Bushe Uleibukisha?

Bushe nusanga bamagazini ba nomba line aba Ulupungu lwa kwa Kalinda ukuba aba mutengo ubomba kuli iwe? Lyene mona nga uleibukisha pa kubomfya ifipusho fyakonkapo:

◻ Cinshi twingasambililako ku kuwa kwa bena Amone? (Sefania 2:9, 10)

Yehova tatekelesha ukubwesesha ubukalushi pa cikuuku cakwe, kabili mu nshita yakwe iyalinga, na kabili akacitapo cimo, nga fintu fye acitile mu nshita sha pa kale. (Linganyako Ilumbo 2:6-12.)—12/15, ibula 10.

◻ Ni mu nshila nshi umo Abena Kristu bakwatila umutende?

Intanshi, balikwato “mutende kuli Lesa muli [Shikulwibo] Yesu Kristu.” (Abena Roma 5:1) Ica bubili, balikwata umutende pa kati ka bene na bene pa kulundulula “amano ayafuma mu muulu,” ayo “pa kubala yantu ya musangwela, e lyo ya mutende.” (Yakobo 3:17)—1/1, ibula 11.

◻ Fintu nshi fimo ifyo Icebo ca kwa Lesa capashanishiwako, kabili ni mu nshila nshi ici cabela ica kwaafwa kuli ifwe?

Icebo ca kwa Lesa capashanishiwa ku mukaka wabamo mulyo, ku filyo fyakosa, ku menshi ya kupembesula kabili ayasangulula, ku cilola, na ku lupanga ulwatwa. Ukumfwikisha cintu ishi numbwilo shipilibula kulaafwa umutumikishi ukubomfya Baibolo mu kulamuka.—1/1, ibula 29.

◻ Cinshi cintu amasomo yashikatala aya ku mubili yalingile ukutwaafwa ukucita?

Ukubelenga bwino, ukulemba bwino, ukulunduluka lwa ku muntontonkanya na mu mibele isuma, no kunonka ukukanshiwa kubomba ukukabilwa ku mikalile ya cila bushiku no kubomba umulimo washila mu kufumamo cimo.—2/1, ibula 10.

◻ Lisambililo nshi ilyaumo mutengo ukukuma ku masomo twingasambilila ukufuma kuli Yesu?

Amasomo yalingile ukubomfiwa, te ku kuikatamika fwe bene, lelo ku kulumbanya Kasambilisha wakulisha, Yehova Lesa. (Yohane 7:18)—2/1, ibula 10.

◻ Ubufumu bwa kwa Lesa cinshi?

Ubufumu bwaba ni kamfulumende waimikwa na Lesa uwa mu muulu uukafishapo ukufwaya kwa kwa Lesa ku kufumyapo ifyafuma mu lubembu ne mfwa no kubwesha imibele yalungama pe sonde. (Daniele 2:44; Ukusokolola 11:15; 12:10)—2/1, ibula 16.

◻ Ni shani fintu Baibolo ipayanya amasomo ayakabilwa ku kupwisha ulukaakala limo na limo?

Ukupitila mu Cebo cakwe, Baibolo, Yehova alasambilisha abantu ukutemwa umutende no bulungami. (Esaya 48:17, 18) Icebo ca kwa Lesa calikwata amaka ya kupeka no kufika pa mutima wa muntu, ukwalula ukutontonkanya kwakwe ne mibele. (AbaHebere 4:12)—2/15, ibula 6.

◻ Ni mu nshila nshi umo ubusesemo bwa kwa Esaya icipandwa 35 bwingasoselwa ukuti bwakwata ukufikilishiwa kutatu?

Ubusesemo bwa kwa Esaya intanshi bwafikilishiwe lintu abaYuda babwelulwike ukufuma muli bunkole ku Babele mu 537 B.C.E. Bwalitwalilila ukufikilishiwa ilelo ukutula pa kukakulwa kwa kwa Israele wa ku mupashi ukufuma muli bunkole bwa Babele Mukalamba. Kabili buli no kufikilishiwa umuku walenga butatu mu kulundana no kwebekesha kwa Baibolo ukwa mibele ya paradise wa cine cine pano isonde. (Ilumbo 37:10, 11; Ukusokolola 21:4, 5)—2/15, ibula 17.

◻ Ni shani fintu ubuseko ubo Lesa akwata mu bantunse bwalangishiwe mu fipesha amano ifyacitile Umwana wakwe, Yesu?

Apantu Yesu “te kuti acite kantu eka, kano ico amona Wishi acita,” icililishi cakwe cilangilila imibele ya kukafyo mutima iya kwangwako kwa kwa Yehova kuli umo umo uwa babomfi bakwe. (Yohane 5:19)—3/1, ibula 5.

◻ Bushe inumbwilo ya kwa Yesu iya kuti “inshishi sha cibukisho” (NW) iyabomfiwa pali Yohane 5:28, 29 yalola mwi?

Ishiwi lya ciGriki mne·mei’on (inshishi ya cibukisho) ilyabomfiwa pano lilangilila ukuti Yehova alebukisha imibombele ya muntu uwafwa, ukusanshako imibele yakwe iyo apyene ne cibukisho cakwe conse. Ici cishininkisha apakalamba ukuti Lesa alasakamana abantunse ngo muntu umo umo!—3/1, ibula 6.

◻ Bukombe nshi ubwa kusoka busangwa mu busesemo bwa kwa Sefania ubwingatwaafwa ilelo?

Ilelo taili ni nshita ya kuleka ukutwishika ukulimbe mishila mu mitima yesu no kutantalisha mu mintontonkanya yesu ukwisa kwa bushiku bwa kwa Yehova. Na kabili, tulingile ukuba abapempwila pa kwambukila kunenuna ukwa kukanayangwako. (Sefania 1:12, 13; 3:8)—3/1, ibula 17.

◻ Mulandu nshi bucishinka kuli Lesa bwabela kusonsomba?

Pantu bucishinka bulapinkana no kukongama kwa kaso uko twapyana ku bafyashi besu. (Ukutendeka 8:21; Abena Roma 7:19) Icacilapo kucindama, Satana ne fibanda fyakwe balipampamina pa kutulenga ukuba ababulwa bucishinka kuli Lesa. (Abena Efese 6:12; 1 Petro 5:8)—3/15, ibula 10.

◻ Ni mu mbali nshi shine umo tulingile ukulangishamo bucishinka, kabili cinshi cili no kutwaafwa ukucite fyo?

Imbali shine shaba ni bucishinka kuli Yehova, ku kuteyanya kwakwe, ku cilonganino, na ku banensu ba mu cupo. Ica kwaafwa cimo pa kulangisha bucishinka muli ishi mbali caba kutesekesha ukuti ukusonsomba kwa bucishinka kwalisuntinkana no kwebelwa kwa bumulopwe bwa kwa Yehova.—3/15, ibula 20.

◻ Cinshi twingasambililako ku co Davidi akumenye ilyo aleesha ukutwala icipao ca cipingo ku Yerusalemu? (2 Samwele 6:2-7)

Davidi asuulile amakambisho ayo Yehova apeele ukukuma ku kusendwa kwa Cipao, kabili ici caleteleko akayofi. Isambililo lili lya kuti tatulingile ukupeela Yehova umulandu pa mafya ayafumamo lintu twasuula amakambisho yakwe ayamonekesha. (Amapinda 19:3)—4/1, amabula 28, 29.