Ibungano lya mu 1996 ilya “Inkombe sha Mutende wa Bukapepa”

MU NSHITA sha ku kale abantu ba kwa Yehova balesefya imitebeto ikalamba itatu cila mwaka. Mu nshila kwena iyapalako, muno nshiku abantu abetilwa pe shina lya kwa Yehova balalongana imiku itatu pa mwaka ku kukwata utushita twa mitebeto. Balaipakisha ukulongana kwa bushiku bumo ukwaibela, ukulongana kwa muputule ukwa nshiku shibili, ne bungano lya citungu ilya nshiku shitatu atemwa shine. Uno mwaka, umutwe we bungano lya citungu uleti “Inkombe sha Mutende wa Bukapepa.”

Fintu uyu mutwe uli uwalinga! Lesa wesu, Yehova, ni “Lesa wa mutende,” ee, “Lesa [uupeelo, NW] mutende.” Intungulushi yesu, Yesu Kristu, ni “Cilolo wa mutende,” kabili ubukombe ubo ababomfi ba kwa Yehova baleta bwaba bukombe bwa mutende wa bukapepa. (Abena Filipi 4:9; Abena Roma 15:33; Esaya 9:6; Nahumu 1:15) Programu we bungano uushaiwamina natantikwa uyo uuli no kwaafwa bonse ukutesekesha mu kucilapo ubucindami bwa mutende wa bukapepa.

Uno mwaka mu Zambia mweka, mukaba amabungano 46. Napamo kwena, kukabako ibungano mupepi na kuntu wikala. Mulandu nshi tawingepushishe Nte sha kwa Yehova uko wikala pa lwa nshiku ne cifulo likabelako lyene ukatantike ukusangwako? Bonse abafwaya umutende wa cine, uubelelela bakapokelelwa mu cikabilila.