Ilyashi lya Bakabilisha ba Bufumu

“Amafunde Yenu Yonse ya Cine Cine”

MU KWIPIPA pa ntanshi ya mfwa yakwe, Mose akonkomeshe abena Israele ukumfwila amafunde ya kwa Yehova yonse. Atile: “Bikeni imitima yenu pa fyebo fyonse ifyo ndeshimika kuli imwe lelo, ifyo mukalafunda abana benu ku kwangwo kucite fyebo fyonse fya malango aya. Pantu te cintu ca fye kuli imwe; mweo wenu.”—Amalango 32:46, 47.

Imyanda ya myaka pa numa, kemba wa malumbo aebekeshe ubucindami bwa fisambilisho fya kwa Lesa fyonse lintu atile: “Muli mupepi, mwe Yehova, na ’mafunde yenu yonse ya cine cine.” (Ilumbo 119:151) Mu mwanda wa myaka uwa kubalilapo, Yesu umwine alilosesheko ku bucindami bwa “cebo conse icifuma ku kanwa ka kwa Lesa.” (Mateo 4:4) Kabili pe samba lya butungulushi bwa kwa Lesa umutumwa Paulo alembele ukuti “Amalembo yonse yantu yapuutwamo kuli Lesa, kabili ya mulimo.”—2 Timote 3:16.

Mu kumonekesha, Yehova Lesa enekela bakapepa bakwe ukulanguluka mu kusakamanishisha ubukombe bonse ubwapeelwa kuli ifwe ukupitila mu mabula ya Cebo cakwe. Takwabako iciputulwa nangu cimo mu Baibolo icishacindama. E fyo Inte sha kwa Yehova bayumfwa pa lwa Cebo ca kwa Lesa, nga fintu cilelangililwa ku ca kukumanya cakonkapo ukufuma ku Mauritius.

Umwaume we shina lya D—aleikala mu kati ka mushi, umo alebomba nga malonda. Pa nshita ntali, mu kufumaluka alefwayafwaya inshila yalungama iya kupepelamo Lesa. Ubushiku ilyo aali pa mulimo wakwe uwa bumalonda, atendeke ukubelenga Baibolo. Mu kupita kwa nshita alipwishishe ukubelenga yene ukufuma ku nkupo ukufika ku nkupo. Aishibe ukuti ishina lya kwa Lesa ni Yehova—ishina ilimoneka imiku iingi muli Baibolo wakwe uwa ciHindi. Asangile ukuti ibuuku lya Ukusokolola e lyacishishemo ukucebusha.

Lyene atendeke ukulanguluka nga kwaliko imipepele iyalekonka Baibolo yonse fye. Amwene ukuti imipepele aishibe, yaleeshako fye ukukonka imbali shimo isha Baibolo. Imipepele imo yalipokelele Amalembo ya ciHebere no kukaana Amalembo ya Bwina Kristu aya ciGriki. Imipepele imbi yalesuula Amalembo ya ciHebere, ukukatamika fye Amalembo ya Bwina Kristu aya ciGriki ukuti e yabomba.

Kasuba kamo uyu mwaume we shina lya D—amwene abaupana babili balelokwa ku mfula no kubeba ukuti bengoobako mu ŋanda mu mwakwe. Baali ni Nte sha kwa Yehova. Umukashi aali ne citabo ca Ukusokolola—Akalume ka Kuko Kakalamba Nakapalama! mu minwe yakwe.a Apo pene uyu musambashi D—abalombele ici citabo. Inte shamwebele ukuti ifyebo fyaba mu busesemo bwa Ukusokolola fyali ifyashikisha ica kuti taali nakufyumfwikisha, e co bamutambike ulupapulo lumbi mu cifulo ca ico. Lelo umwaume D—apampamine fye ukuti bamupe icitabo ca Ukusokolola.

Lintu ashele ne ci citabo, abelengele cene mu kwangufyanya. Lyene atendeke ukusambilila Baibolo ne Nte sha kwa Yehova. Mu kwangufyanya alyebekeshiwe ku cishinka ca kuti Inte balicindika Baibolo onse. Atendeke ukusangwa ku kulongana lyonse pa Ŋanda ya Bufumu iya Nte sha kwa Yehova, apo Amalembo ya ciHebere na Amalembo ya Bwina Kristu aya ciGriki yonse yasambililwa mu kusakamanishisha. Pali nomba ni kabilisha wa Bufumu kabili icilundwa cabatishiwa ica cilonganino ca Bwina Kristu.

[Futunoti]