Bushe Uleibukisha?

Bushe walitesekesha ukubelenga abafuma aba nomba line aba Ulupungu lwa kwa Kalinda? Cisuma, mona nga kuti wayasuka ifipusho fyakonkapo:

▫ Mulandu nshi Abena Kristu ba mu kubangilila bashasefeshe ubushiku bwa kufyalwa kwa kwa Yesu?

Ukulingana na The World Book Encyclopedia, “Abena Kristu ba mu kubangilila tabalesefya ukufyalwa [kwa kwa Yesu] pantu balangulwike ukusefya kwa bushiku bwa kufyalwa kwa uli onse nge cibelesho ca cisenshi.”—12/15, ibula 4.

▫ Bushe amapepo yalingile ukulungatikwa kuli Yesu?

Iyo, pa mulandu wa kuti amapepo yaba musango wa kupepa uko kwaba kwa kwa Lesa Wa maka yonse eka. Pa kulungatika amapepo yesu yonse kuli Yehova Lesa, tulangilila ukuti twalikatamika ukukambisha kwa kwa Yesu ukwa kupepa ati: “Shifwe wa muulu.” (Mateo 6:9)—12/15, ibula 25.

▫ Mulandu nshi ubupingushi bwapusanako bwacitilwe ku lubembu lwabipisha ulwa Mfumu Davidi ukulinganya ku membu sha kwa Anania na Safira? (2 Samwele 11:2-24; 12:1-14; Imilimo 5:1-11)

Ulubembu lwa Mfumu Davidi lwali pa mulandu wa bunake bwa ku mubili. Lintu atununwikwe no kwebwa ico acitile, alilapile, kabili Yehova alimulekelele—nangu ca kuti aali no kucula ifya kufumamo fya lubembu lwakwe. Anania na Safira balibembwike mu kuti balibepele mu bumbimunda, ukwesha ukukopeka icilonganino ca Bwina Kristu na muli fyo ‘babepele umupashi wa mushilo na Lesa.’ (Imilimo 5:3, 4) Ico cashinine ukuba bushininkisho bwa mutima uubifi, e co bapingwilwe icabipisha.—1/1, amabula 27, 28.

▫ Cinshi cingatwaafwa ukubombela Yehova no kubuuta ku mutima?

Tulingile ukulundulula imimwene yashininkishiwa kabili iyabamo kutasha iya mapaalo yesu na mashuko ya mulimo ayapeelwa na Lesa, kabili tatufwile ukulaba ukuti pa kukonka Icebo ca kwa Lesa, tulamutemuna.—1/15, amabula 16, 17.

▫ Fintu nshi fibili tufwile ukusunga mu muntontonkanya nga tuli no kupeela ukukoselesha kufumamo cimo?

Ica kubalilapo, tontonkanya pa lwa ca kusosa pa kuti ukukoselesha kube ukwa kulungatika. Ica bubili, fwailishako akashita ka kutununuka umuntu uulekabila ukutasha nelyo ukukuulililwa.—1/15, ibula 23.

▫ Mulandu nshi “ibumba likalamba” bakwatile “misambo ya tuncindu mu minwe yabo”? (Ukusokolola 7:9)

Ukushinshika imisambo ya tuncindu kulangilila ukuti “ibumba likalamba” mu kusekelela bawila Ubufumu bwa kwa Yehova ne Mfumu yakwe iyasubwa, Yesu Kristu. (Mona Ubwina Lebi 23:39, 40.)—2/1, ibula 17.

▫ Masambililo nshi ayakatama ayasangwa mwi buuku lya kwa Yobo?

Ibuuku lya kwa Yobo litulanga ifya kubombela pa mpika. Lipayanya ifya kumwenako fya kwebekesha ifya fintu tulingile ukusosa na fintu tushilingile ukusosa lintu tulefunda uulepita mu mpika. Mu kulundapo, ica kukumanya cine ica kwa Yobo kuti catwaafwa ukubomba mu kushikatala lintu twaisanga fwe bene natushingwa ne mibele yabipisha.—2/15, ibula 27.

▫ Cinshi cintu ifipesha amano fya kwa Yesu fitusambilisha?

Ifipesha amano fya kwa Yesu filacindika Lesa, ukwimika icipasho ku Bena Kristu ukucindika Lesa. (Abena Roma 15:6) Fikoselesha ukucite cisuma, ukulangisha bukapekape, no kulangishe cililishi.—3/1, ibula 8.

▫ Mulandu nshi baeluda bapitulukila mu fipusho fyapekanishiwa na baipeela abapya?

Ici cishininkisha ukuti uulebatishiwa umo na umo naumfwikisha mu kukumanina ifisambilisho fya kutendekelako ifya Baibolo kabili ali uwaibukila pa cabimbwamo mu kube Nte ya kwa Yehova.—3/1, ibula 13.

▫ Ni shani fintu amapepo ya mu Baibolo yengatunonsha?

Ukupitila mu kubebeta amapepo ya mu Malembo, kuti twaishiba ayapepelwe na baali mu mibele iyapalana ne yesu. Ukusanga amapepo ya musango yo, ukuyabelenga, no kwetetula pali yene kuti kwayafwa ukulenga ukulanshanya kwesu kwine na Yehova ukubamo bupilibulo.—3/15, amabula 3, 4.

▫ Akatiina ka bukapepa cinshi?

Akatiina ka bukapepa kaba mwenso wa kuli Yehova, ukucindikisha kwashika ukwa kuli wene, ukwendela pamo no kutiina kwabamo butuntulu ukwa kukanafwaya ukumufulwisha. (Ilumbo 89:7)—3/15, ibula 10.

▫ Ni mu nshila nshi shitatu umo Baibolo ilangishisha ukuti twalyumo mutengo mu menso ya kwa Lesa?

Baibolo isambilisha ukuti umo na umo uwesu alikatama mu menso ya kwa Lesa (Luka 12:6, 7); ilalenga ukumfwika cintu Yehova akatamika muli ifwe (Malaki 3:16); kabili ishimika cintu Yehova aacita ku kulangisha ukuti alitutemwa. (Yohane 3:16)—4/1, amabula 11, 12, 14.

▫ Mulandu nshi amashiwi ya pa AbaHebere 10:24, 25 yacilila pa kuba fye ikambisho lya kuti Abena Kristu balelongana capamo?

Aya mashiwi ya kwa Paulo yapeela icipimo capuutwamo na bulesa ica pa kulongana kwa Bwina Kristu konse—mu cine cine, ku kashita akali konse lintu Abena Kristu balebishanya capamo.—4/1, ibula 16.