Kaaneni Imipepele ya Bufi!

Satana ne fibanda fyakwe tabafwaya ukuti mulebombela Lesa. Bafwaya ukufumya bonse kuli Lesa nga bengacite co. Ni shani fintu besha ukucita ici? Inshila imo yaba kupitila mu mipepele ya bufi. (Abena Korinti 11:13-15) Nga ca kuti imipepele taisambilisha icine ca mu Baibolo, ninshi ya bufi. Imipepele ya bufi yapala indalama sha cimbepa. Kuti shamoneka kwati sha cine lelo tapali fintu umuntu engashitamo. Imipepele ya bufi kuti yamuletelelapo fye.

Ubufi bwa mipepele te kuti butemune Yehova, Lesa wa cine. Kwali ibumba lya ba fya mapepo ilyalefwaya ukwipaya Yesu ilyo ali pe sonde. Baletontonkanya ukuti imipepele yabo e yali iya cine. Batile: “Tuli na Shifwe, ni Lesa.” Bushe Yesu alibasuminishe? Iyo! Abebele ati: “Imwe muli ba kwa shinwe Kaseebanya.” (Yohane 8:41, 44) Abantu abengi ilelo batontonkanya ukuti babombela Lesa, lelo untu babombela ni Satana ne fibanda fyakwe!—1 Abena Korinti 10:20.

Ababa mu mipepele ya bufi bacita ifyabipa, kwati fye ni fintu umuti ubi utwala ifisabo fyabipa. Mwi sonde mwaisula amacushi ayengi pa mulandu wa fintu fyabipa abantu bacita. Mwaba bucisenene, ukulwa, ukwiba, ulufyengo, ukwipaya, no kupatikisha ukulaalana. Abengi abacita ifi fintu fyabipa balaya na mu kupepa, lelo imipepele yabo taibalenga ukucita ifisuma. Te kuti babe ifibusa fya kwa Lesa nga tabalekele ukucita ifyabipa.—Mateo 7:17, 18.

Imipepele ya bufi isambilisha abantu ukupepa utulubi. Lesa alikaanya ukupepa utulubi. Alicita fye bwino pa kukaanya. Bushe kuti mwaumfwa bwino nga umuntu talanda na imwe lelo alanda fye ne cikope cenu? Bushe uyo muntu kuti aba cibusa wenu uwa pa mutima? Awe, te kuti abe. Yehova afwaya abantu ukulalanda nankwe, te kulalanda ne cabaswa nelyo icikope cishaba na bumi.—Ukufuma 20:4, 5.

Imipepele ya bufi isambilisha ukuti caliba fye bwino ukwipaya abantu mu nkondo. Yesu asosele ukuti ifibusa fya kwa Lesa fyali no kutemwana. Tatwipaya abantu twatemwa. (Yohane 13:35) Calilubana fye no kwipaya abantu babipa. Yesu tasuminishe abasambi bakwe ukulwa pa kuti bamucingilile lintu abalwani bakwe baishile mu kumwikata.—Mateo 26:51, 52.

Imipepele ya bufi isambilisha ukuti ababifi bakayapya mu mulilo. Lelo Baibolo itila ulubembu lutwala ku mfwa. (Abena Roma 6:23) Yehova ni Lesa wa kutemwa. Bushe Lesa wa kutemwa kuti alungulusha abantu ku ciyayaya? Te kuti acite fyo! Mu Paradise mukaba fye imipepele imo intu Yehova asuminisha. (Ukusokolola 15:4) Tamwakabe imipepele yonse iyashimpwa pa bufi bwa kwa Satana.