Abalwani ba kwa Lesa Ni Bani?

Satana Kaseebanya e mulwani mukalamba uwa kwa Lesa. Cibumbwa ca mupashi icapondokele Yehova. Satana acili alalwisha Lesa kabili alacusha abantunse icabipisha. Satana alibipa umutima. Wa bufi kabili ni kepaya.—Yohane 8:44.

Ifibumbwa fya mupashi na fimbi fyalikonkele Satana mu kupondokela Lesa. Baibolo ifita ati ifibanda. Ifibanda filwani fya bantunse filya fine Satana aba. Fyalitemwa ukucusha abantu. (Mateo 9:32, 33; 12:22) Yehova akonaula Satana ne fibanda fyakwe ku ciyayaya. Satana ne fibanda bashele fye ne nshita iinono iya kucusha abantunse.—Ukusokolola 12:12.

Nga mulefwaya ukuba cibusa wa kwa Lesa, tamufwile ukucita fintu Satana afwaya ukuti mulecita. Satana ne fibanda balipata Yehova. Balwani ba kwa Lesa, kabili bafwaya mube umulwani wa kwa Lesa. Mufwile ukusalapo pali Satana na Yehova untu mulefwaya ukutemuna. Nga mulefwaya umweo wa muyayaya, mufwile ukusala ukucita ukufwaya kwa kwa Lesa. Satana alikwata imingalato iingi ne nshila sha kubepelamo abantu. Alebepa abantu abengi.—Ukusokolola 12:9.