Mulandu Nshi Lesa Ashasukila Amapepo Yonse?
Shifwe wa ku muulu Yehova Lesa, alatemwa nga tulepepa kabili alakutika ku mapepo yesu. Lelo, kwaliba ifingalenga e kutika ku mapepo yesu. Finshi ifyo fine? Kabili finshi tufwile ukulaibukisha ilyo tulepepa? Natulande pa fyo Baibolo ya-asuka aya amepusho.
Baibolo itila: “Ilyo ulepepa, wilabwekeshapo ukusosa fimo fine.”—Mateo 6:7.
Yehova tafwaya ukuti tulepepa amapepo ya kusungila nelyo ukulabelenga amapepo ayo balemba mu fitabo. Lelo, afwaya tulepepa ukufuma pa nshi ya mutima. Bushe kuti mwaumfwa shani nga mwalikwete cibusa uumweba fye amashiwi yamo yene cila bushiku? Kwena, te kuti mutemwe. Ifibusa fya cine, filalanshanya ukufuma pa nshi ya mutima. Na ifwe nga tulepepa amapepo aya kufuma pa nshi ya mutima, ninshi tumona Yehova ukuti ni Shifwe wa ku muulu.
Baibolo itila: “Mulalomba, lelo tamupokelela, pantu mulomba bubi bubi.”—Yakobo 4:3.
Lesa te kuti asuke ipepo lyesu nga ca kuti namona ukutila ifyo tulefwaya nelyo ifyo tulelomba tafili bwino. Ku ca kumwenako, bushe Yehova kuti aasuka ipepo lya muntu ulelomba ukuti acimfye mu fyangalo fya kushitikapo, e lyo ninshi alitweba ukuti tatulingile ukuba no bufunushi nelyo ukusumina muli lesa we shuko? (Esaya 65:11; Luka 12:15) Yehova te kuti asuke amapepo ya musango uyu. Ifyo tulepepelapo, tafilingile ukupusana ne fyo atweba muli Baibolo.
Baibolo itila: “Uushifwaya ukumfwa amafunde—ne pepo lyakwe line lya bunani.”—Amapinda 28:9.
Pa nshita balelemba Baibolo, Lesa taleasuka amapepo ya bantu abashalekonka amafunde yakwe. (Esaya 1:15, 16) Na pali ino nshita ta-aluka. (Malaki 3:6) Pa kuti Lesa aleasuka amapepo yesu, tulingile ukulabombesha ukukonka amafunde yakwe. Tutile kale twalecita ifyabipa, bushe ninshi Yehova takatale akutika ku mapepo yesu? Awe. Nga ca kuti twalapila no kutendeka ukucita ifyo Lesa afwaya, alatubelela uluse.—Imilimo 3:19.