Ifipusho Ukufuma ku Babelenga

Bushe inumbwilo “ukupeelwa ica bupe ca mupashi,” iisangwa pali 1 Abena Korinti 14:37, NW, ipilibula ukuti umuntu napokelela umupashi wa mushilo mu mano ya kusubwa, nelyo bushe cipilibula ukuti nakwata ica bupe ca mu cisungusho ukufuma ku mupashi?

Muli New World Translation of the Holy Scriptures, ici cikomo cibelengwo kuti: “Nga ca kuti uuli onse aitunga ukuba kasesema nelyo ukupeelwa ica bupe ca mupashi, apokelele ifintu ndelemba kuli imwe, pantu fyaba lifunde lya kwa Shikulu.”—1 Abena Korinti 14:37.

Kabelenga kuti abuula ilongo lya mashiwi “ukupeelwa ica bupe ca mupashi” pamo ngo kuloshako ku cishinka ca kuti Abena Kristu ba mu mwanda wa myaka uwa kubalilapo balisontelwe no mupashi no kusanguka abana baume ba ku mupashi aba kwa Lesa. Nelyo ilongo lya mashiwi kuti lyaumfwikwa ukubomba kuli umo uwapokelele ica bupe caibela ica mupashi wa mushilo. Ubu bupilibulo bwalekeleshako e bupalisheko, nga fintu ifyashingulukako fyaafwo kulanga.

Umutumwa Paulo pano abomfeshe iciGreek pneu·ma·ti·kosʹ, icakwata amano ya kutendekelako aya “ukukuma ku mupashi, ica bumupashi.” Imisango ya liko yalibomfiwa mu bulondoloshi “umubili wa bumupashi,” “ipaalo . . . lya bumupashi,” ‘mucetekanya wa bumupashi,’ ne “ŋanda ya bumupashi.”—1 Abena Korinti 15:44; Abena Efese 1:3; Abena Kolose 1:9; 1 Petro 2:5.

Muli iyo milandu, Baibolo ilondolola umutwe we lyashi (umubili, ipaalo, umucetekanya, iŋanda) uyo “bumupashi” bulelondolola. Lelo mu milandu imbi, imfundo no kupilibulwa kwalinga ukwa “bumupashi” kuti fyaishibikilwa ukufuma ku mashiwi yashingulwikeko. Ku ca kumwenako, 1 Abena Korinti 2:14, 15 acilanya imibele ya mutima wa muntu wa bumubili kuli iyo iya wa ho pneu·ma·ti·kosʹ, iyo mu kubamo kupelulula ipilibula “umuntu wa bumupashi.”

Abena Korinti ba kubalilapo ifipandwa 12 ukupulinkana ku 14 1Cor 12:14 batontomesha pa fya bupe fya cisungusho ifya mupashi wa mushilo. Lesa apeele ifi ku Bena Kristu ba mu kubangilila bamo ku kulangilila ukuti talebomfya na kabili Israele wa cifyalilwa lelo nomba alepaala “Israele wa kwa Lesa” uwa Bwina Kristu. (Abena Galatia 6:16) Pa lwa ifi fya bupe, Paulo alembele ukuti: “Awe kuli ukulekana kwa fya bupe ifya kusenamina, lelo [umupashi] umo wine.” (1 Abena Korinti 12:4) Amano yaibela, ukwishiba, ne citetekelo fyali pa kati ka fya bupe fya mupashi, nga fintu ukusesema, ukulandila mu ndimi, no kwilula indimi fyali.—1 Abena Korinti 12:8-11.

Abena Kristu mu Korinti abo Paulo alembele bali abasubwa no mupashi wa mushilo uwa kwa Lesa. Paulo atile: “Lelo mwalisambilwe, lelo mwalishishiwe, lelo mwalungamikilwe kwi shina lya kwa Shikulu Yesu Kristu na mu [mupashi] wa kwa Lesa wesu.” (1 Abena Korinti 6:11; 12:13) Ee, bonse balipokelele “[umupashi] e cikatilo.” (2 Abena Korinti 5:5) Nangu cibe fyo, te bonse bapokelele ica bupe caibela ukupitila mu mupashi wa mushilo. Kabili cilemoneka ukuti abengi balicebushiwe no kulandila mu ndimi, ukukakatika ubucindami bwacishamo kuli ici ca bupe. Paulo alembele ku kulungika ukutontonkanya kwabo kabili asonteleko kuti indimi tashali na kunonsha abantu abengi nge fyali no kucita ica bupe ca kusesema. Pa mpela ya cipandwa 12, Paulo apandile amano abena Korinti ukuti: “Bikeni umutima pa fya bupe ifyacilamo.”—1 Abena Korinti 12:28-31.

Lyene, pa kutampa kwa cipandwa 14, acincishe ukuti: “Konkeni ukutemwa; kabili bikeni imitima pa fya [pneu·ma·ti·kaʹ], lelo icacilamo ukuti museseme.” Ukubika imitima pali finshi? Abo Bena Kristu tabakabile ukubika imitima pa kusubwa ku mupashi, pa mulandu wa kuti kale kale balisubilwe. Mu kubamo kupelulula Paulo apilibwile “ifya bupe” fya mupashi, ifyo wene, pa mpela ya cipandwa 12, abacincishe ukubikapo imitima. Muli ifyo, New World Translation of the Holy Scriptures ipilibula 1 Abena Korinti 14:1 ukuti: “Twalilileni mu kupimpa ukufwaya ifya bupe fya bumupashi.” Amabupilibulo ya Baibolo yambi pano yapilibula pneu·ma·ti·kaʹ “ifya bupe fya bumupashi” nelyo “ifya bupe fya Mupashi.”

Mu kuba ne fyo fyebo, twamona ukuti mupepi na ku kwisalila icipandwa 14, Paulo asuntinkanya ukusesema na pneu·ma·ti·kosʹ. Pamo nga mu 1Cor 14 cikomo 1, ifilelandwapo fitubululo kuti apilibwile ukupeelwa ica bupe ca mupashi. The New Testament in Modern Speech, kuli R. F. Weymouth, apokelela ubupilibulo bwa kuti: “Nga ca kuti uuli onse aitunga ukuba kasesema nelyo umuntu uwakwata ifya bupe fya bumupashi, eluke pamo nge funde lya kwa Shikulu ifyo ndelemba nomba.”

Ee, Abena Kristu bonse, nampo nga balikwete ica bupe ca kusesema nelyo ica bupe icili conse cimbi ica mupashi, bakabile ukupokelela no kukonka ukufunda uko Paulo alembele ukukuma ku fyo ifintu filingile ukubombwa mu cilonganino.