Ukulingana na Baibolo
Amapepo Ayo Lesa Omfwa
“Lombeni, cikapeelwa kuli imwe, fwayeni, mukasanga; kunkunsheni, cikeswilwa kuli imwe; pantu onse uulomba alapokelela, no ufwaya alasanga, no ukunkunsha cilamwiswilwa.”—LUKA 11:9, 10.
APO Abena Kristu abengi balicetekela amashiwi ya kwa Yesu Kristu ayali pa mubalo baleba Lesa mwi pepo amafya na masakamika, no kushininwa ukuti alibatemwa kabili alabasakamana. Lelo, bambi balafuupulwa ilyo balelolela amapepo yabo ukwasukwa. Bushe muyumfwa ukuti amapepo yenu tayomfwika? Bushe Lesa alakutika ku mapepo yenu?
Nangu line amapepo yesu yamoneka kwati tayaswikwe, ici tacilola mu kuti Lesa taumfwile ayo mapepo. Baibolo itweba ati: “Amenso ya kwa Shikulu yalola pa balungami, na matwi yakwe yomfwo kupaapaata kwabo.” (1 Petro 3:12) E co, Yehova Lesa alomfwa amapepo ya balungami, nampo nga bapepa mu kupongomoka nelyo mu mutima. (Yeremia 17:10) Yehova na kabili alabebeta ifyo tutontonkanya ne fyo tuyumfwa ilyo tulepepa, ico napamo no ulepepa ashingomfwikisha nelyo ukwishiba.—Abena Roma 8:26, 27.
Lelo, paliba ififwaikwa pa kuti Lesa omfwe amapepo. Intanshi yafwile ukupepwa fye kuli Lesa—te kuli Yesu, ku witwa umutakatifu nelyo ku cipasho. (Ukufuma 20:4, 5) Kabili tulingile ukupepela mwi shina lya mwana wa kwa Lesa, Yesu Kristu. (Yohane 14:6) Bushe ici calola mu kuti Yesu e ubalilapo ukumfwa amapepo e lyo ayatwala kuli Lesa? Iyo. Ukucila, ilyo twapepa kuli Yehova mwi shina lya kwa Yesu, tuishibisha ukuti tuli basambi ba kwa Kristu kabili tulasumina ukuti icilubula cakwe e calenga ukuti tulepalama kuli Lesa.—AbaHebere 4:14-16.
Amapepo yalingile ukupepwa ne citetekelo. Umutumwa Paulo atile: “Ukwabulo kutetekela te kuti kube ukutemuna, pantu uupalamina kuli Lesa ali no kutetekelo kuti e ko ali, no kuti aba kalambula wa bamufwayafwaya.” (AbaHebere 11:6) Bushe umuntu eshiba shani nga alikwata icitetekelo ca musango yo? Kalemba wa Baibolo Yakobo ayasuka ati: “Ndekulangile citetekelo ku milimo yandi.” (Yakobo 2:18) Ca cine, icitetekelo cileta imilimo, kabili imilimo na yo ilanga ukuti twalitemwa Lesa no kuti tulesha ukumutemuna.
Bakapepa ba kwa Lesa bafwile na kabili ukuba no mukosha wa kupepa. Yesu alondolwele ici bwino pe lembo lya kwa Luka 11:9, 10 ilyambwilwe pa mubalo. Na kuba ngo muntu apepa fye umuku umo pa mulandu umo, bushe tacilangilila ukuti tangilwe ico alepepela?
Ico Lesa Alaya
Nangu twapepa libili libili kabili no mukosha, tucili tuleikala mu “nshita ishayafya.” (2 Timote 3:1) Nangu line Yesu atile abakonshi bakwe bakaba aba nsansa, tatile bakekala ukwabula amafya. (Mateo 5:3-11) Lelo, atile abasambi bakwe kuti baba ne nsansa te mulandu no kuloosha, insala, icilaka, nelyo ukupakaswa.
Insansa isho Yesu alandilepo tashibako ilyo twakwata ifintu ifisuma. Lelo, ni nsansa sha lwa nkati isho tukwata pa mulandu wa kubombela Lesa. E ico, kuti twasansamukako nangu fye tuli na mafya.—2 Korinti 12:7-10.
Ifya Kucita Ilyo Tuli na Mafya
Lelo, bushe ukupepa kuli Lesa pa milandu ya pa lwesu pamo nga ukusanga uwa kuupana nankwe uwayana, amafya ya mu lupwa, ubumi busuma, nelyo incito kuicusha fye? Iyo, pantu nangu ca kuti Lesa talaya ukwalula imikalile yesu mu cipesha amano, akatupeela amano ya kucimfya amafya. Yakobo alembele pa lwa mesho ati: “Nga umo uwa muli imwe abulwa amano, alombe kuli Lesa uupeela fye kuli bonse ukwabulo kwebaula, kabili yakapeelwa kuli wene.” (Yakobo 1:5) E co kanshi, ukupitila mu mupashi wa mushilo, Yehova akatutungulula. Ici cikatwafwa ukumfwikisha no kukonka ifishinte fya mu Baibolo ilyo tulepingula ifya kucita.
Lelo kwena, umupashi wa kwa Lesa tautupingwilako. Lelo, fwe bene tukabila ukubombesha. Ku ca kumwenako, nga tuli na mafya, bushe tulafwailisha ifyebo pali yene no kubebeta fyonse ifikumine ubu bwafya? Ici kuti caba mulimo uulanga Lesa ukuti twalikwata icitetekelo. (Yakobo 2:18) Bushe tulaba no mukosha wa kwesha ukupwisha ubwafya bwesu, ukutwalilila ukwipusha Lesa ukututungulula? (Mateo 7:7, 8) Bushe twalibebeta bwino bwino ifishinte fya mu Baibolo ifilanda pa bwafya bwesu? Icebo ca kwa Lesa kuti calenga ‘twapwililila, twaiteyanya ku kubombo mulimo onse uusuma.’—2 Timote 3:16, 17.
Nangu line Lesa alikwata amaka ya kwafwa abantunse no kufumyapo amafya yesu yonse, alitusuminisha ukubomfya amaka yesu aya kuisalila. Ku ca bulanda, abengi babomfya amaka yabo aya kuisalila ku kucusha bambi. E co, amafya yamo ayo tupepela yakapwa mu calo cipya ica kwa Lesa. (Imilimo 17:30, 31) Napamo ni fimo ificitika kuntu twikala, pamo nga ulukaakala, nelyo inkondo; nelyo kuti caba kushipikisha amafya yaletwa na bakakanya. (1 Petro 4:4) Tufwile ukusumina ukuti muli cino calo cabula bukapepa, fimo ificitika tafyakabale afiwama.
Te mulandu ne fyo, Lesa alitemwa abamupepa kabili alafwaya ukubafwa. Lintu Ubufumu bwakwe bweka fye bukateka isonde lyonse, akafumyapo umupwilapo amafya yabipisha aya ici calo. (Ukusokolola 21:3, 4) Ukufikila iyo nshita tufwile ukuba no mukosha wa kulomba wene ukutulanga ifya kucita pa mafya ya mu bumi. Nga twacite co, kuti twacetekela ukuti Yehova akacita umwabela ubulayo bwakwe ubwalembwa muli Baibolo pali Esaya 41:10 apatila: “Witiina, pantu ine ndi nobe, witentuka, pantu ine ndi Lesa obe; nakulakulengo kutalila, cene, nakulakwafwa, cene, nakulakufumbatila ku kwa kulyo kwandi kwa bulungami.”