amalango ya kwa Mose yalebelengwa. Pali ilya nshita Amalango kale kale yali nayekala imyaka ukucila pali 1,000! Lelo Esra na bakaafwa wakwe ‘balebelenga mwi buuku, mu malango ya kwa Lesa, baletungulula, no kushilimuna, no kuleka beluke icabelengwa.’ Ilyo aba baume balondolwele Amalembo no kucincimuka pa kubelenga, cinshi cacitike? “Abantu bonse baile ku kulya no kunwa, ku kutuma ne milingo, no kucito kwanga kukalamba, pantu bailwike ifyo bashimikilwe.”—Nehemia 8:1-12.

Kuti walenga shani ukubelenga Baibolo ukubamo “ukushilimuna”? Cathy, uushatemwisha ukubelenga, alapongomoka ilyo alebelenga pa kuti elapulaulwa. Nicki wena acita kwati na o e ko ali uko filecitikila. Atila: “Ndelenganya ifyo ningacita mba nine. Ilyashi natemwisha sana lyonse lya kwa Ruti na Naomi. Kuti nalibelenga imiku iingi. Ilyo nakuukiile ku musumba umbi, ili lyashi lyalensansamusha pantu naleelenganya ifyayumfwile Ruti ilyo aile kwa nabene ukushali umukaaya nangu umo. Namwene ukuti atetekele Yehova, ne ci calingafwile nga nshi ukucita cimo cine.”—Ruti, ifipandwa 1-4.

Pa kuti Baibolo ibe ‘iyaluma,’ ukwetetula kulakabilwa. Lyonse ilyo wabelenga, sangako inshita ya kutontonkanya pa malembo wacibelenga no kumona ifyo uli no kubomfya ifyo usambilile. Cili bwino no kumonako ifya kwafwa ukumfwikisha Baibolo ifyasabankanishiwa ne Nte sha kwa Yehova pa kuti unonkelemo sana mu kubelenga kobe.b

Ba no Mukoosha!

Ukulabelenga Baibolo lyonse pa nshita watantika tacayanguka. Nangu fye kutantika kwa kubelenga Baibolo ukubomba bwino nga nshi kukabila ukwalulaalula mu nshita mu nshita. Kuti watwalilila shani no mupampamina obe uwa kubelenga Baibolo cila bushiku?

Ifibusa fyobe no lupwa lobe kuti bakwafwa. Amber, uwa myaka 15 atila: “Nsendama na nkashi nandi ku cipinda cimo cine. Limo limo ndanaka sana ica kuti mfwaya ukusendama fye, lelo nkashi nandi alancinkulako ukubelenga Baibolo. E co nshilabako!” Nga watemwapo ilembo limo nelyo iciputulwa ca muli Baibolo, ebako bambi ilyo lembo. Ici cikalenga iwe ukutemwisha Icebo ca kwa Lesa kabili kuti cabalenga fye no kufwaisha ukubelenga Baibolo. (Abena Roma 1:11, 12) Nga wafilwa ukubelenga Baibolo pa bushiku bumo nelyo pa nshiku ishingi, winenuka! Tendekela fye palya pene wapelelele, kabili pampamina pa kulabelenga lyonse pa nshita watantika.

Te kwesha ukulaba amapaalo ubwingi ayafuma mu kubelenga Baibolo cila bushiku. Kuti waba na bucibusa bwakosa na Yehova pa kukutika kuli wene ukupitila mu Cebo cakwe. Ukasuka aumfwikisha amatontonkanyo yakwe ne fyo amone fintu. (Amapinda 2:1-5) Ici icine caumo mutengo ukufuma kuli Shifwe wa mu muulu cikakucingilila. Kemba wa malumbo aipwishe ati: “Bushe ni mu nshi umulumendo engasangulwile mibele yakwe?” Kabili pa kwasuka atila: “Mu kuibaka umwabele cebo cenu.” (Amalumbo 119:9) E co tendekako programu wa kubelenga Baibolo kabili lyonse ulekonka uyo wine programu. Ukasanga ukuti uleipakisha nga nshi ukucila ifyo watalile autontonkanya!

[Amafutunoti]

[Ifikope pe bula 28]

Ipepo no kusokota mu mpapulo fikalenga ukubelenga kobe Baibolo ukubamo umulyo kabili fikakwaafwa ukumfwikisha umwalola Amalembo

[Icikope pe bula 29]

Ukulaelenganya ukuti na iwe e ko uli ilyo filecitika kukalenga Amalembo ukumfwika aya cine cine