Bushe Ilelo Kwalibako Ukundapa kwa Cipesha Amano?
“SUMINA muli Yesu e lyo walaundapwa!” Imilandile ya musango yu yalengele Alexandre, uwali mwi calici lya Evangelical, ukusumina ukuti ukunwa umuti nga nalwala kuti kwalangilile fyo takwete icitetekelo. Alishininwe ukuti icitetekelo fye epela cali no kumundapa mu cipesha amano. Benedita, Katolika wakamamo na menshi, alikuntukilwe nga nshi lintu aumfwile pa lwa kundapa kwa mu cipesha amano mu cifulo ca Aparecida do Norte, mu citungu ca São Paulo, Brazil. Ukupitila mu kubomfya amashiwi ya fimpa yantu nyina mukalamba amusambilishe, Benedita alipepele kuli Nyinefwe Mutakatifu Aparecida, Anthony, na “batakatifu” bambi pa kuti bamupeele amaka ya kundapa abalwele.
Cimoneka kwati, nangu fye ni pali ino nshita lintu tuli ku nembenembe ya mwanda wa myaka uwalenga 20, abantu abengi bacili basumina mu kundapa kwa mu cipesha amano—lelo mulandu nshi? Cimoneka kwati, bamo balakalifiwa lintu badokota bafilwa ukundapa amalwele, ukufumyapo ukukalipwa, no kucula kwa batemwikwa babo, ukucilisha abana babo. Abalelwalilila kuti pambi batontonkanya ukuti pa mulandu wa kuti umuti naukosesho mutengo, cili fye bwino ukuya uko baleundapa mu citetekelo. Bamo balatamba pa TV amacalici yalekanalekana na bantu umo umo abatila balondapa AIDS, ukupopomenwa, kansa, ukupena, ukubutukisha kwa mulopa, na malwele yambi ayengi. Nampo nga nabacetekela abaletunga uko kundapa nelyo tababacetekele, balayako nga ca kuti bapelelwa. E lyo bambi bena abasumina ukuti ubulwele bwabo bwa kulowekwa kuti batontonkanya ukuti umuti wa cisungu taubomba mu malwele ya musango yo.
Lubali lumbi, kwalibako abantu abakaanya mu kukosa, nelyo fye ukusuusha, umusango wa kundapa kwa mu cipesha amano ku “batakatifu” abafwa nelyo bakondapa abacili aba mweo. Ukulingana na magazini wa Jornal da Tarde, dokota uwasambilila pa lwa fintu ifikunkumya umubili Dráusio Varella atontonkanya ukuti ukusumina mu kundapa kwa cipesha amano “kulakopeka abashailuka kabili abapelelwa.” Alundako kuti: “Pa mulandu wa kucetekela mu fipesha amano, abengi kuti basuula ukundapa kwa cipatala ukwacindamisha pa mulandu wa aba bakabepa.” Kabili The New Encyclopædia Britannica yalondolola ukuti: “Ukukanabomfya umuti mu kundapa kale kwaletontonkanishiwa ukuti kwa bung’anga ku fya mipepele, kabili aba fya cipatala batila ukundapa kwa musango yo konse kuba pa mulandu wa fyo umuntu aletontonkanya kabili ne fili imibele pali ako kashita.” Nalyo line, kwalibako abengi abasumina ukuti mu cine cine balyundepwe mu cipesha amano. Kuli bene, ukundapa kwalibombele!
Abaishibako Baibolo balishiba ukuti Yesu Kristu alyundepe abalwele pa miku iingi, ukucite co ukupitila ku “maka ya kwa Lesa.” (Luka 9:42, 43, NW) E co kuti pambi baipusha abati, ‘Bushe amaka ya kwa Lesa yacili yalabomba na lelo no kundapa abantu mu cipesha amano?’ Nga ni fyo, mulandu nshi ukwesha kwa kundapa kufililwa ukubomba? Bushe ni pa mulandu wa kuti umuntu taba ne citetekelo cakosa nelyo bushe ni pa mulandu wa kuti ubupe bwakwe tabukula sana? Bushe caliba fye bwino ku Mwina Kristu ukufwaya ukundapwa mu cipesha amano lintu alelwala ubulwele bwa kukalifya nga nshi nelyo fye pambi ubushingondapwa no kundapwa? Kabili bushe ukundapa kwabulo kufilwa ukupala kulya kuntu Yesu aundepeko kukabala akubako na kabili? Mwalasange fyasuko kuli ifi fipusho fyakatama mu cipande cikonkelepo.