Belenga Icebo ca Kwa Lesa no Kumubombela mu Cine
“Nangeni inshila yenu, mwe Yehova, nalaenda mu cishinka cenu.”—ILUMBO 86:11.
1. Mu kubangilila fye, cinshi cintu uwafumine uwa kubalilapo uwa uno magazini asosele ukukuma ku cine?
YEHOVA alatuma ulubuuto ne cishinka. (Ilumbo 43:3) Na kabili alatupeela amaka ya kubelenga Icebo cakwe, Baibolo, no kusambilila icine. Uwafumine uwa kubalilapo uwa uno magazini—July 1879—atile: “Icine, ukupala iluba linono ilyafumba mu matololo, cilatabililwa kabili ni cikanga fye fikalolo fishaifulila ifyabamo ifilubo fitushe cene. Pa kuti wingacisanga ulekabila ukuba uwapempwila lyonse fye. Pa kuti wingamona ukuyemba kwa ciko ulekabila ukutandula fikalolo fya filubo na bakalanangwa ifya bantu ba bumano kuikwatila. Nga ulefwaya ukucikwata ufwile ukwinamako pa kucibuula. Wiikushiwa fye ne luba limo ilya cine. Nga ca kuti iluba lya cine limo fye e lyalekabilwa nga takwali ayafulilako. Twalilila ukulonganika, twalilila ukufwayafwaya.” Ukubelenga Icebo ca kwa Lesa kutulenga ukunonka ukwishiba kwalungikwa no kwenda mu cine cakwe.—Ilumbo 86:11.
2. Cinshi cafuminemo lintu Esra na bantu bambi babelengeele abaYuda Amalango ya kwa Lesa mu Yerusalemu wa pa kale?
2 Pa numa ifibumba fya Yerusalemu fibe nafikuulwa cipya cipya mu 455 B.C.E., shimapepo Esra na bantu bambi babelengeele abaYuda Amalango ya kwa Lesa. Lyene pakonkele Umutebeto wa Nsakwe uwabamo buseko, ukuyase membu, no kucite “cipingo ca cishinka.” (Nehemia 8:1–9:38) Tubelengo kuti: “Balebelenga mwi buuku, mu malango ya kwa Lesa, baletungulula, no kushilimuna, no kuleka beluke icabelengwa.” (Nehemia 8:8) Bamo batila abaYuda tabaleumfwikisha bwino iciHebere na muli fyo kwaliko ukusupawila mu ciAramaic. Lelo ilembo talilangilila ukuti kwali fye ukulondolola mu kulengama inumbwilo shimo isha lulimi. Esra na bambi balelondolola Amalango pa kuti abantu bengatesekesha ifishinte fya yako no kufibomfya. Impapulo sha Bwina Kristu no kulongana na fyo fyabelako ku “kushilimuna” mu Cebo ca kwa Lesa. E ficita na baeluda basontwa, ‘abakampuko kusambilisha.’—1 Timote 3:1, 2; 2 Timote 2:24.
Ubunonshi Bubelelela
3. Bunonshi nshi bumo ubufuma mu kubelenga Baibolo?
3 Lintu indupwa sha Bwina Kristu shabelengela Baibolo capamo, mu kupalishako bali no kusanga ubunonshi bubelelela. Baleshiba amafunde ya kwa Lesa no kusambilila icine pa lwa fifundisho, amasesemo, na malyashi yambi. Pa numa iciputulwa ca muli Baibolo cabelengwa, umutwe wa ŋanda kuti pambi aipusha ukuti: Ni shani fintu ici cilingile ukutwambukila? Ni mu nshila nshi umo ici campanine ne fisambilisho fya Baibolo fimbi? Ni shani fintu twingabomfya ifi fishinka mu kushimikila imbila nsuma? Ulupwa lulashilimuka mu kulundapo pa kubelenga Baibolo nga ca kuti balesapika ifyebo ukupitila mu kubomfya Watch Tower Publications Index nelyo ifisontelelo fimbi. Ifitabo fibili ifya Insight on the Scriptures kuti fyaloshiwako mu kuba no bunonshi bwine bwine.
4. Ni shani fintu Yoshua aali no kubomfya amakambisho yalembwa pali Yoshua 1:8?
4 Ifishinte fifuma mu Malembo kuti fyatutungulula mu bumi. Mu kulundapo, ukubelenga no kusambilila ‘amalembo ya mushilo kuti kwatulenga ukuba na mano ayalosha ku kupusuka.’ (2 Timote 3:15) Nga ca kuti twaleka Icebo ca kwa Lesa ukututungulula, tukatwalilila ukwenda mu cine cakwe kabili ukufwaisha kwesu ukwalungama kuli no kufikilishiwa. (Ilumbo 26:3; 119:130) Nangu cibe fyo, tulekabila ukusokota umucetekanya, nga fintu Yoshua uwapyene Mose acitile. ‘Ibuuku lya malango’ talyali na kufuma mu kanwa kakwe, kabili aali no kubelenga muli lyene akasuba no bushiku. (Yoshua 1:8) Ukukanaleka ‘ibuuku lya malango’ ukufuma mu kanwa kakwe kwapilibwile ukuti Yoshua taali na kuleka ukwebako bambi ifintu fya kubuutusha ifyo ibuuku lyalesosa. Ukubelenga mu Malango akasuba no bushiku kwapilibwile ukuti Yoshua aali no kwetetula pali yene, aali no kuyasambilila. Mu kupalako umutumwa Paulo acincishe Timote ‘ukuba no mute’—ukwetetula—pa myendele yakwe, ubutumikishi, no kusambilisha. Pamo nga eluda wa Bwina Kristu, Timote alekabila ukuba uwasakamanishisha ukuti imikalile yakwe yali ya ca kumwenako no kuti aalesambilisha icine ca mu Malembo.—1 Timote 4:15.
5. Cinshi cikabilwa pa kuti twingasanga icine ca kwa Lesa?
5 Icine ca kwa Lesa caba cuma caumo mutengo. Pa kusanga cene cifwaya ukwimba, ukufwayafwaya Amalembo mu mukoosha. Tuli no kunonka amano no kufika ku kumfwikisha akatiina kabamo kucindikisha aka kuli Yehova lyeka fye lintu twaba abasambi bapalo twaice aba kwa Kasambilisha Wakulisha. (Amapinda 1:7; Esaya 30:20, 21) Kwena, tulingile ukushinina ifintu ukupitila mu Malembo. (1 Petro 2:1, 2) AbaYuda ba mu Berea “bali abakankaala ukucila balya ba mu Tesalonika, ico bapokelele icebo no kucankwa konse, balefwayafwaya mu malembo akasuba na kasuba, beshibe ifi fintu [ifyalelandwa na Paulo] nga ni fyo fine.” Mu cifulo ca kushimaula abena Berea Paulo alibatashishe pa kucite ci.—Imilimo 17:10, 11.
6. Mulandu nshi Yesu engalangilila ukuti tacanonseshe kantu abaYuda bamo pa kulafwayafwaya mu Malembo?
6 Yesu aebele abaYuda bamo ukuti: “Mufwayafwaya mu malembo, ico imwe mutontonkanyo kuti e mwabo mweo wa muyayaya; kabili yalya e yalenshimiko bunte; kabili tamufwayo kwisa kuli ine, ukuti mube no mweo.” (Yohane 5:39, 40) Balefwayafwaya mu Malembo mu kuba no buyo busuma—ubwa kuti yene yali no kubatungulula ku mweo. Mu cine cine, Amalembo yakwetemo amasesemo pa lwa kwa Mesia ayo yalesontelela kuli Yesu nge nshila ya ku mweo. Lelo abaYuda balimukeene. Ukufwayafwaya mu Malembo, kanshi, takwabanonseshe.
7. Cinshi cikabilwa pa kuti tukule mu kumfwikisha Baibolo, kabili mulandu nshi?
7 Pa kukula mu kumfwikisha kwesu Baibolo, tukabila ubutungulushi bwa mupashi wa kwa Lesa, nelyo amaka yabomba. “Umupashi upenenga fyonse, ne fyashika fya kwa Lesa” pa kuti ubupilibulo bwa fiko bwingomfwika. (1 Abena Korinti 2:10) Abena Kristu ba mu Tesalonika balekabila ‘ukulingulula fyonse’ ifyali mu masesemo ayo baumfwile. (1 Abena Tesalonika 5:20, 21) Lintu Paulo alembeele abena Tesalonika (mupepi na 50 C.E.), iciputulwa fye ceka ica Amalembo ya ciGriki icali nacilembwa cali Lilandwe lya kwa Mateo. E co abena Tesalonika na bena Berea baali no kulingulula fyonse, mu kupalishako ukupitila mu kubebeta ubupilibulo bwa ciGriki ubwa Septuagint ubwa Amalembo ya ciHebere. Baalekabila ukubelenga no kusambilila Amalembo, e fyo na ifwe bene tukabila ukucita.
Caba Icacindama Kuli Bonse
8. Mulandu nshi baeluda basontwa balingile ukwishibisha Baibolo?
8 Baeluda basontwa balingile ukwishibisha Baibolo. Bafwile ukuba ‘abakampuko kusambilisha’ kabili bafwile ‘ukwikatishe Cebo ca cishinka.’ Kangalila Timote aali no ‘kulungiko kusose cebo ca Cine.’ (1 Timote 3:2; Tito 1:9; 2 Timote 2:15) Nyina, Yunike, na nakulu Loisi balimusambilishe amalembo ya mushilo ukutula ku bunya, ukulimba “icitetekelo ica cishinka” muli wene, nangula cingati wishi aali uushasumina. (2 Timote 1:5; 3:15) Bashibo basumina baali no kulela abana babo “mu kufunda no kukonkomesha kwa kwa Shikulu,” kabili ukucilisha baeluda abali bafyashi bafwile ukukwata “bana abatetekela, abashaba na kushininwa kwa kuipoosaika nangu bucintomfwa.” (Abena Efese 6:4; Tito 1:6) Nampo nga tuli baeluda nelyo iyo, tulekabila ukukatamika nga nshi ukukabila kwa kubelenga, ukusambilila, no kubomfya Icebo ca kwa Lesa.
9. Mulandu nshi uwa kusambilila Baibolo capamo na Bena Kristu banensu?
9 Na kabili tulingile ukusambilila Baibolo capamo na basumina banensu. Paulo afwaile Abena Kristu ba mu Tesalonika ukulanshanya capamo ukufunda kwakwe. (1 Abena Tesalonika 4:18) Pa kuwamyako ukumfwikisha kwesu ukwa cine, cili bwino ukuilunda ku basambi bambi abaipeelesha ku kubebeta Amalembo. Ipinda lya kuti, “Icela cinone cela, no muntu anone cinso ca mubiye,” lyaba lya cine cine. (Amapinda 27:17) Icela kuti caba ne ndalawa nga ca kuti tacilebomfiwa no kunonwa. Mu kupalako, tulekabila ukulalongana lyonse no kunonana pa kulanshanya ukwishiba uko twanonka ukufuma mu kubelenga, ukusambilila, no kwetetula pa cine ca mu Cebo ca kwa Lesa. (AbaHebere 10:24, 25) Mu kulundapo, iyi e nshila imo iya kushininkishishamo ukuti tulenonkelamo mu kusaama kwa lubuuto lwa ku mupashi.—Ilumbo 97:11; Amapinda 4:18.
10. Cipilibula cinshi ukwenda mu cine?
10 Mu kusambilila kwesu Amalembo, mu kulinga kuti twapepa kuli Lesa nge fyacitile kemba wa malumbo uwatile: “Tumeni ulubuuto lwenu ne cishinka cenu, lekeni fintungulule.” (Ilumbo 43:3) Nga ca kuti tulefwaya ukukwata ububile bwa kwa Lesa, tufwile ukwenda mu cine cakwe. (3 Yohane 3, 4) Ici cisanshamo ukukonka ififwaikwa fyakwe no kumubombela muli bucishinka na mu kufumaluka. (Ilumbo 25:4, 5; Yohane 4:23, 24) Tufwile ukubombela Yehova mu cine, ico casokololwa mu Cebo cakwe no kulondololwa mu kumfwika mu mpapulo sha “musha wa cishinka kabili uwashilimuka.” (Mateo 24:45-47) Ici cifwaya ukwishiba Amalembo mu kulungikwa. Ni shani, lyene, fintu tulingile ukubelenga no kusambilila Icebo ca kwa Lesa? Bushe tulingile ukutampila ukubelenga ukufuma pa Ukutendeka icipandwa 1, icikomo 1, ukupulinkana ukupwisha amabuuku yonse 66? Ee, Umwina Kristu onse uwakwata Baibolo wakumanina mu lulimi lwakwe alingile ukubelenga yene ukufuma ku Ukutendeka ukufika ku Ukusokolola. Kabili ubuyo bwesu mu kubelenga Baibolo ne mpapulo sha Bwina Kristu bulingile ukuba kwingilishako ukumfwikisha kwesu ukwa cipimo cishaikulila ica cine ca mu Malembo ico Lesa apayanya ukupitila mu “musha wa cishinka.”
Belenga Icebo ca kwa Lesa mu Kupongomoka
11, 12. Mulandu nshi cabela ica kunonsha ukulabelenga Baibolo mu kupongomoka pa kulongana?
11 Kuti twabelenga mu mutalalila lintu tuli fweka. Mu nshita sha pa kale, nangu cibe fyo, ukubelenga kwa pa mbali kwaleba ukwa mu kupongomoka. Ilyo mutungwi umwina Etiopia aaleya mwi celeta lyakwe, kabila wa mbila nsuma Filipi amumfwile alebelenga ubusesemo bwa kwa Esaya. (Imilimo 8:27-30) Ishiwi lya ciHebere ilyapilibulwa “ukubelenga” maka maka lipilibula “ukwita.” E co abalefilwa ukubelenga mu mutalalila no kwiluka ico balebelenga tabalingile ukumfwe nsoni ukubelenga amashiwi mu kupongomoka. Icacindama caba kusambilila icine pa kubelenga Icebo ca kwa Lesa icalembwa.
12 Cilaba ica kunonsha ukulabelenga Baibolo mu kupongomoka pa kulongana kwa Bwina Kristu. Umutumwa Paulo acincishe kabomba munankwe Timote ukuti: “Twalilila ukuibikilishako we mwine ku kubelenga kwa pa cintubwingi, ku kukonkomesha, ku kusambilisha.” (1 Timote 4:13, NW) Paulo aebele abena Kolose ukuti: “Ilyo kalata uyu akabelengwa muli imwe, lengeni abelengwe na mu lukuta lwa bena Laodikea; kabili kalata wa mu Laodikea mubelenge na imwe.” (Abena Kolose 4:16) Kabili Ukusokolola 1:3 (NW) kusoso kuti: “Wa nsansa uubelenga mu kupongomoka na bomfwa ifyebo fya kusesema uku, no kubake fyalembwamo; pantu inshita ili mupepi.” E ico, kalanda wa pa cintubwingi alingile ukubelenga amalembo ukufuma mu Baibolo ku kushinina cintu alesosa ku cilonganino.
Inshila ya Kusambililamo iya Kufwailishako Ifyebo pa Mutwe wa Lyashi Umo
13. Ni nshila nshi ileto kulunduluka kwacilapo iya kusambililamo icine ca mu Baibolo, kabili cinshi cingatwaafwa ukusanga amalembo?
13 Ukusambilila kwa kufwailisha ifyebo pa mutwe we lyashi umo e nshila yacilapo kuwama iya kusambililamo icine ca mu Malembo. Bakonkordansi, abatantika amashiwi ya Baibolo ukulingana na alufabeti ne fyashingulukako fya yako ukulingana ne buuku, icipandwa, ne cikomo, balenga cene ukuba icayanguka ukusanga amalembo ayaampana ku mutwe we lyashi umo. Kabili amalembo ya musango yo kuti yaumfwana pa mulandu wa kuti Katendeka wa Baibolo taipilika umwine. Ukupitila mu mupashi wa mushilo, apuutilemo abaume mupepi na 40 ukulemba Baibolo pa ciputulwa ca nshita ica myanda ya myaka 16, na muli fyo ukusambilila yene ukukonka umutwe no mutwe ni nshila yawamisha iya kwishibilamo icine.
14. Mulandu nshi uwa kusambilila Amalembo ya ciHebere na ya ciGriki pa nshita imo ine?
14 Ukutesekesha kwesu ukwa cine ca mu Baibolo kulingile ukutukunta ukubelenga no kusambilila Amalembo ya Bwina Kristu aya ciGriki capamo na Amalembo ya ciHebere. Ici cili no kulangisha ifyo Amalembo ya ciGriki yasuntinkana ne mifwaile ya kwa Lesa kabili cili no kusaniko lubuuto pa masesemo ya mu Amalembo ya ciHebere. (Abena Roma 16:25-27; Abena Efese 3:4-6; Abena Kolose 1:26) Icaba ica kwaafwa muli kuno kuloshako ni New World Translation of the Holy Scriptures. Yapilibwilwe na babomfi ba kwa Lesa abaipeelesha abashukile ukwishiba kwaingilishiwako ukwabako ukwa malembo ya Baibolo aya kutendekelako pamo pene no ko yalembelwe ne milandile ya manshoko. Ifya kwaafwa ukusambilila Baibolo ifyo Yehova apayanya ukupitila mu “musha wa cishinka kabili uwashilimuka,” na fyo, fyaliba ifyacindama icine cine.
15. Ni shani fintu wingashinina ukuti caliba icalinga ukwambula ukufuma mu fifulo ifyalekanalekana mu Baibolo?
15 Bamo kuti batila, ‘Impapulo shenu shilambula sana amalembo ukufuma mu Baibolo, lelo mulandu nshi mucitila fye apa mwabuula na palya mwabuula?’ Pa kwambula amalembo yalekanalekana aya mu mabuuku ya Baibolo 66, impapulo shilalonganya ubunte bwapuutwamo ubwafulilako ku kushinina ukuti icilesambilishiwa ca cine. Yesu umwine abomfeshe iyi nshila ku kusambilisha. Lintu apeele Ilyashi lyakwe ilya pa Lupili, ayambwile mu fifulo 21 ifya Amalembo ya ciHebere. Lilya lyashi lyakwatamo ukwambula kutatu ukwabulilwe mu Ukufuma, kubili ukufuma mu Ubwina Lebi, kumo ukufuma mu Impendwa, ukwambula 6 ukufuma mu Amalango, kumo ukufuma muli 2 Ishamfumu, kune ukufuma mu Amalumbo, kutatu ukufuma muli Esaya, na kumo ukufuma muli Yeremia. Pa kucite ci, bushe Yesu ‘aleesha fye ukushinina icintu cimo’? Iyo, ‘alesambilisha ngo waba na maka, kabili te pamo nga bakalemba.’ Ici cali ni pa mulandu wa kuti ico Yesu alesambilisha alecitungilila na maka ya Cebo ca kwa Lesa icalembwa. (Mateo 7:29) E fyalecita no mutumwa Paulo.
16. Malembo nshi ayo Paulo ayambwile pa Abena Roma 15:7-13?
16 Mu ciputulwa ca malembo icisangwa pa Abena Roma 15:7-13, Paulo ayambwile ukufuma mu fiputulwa fya Amalembo ya ciHebere fitatu—Amalango, Bakasesema, na Amalumbo. Alangile ukuti abaYuda na bena Fyalo baali no kucindika Lesa, kabili Abena Kristu muli fyo balingile ukusekelela aba nko shonse. Paulo atile: “Mulesekelelana, ifyo na Kristu asekelele imwe, ku kuleka kupeelwe umucinshi kuli Lesa. Pantu ndetila, Kristu aishileba kapyunga wa basembululwa pa mulandu wa cine ca kwa Lesa, ku kukoselesha ifyo alaile ku fikolwe, kabili ku kuleka Abena fyalo bacindike Lesa pa mulandu wa luse lwakwe; ifyo calembwa [pe Ilumbo 18:49], aciti: E ico nkamutashisha mu Bena fyalo, nkalumba ne shina lyenu; na kabili atila [pa Amalango 32:43], Mwe Bena fyalo, sangalaleni pamo na bantu bakwe; na kabili [pe Ilumbo 117:1], Mwe Bena fyalo bonse, tondeni Shikulu amalumbo, kabili bamutashe abantu na bantu bonse; na kabili Esaya [11:1, 10] atila, Kukabo mushila wa kwa Yese, uukema ku kuteka Abena fyalo; wene e o Abena fyalo bakacetekela. Awe Lesa wa kucetekela kwenu esushe muli imwe ukusekelela konse no mutende onse mu kutetekela kwenu, ukuti mube abafulisho kucetekela ku maka ya Mupashi wa mushilo.” Ukubomfya iyi nshila ya kufwailishako ifyebo pa mutwe wa lyashi umo, Paulo alangishe ifya kwambula amalembo ku kupampamika icine ca Baibolo.
17. Ni mu kumfwana ne ca kumwenako nshi Abena Kristu bambwila mu fifulo fyalekanalekana muli Baibolo onse?
17 Kalata wapuutwamo uwa kubalilapo uwa mutumwa Petro akwatamo amalembo yaambulwa 34 ukufuma mu mabuuku ya Amalango, Bakasesema, na Amalumbo. Muli kalata wakwe uwa cibili, Petro ayambula ukufuma mu mabuuku yatatu imiku 6. Ilandwe lya kwa Mateo lyakwata amalembo yaambulwa 122 ukufuma ku Ukutendeka ukufika kuli Malaki. Mu mabuuku 27 aya Amalembo ya ciGriki, mwabamo amalembo yaambulwa mu kulungatika 320 ukufuma mu Ukutendeka ukufika kuli Malaki pamo pene ne myanda ya kuloshako kumbi ku Amalembo ya ciHebere. Mu kumfwana ne cilangililo ca mu kubangilila ico Yesu pamo pene na batumwa bakwe baimike, lintu Abena Kristu ba muno nshiku bafwailishako ifyebo pa mutwe we lyashi uwa mu Malembo, balambula umwalekanalekana muli Baibolo onse. Ici cili ukucilisha icalingisha muli shino “nshiku sha kulekelesha,” lintu Amalembo ya ciHebere na ya ciGriki ayengi yalefikilishiwa. (2 Timote 3:1) “Umusha wa cishinka” alabomfya Baibolo muli iyo nshila mu mpapulo asabankanya, lelo talundako ku Cebo ca kwa Lesa nelyo ukufumyako.—Amapinda 30:5, 6; Ukusokolola 22:18, 19.
Enda mu Cine Lyonse
18. Mulandu nshi uwa ‘kwendela mu cine’?
18 Tatulingile ukufumyako icili conse kuli Baibolo, pantu ifisambilisho fya Bwina Kristu fyonse ifya mu Cebo ca kwa Lesa fyaba “Cine” nelyo “icine ca mbila nsuma.” Ukukakatila kuli ici cine—‘ukwenda’ muli cene—kwalikatama kwi pusukilo. (Abena Galatia 2:5; 2 Yohane 4; 1 Timote 2:3, 4) Apantu ubuKristu bwaba ni “nshila ya cine,” ukupitila mu kwaafwa bambi ukutungilila cene, tuba “ababombela pamo ne Cine.”—2 Petro 2:2; 3 Yohane 8.
19. Ni shani fintu ‘twingatwalilila ukwenda mu cine’?
19 Nga tuli no ‘kutwalilila ukwenda mu Cine,’ tufwile ukubelenga Baibolo no kushukila ukwaafwa kwa ku mupashi uko Lesa apayanya ukupitila mu “musha wa cishinka.” (3 Yohane 4) Shi natucite ci ku busuma bwesu kabili pa kuti twingaba abafikapo ukusambilishako bambi pa lwa kwa Yehova Lesa, Yesu Kristu, ne mifwaile ya bulesa. Kabili lekeni tube aba kutasha ukuti umupashi wa kwa Yehova ulatwaafwa ukumfwikisha Icebo cakwe no kutunguluka mu kumubombela mu cine.
Finshi Fili E Fyasuko Fyobe?
◻ Bunonshi nshi bumo ububelelela ubwa kubelenga Baibolo?
◻ Mulandu nshi uwa kusambilila Baibolo capamo na basumina banensu?
◻ Mulandu nshi cabela icalinga ukwambula amalembo ukufuma mu mbali shalekanalekana isha mu Baibolo?
◻ Cipilibula nshi ‘ukwenda mu cine,’ kabili ni shani fintu twingacite co?
[Icikope pe bula 17]
Mwe bafyashi, sambilisheni abana benu Amalembo
[Icikope pe bula 18]
Mu Lyashi lyakwe ilya pa Lupili, Yesu ayambwile mu mbali shalekanalekana isha Amalembo ya ciHebere