“Yehova Takashe Abantu Bakwe”
“Ifibi ifiponeno walungama fingi, lelo kuli ifyo fyonse Yehova alamupokolola.”—ILUMBO 34:19.
1, 2. (a) Ni shani fintu Yehova alepaala abantu bakwe ilelo? (b) Finshi fintu Abena Kristu abengi balolenkana na fyo, kabili fipusho nshi fiimako?
MU KUFIKILISHIWA kwa busesemo bwa Baibolo, bakapepa ba kwa Yehova bekala muli paradise wa ku mupashi. (2 Abena Korinti 12:1-4) Inte sha kwa Yehova baba mu cikakilo ica pa kati ka fyalo icaishibikilwa ku kutemwa no kwikatana. (Yohane 13:35) Balishiba icine ca mu Baibolo mu kushika kabili mu kukumanina. (Esaya 54:13) Fintu baba aba kutootela kuli Yehova pa kuti alebapeelako ishuko lya kuba abalebeshi mwi hema lyakwe ilya ku mupashi!—Ilumbo 15:1.
2 Ilintu bonse mu kuteyanya kwa kwa Yehova balaipakisha ulubanda lwa ku mupashi, bamo bamoneka ukwikalako eyefilya mu mutende ne cibote ilintu bambi bapita mu kucululuka ukwa misango misango. Abena Kristu abengi baisanga abene mu mibele ya kulengo bulanda pa nshita yalepa kabili tacimoneka no kuti kukabako ukwilulukwa. Ukufuupulwa e cintu fye twingenekela mu mibele ya musango yo. (Amapinda 13:12) Bushe utuyofi tuba bushinino bwa kuti Lesa nafulwa pa cintu cimo? Bushe Yehova alacingilila Abena Kristu bamo mu nshila yaibela no kushako bambi?
3. (a) Bushe Yehova e washingamwa no tulanda uto abantu bakwe baculako? (b) Mulandu nshi uo na bakapepa fye aba busumino baculila?
3 Baibolo yasuko kuti: “Umuntu pa kutunkwa etila, Natunkwa kuli Lesa; pantu Lesa tatunkwa ku bubi, kabili tatunka muntu iyo.” (Yakobo 1:13) Yehova e Ucingilila kabili Katungilila wa bantu bakwe. (Ilumbo 91:2-6) “Yehova takashe abantu bakwe.” (Ilumbo 94:14) Ici tacilepilibulo kuti bakapepa ba busumino tabalecula. Imicitile ya fintu iya calo ca ndakai itungululwa na bantu abafyalwa abashapwililika. Abengi balibotelela, e lyo abafulilako baliba fye ababi. Pali bene tapali nangu umo uushintilila pali Yehova ku kufwaya amano. Icifumamo ciba kucula kukalamba ukwa bantunse. Baibolo ilalondolola mu kumfwika ukuti abantu ba kwa Yehova te kuti lyonse basengauke ifya kulengo bulanda ififuma mu kukanapwililika kwa buntunse no bubifi.—Imilimo 14:22.
Abena Kristu ba Bucishinka Balenekela Ukucula
4. Cinshi cintu Abena Kristu bonse bali no kwenekela ilyo lyonse baleikala muli ino micitile ya fintu iibifi, kabili mulandu nshi?
4 Nangu line abakonshi ba kwa Yesu tababa ulubali lwa calo, bekala mu kati na nkati ka iyi micitile ya fintu. (Yohane 17:15, 16) Satana alisansalikwa mu Baibolo ukuti e maka yateka cino calo. (1 Yohane 5:19) E ico, Abena Kristu bonse kuti baenekela pa nshita imo ukulolenkana na mafya yakakala. Pa mulandu wa ici, umutumwa Petro atila: “Tekanyeni, loleni. Icibambe cenu, Kaseebanya wine, endauka nge nkalamo iilelila, ukufwaya untu engalya. Mukaanyeni; iminineni abakosa ndi mu citetekelo, pa kwishibo kuti bamunyinenwe ba pano isonde batuulo mutuulo uyo wine wa kucula.” (1 Petro 5:8, 9) Ee, bamunyinefwe aba Bwina Kristu bonse kuti baenekela ukucula.
5. Ni shani fintu Yesu acilengele ukumfwika ukuti Abena Kristu ba busumino bakapita mu fintu ifilengo bulanda mu bumi?
5 Nangu ca kuti twalitemwisha Yehova kabili twaliba aba bucishinka ku fishinte fyakwe, tukakumanya ifintu ifya kulengo bulanda mu bumi. Yesu alengele ici ukumfwika mu cilangililo cakwe icalembwa pali Mateo 7:24-27, apo apusenye pa kati ka abo abomfwila ifyebo fyakwe na abo abashifyumfwila. Aalingenye abasambi ba cumfwila ku muntu wacenjela uwakuula ing’anda pa mwalala. Abo bashumfwila ifyebo fyakwe abapashenye ku muntu uwatumpa uwakuula ing’anda yakwe pa musensenga. Pa numa lintu icipuupu cikalamba capita, ing’anda fye iyashele naiminina intu yakuulilwe pa mwalala. Moneni ukuti pa lwa ng’anda ya muntu wacenjela, “imfula yalilokele, ne lyeshi lyaliishile, ne cipupu calipuupile no kupuma pa ŋanda ilya, kabili tayawile iyo.” Yesu talaile ukuti umuntu uwacenjela lyonse akalaipakisha fye umutende ne cibote. Mu cifulo ca ico, ukucenjela kwa ulya muntu kwali no kumupekanishisha ku kupula mu cipuupu. E cishinka cimo cine icaba mu mulumbe wa kwa katanda. Muli ulya mulumbe Yesu alondolola ukuti nangu fye ni bakapepa ba cumfwila “mu mitima iya cishinka iyawama” baali no “kutwale fisabo mu mukoosha [“mu kushipikisha,” NW].”—Luka 8:4-15.
6. Mu cilangililo ca kwa Paulo ica fisolobelo fishipya ku mulilo, ni bani bapita mu bwesho bwapala umulilo?
6 Ilyo alelembela abena Korinti, umutumwa Paulo abomfeshe imilandile ya mampalanya ku kulangilila ukuti imibele ingekalilila iingatwaafwa ukulolenkana ne fya kwesha ilakabilwa. Ifisolobelo fya musango yo ifishingapya ku mulilo pamo nga golde, silfere, na mabwe yaumo mutengo filosha ku mibele ya bukapepa. (Linganyeniko Amapinda 3:13-15; 1 Petro 1:6, 7.) Lubali lumbi, imisango ya bumubili yapashanishiwa ku fisolobelo ifingapya. Lyene Paulo atila: “Umulimo wa onse umo umo ukamoneka; pantu Ubushiku bulya bukaulanga, ico mu mulilo e mo Ubushiku bulya bukasokolwelwa, e lyo umulimo wa muntu onse umulilo wine ukawesho musango wa uko. Ngo mulimo wa muntu uyo akuulilepo washala, akapokelele cilambu.” (1 Abena Korinti 3:10-14) Pano na po Baibolo yalondololo kuti ifwe bonse nangu cibe shani tukalolenkanapo ne fya kwesha fimo ifyapalo mulilo.
7. Ukulingana na Abena Roma 15:4, ni shani fintu Amalembo yengatwaafwa ukushipikisha ifya kwesha?
7 Mwalibamo ubulondoloshi ubwingi mu Baibolo ubwa babomfi ba kwa Lesa aba bucishinka abashipikiishe utuyofi, limo limo pa nshita shatantalilako. Lelo, Yehova taabashile. Cilemoneka kwati umutumwa Paulo aaletontonkanya pa fya kumwenako fya musango yo lintu atile: “Fyonse ifyalembelwe kale fyalembeelwe ku kutusambilisha, ukuti mu kutwalilila kabili mu kutukoselesha kwa malembo e mo tube no kucetekela.” (Abena Roma 15:4) Langulukeni ifya kumwenako fya baume batatu abo, nangu line baleipakisha ukwampana kwapalamisha na Lesa, bacushiwe no tuyofi utwingi.
Fintu Tusambilila ku Bulondoloshi bwa mu Baibolo
8. Cinshi cintu Yehova asuminishe ukucitikila Yosefe, kabili butali nshi ubwa nshita buntu casendele?
8 Yehova asenamine Yosefe umwana mwaume wa kwa Yakobo, ukufuma fye ku bwaice. Nalyo line, apabula no mulandu untu acitile, alipitile mu tuyofi utwakonkana. Balimwibile no kumusunga mu bunkalwe kuli bamunyina abakalamba bakwe. Ashitishiwe ngo musha mu calo ca cilendo uko kuntu bailemufenenkesha umulandu no kumubika mu “cilindi.” (Ukutendeka 40:15) Mulya, “[bacushishe] amakasa yakwe mu makusu, mu fyela e mo aingile.” (Ilumbo 105:17, 18) Mu nshita ya busha bwakwe no kubikwa mu cifungo, Yosefe ukwabulo kutwishika aalelomba libili libili ukuti Yehova amukakule. Lelo, mupepi ne myaka 13, nangu ca kuti alikoshiwe na Yehova mu nshila shalekanalekana, lintu aleshibuka cila lucelo alesanga acili umusha kabili umufungwa.—Ukutendeka 37:2; 41:46.
9. Cinshi cintu Davidi aali no kushipikisha pa myaka yafulilako?
9 Ica kucitika capalako cintu caponene Davidi. Lintu Yehova aalesala umwaume wafikapo ku kuteka Israele, atile: “Ninsanga Davidi umwana wa kwa Yese, umuntu uwaba ngo mutima wandi.” (Imilimo 13:22) Te mulandu no kuba uwasenaminwa ku cinso ca kwa Yehova, Davidi aaliculile cibi. Mu busanso bwa kulenge mfwa, aalefisama pa myake yafulilako mu matololo, mu ncengo, mu mimpatampata, na mu fyalo fya bene. Pa kumulunga nge ciswango, aalefuupulwa no kuba no mwenso. Nangu ni fyo, aalishipikiishe mu maka ya kwa Yehova. Davidi aalilungike ukusosa pa mulandu wa co aimwenene ati: “Ifibi ifiponeno walungama fingi, lelo kuli ifyo fyonse Yehova alamupokolola.”—Ilumbo 34:19.
10. Kayofi nshi kabipisha akaponeene Nabote no lupwa lwakwe?
10 Mu kasuba ka kwa kasesema Eliya, mwalimo 7,000 mu Israele abashakontamineko lesa wa bufi Baali. (1 Ishamfumu 19:18; Abena Roma 11:4) Nabote, uyo cilemoneka ukuti aali ni umo uwa bene, aishilefyengwa icabipisha. Aliseebanishiwe ilyo apeelwe umulandu wa miponto. Pa kumusanga no mulandu, balimushinine no kumupingwilo kufwa ku cipope ca mfumu ukupitila mu kumupoola amabwe, kabili imbwa shalimyangile umulopa wakwe. Nangu fye bana bakwe balipaiwe! Lelo, aali wa kaele kuli ulya mulandu bamupeele. Bakambone balemushinina baali ni bakabepa. Umulandu onse wali fye kumana kapi ukwapangilwe na Namfumu Yesebele pa kuti imfumu ingapoka ibala lya myangashi ilya kwa Nabote.—1 Ishamfumu 21:1-19; 2 Ishamfumu 9:26.
11. Cinshi cintu umutumwa Paulo atweba pa lwa baume na banakashi ba busumino aba mu lyashi lya kale ilya mu Baibolo?
11 Yosefe, Davidi, na Nabote bali fye ni batatu mu baume na banakashi ba busumino abengi abalumbulwa mu Baibolo abapitile mu tuyofi. Umutumwa Paulo ilyo apitulwike mu fyacitike kale alembele ulwa babomfi ba kwa Yehova ukupulinkane nkulo. Mu fintu alembele alandilemo ulwa abo “bapokelele ukwesha kwa kupumiwa no kufopaulwa, na kabili ukwa fikakilo ne cifungo: bapoolelwe amabwe, baputwilwe pa kati kuli basoo, balyeshiwe, baipayawilwe ku lupanga; baendawike nabafwale mpapa sha mpaanga ne mpapa sha mbushi, ababa no bubusu, abacushiwa, abacitwo bubi abantu abo pano isonde tapabawamiine, abalubanta mu matololo na mu mpili, na mu ninga ne ncengo sha pano nse.” (AbaHebere 11:36-38) Lelo Yehova taabashile.
Yehova Alasakamana abo Abacula
12. Kucululuka nshi kumo kumo ukupitamo Inte sha kwa Yehova ilelo?
12 Ni shani pa lwa bantu ba kwa Yehova ilelo? Pamo ngo kuteyanya, kuti twashintilila pa kucingilila kwa bulesa kabili mu mutelelwe ukupula mu nshiku sha kulekelesha na mu bucushi bukalamba. (Esaya 54:17; Ukusokolola 7:9-17) Nangu cibe fyo, nga bantu umo umo, twalishibe fyo “inshita ne ca mankumanya” fiponena abantunse bonse. (Lukala Milandu 9:11) Ilelo kwalibako Abena Kristu ba busumino abengi abalepita mu tuyofi. Bamo bali mu bupiina bwabipisha. Baibolo ilanda ulwa Bena Kristu “inshiwa na bamukamfwilwa” abali mu kucula. (Yakobo 1:27) Bambi bacula pa mulandu wa masanso ayalengwa ne fyabumbwa pe sonde, inkondo, imisoka, ulucu lwa bakateka, ukulwala, ne mfwa.
13. Fya kukumanya nshi ifyayafya ifishimiikwe pali nomba line?
13 Ku ca kumwenako, mu malipoti yabo aya 1996 ayatuminwe kwi Bumba Litungulula ilya Nte sha kwa Yehova, amaofesi ya Watch Tower yashimike ukuti bamunyina bamo na bankashi balipooswa mu fifungo fyakankala pa mulandu wa kwikatilila ku fishinte fya Baibolo. Ifilonganino fitatu mu calo cimo ica mu South America fyalipasamwinwe lintu amabumba ya tupondo yapatikishe imyanda ya Nte ukufuma muli iyo ncende. Mu calo cimo ica ku Masamba ya Afrika, baNte bamo abapulikishiwe mu kukangana kwa nkondo ya bana calo balipaiwe. Mu calo cimo ica mu Central America, imibele ya mu fya ndalama iya bamunyina bamo iyo kale kale yaba iyabipa yaishilecililako kubipa ku kupumpunta kwa cikuuku. Mu ncende shimbi umo ubupiina no kucepelwa kwa fya kulya te kuti pambi fibe bwafya ubukalamba, ifya kufuupula kuti fyafufya ubuseko bwa bamo. Bambi balifinininwa ku mulandu no kutitikisha kwa mikalile ya muno nshiku. Pa mulandu wa kukanayangwako kwa cintubwingi, bambi na bo kuti bayumfwa ukufuupulwa lintu baleshimikila imbila nsuma iya Bufumu.
14. (a) Cinshi cintu tusambilila ku ca kumwenako ca kwa Yobo? (b) Mu cifulo ca kulatontonkanya mu kupusanako, cinshi tulingile ukucita lintu twakumanya ukumanama?
14 Iyi mibele taili na kutontonkanishiwa ukuti cili bushininkisho bwa kuti Lesa nafulwa iyo. Ibukisheni icacitikiile Yobo no bulanda ubwingi buntu apitilemo. Aali “umuntu wa mpomfu kabili uwatambalala.” (Yobo 1:8) Fintu Yobo afwile ayumfwile uwatompolwa lintu Elifasi amupeele umulandu wa kuti alilufyenye! (Yobo, ifipandwa 4, 5, 22) Tatufwaya ukususwa ukusondwelela ukuti utuyofi tukumanya twaba ni pa mulandu wa kuti twalifiisha Yehova ku mutima mu nshila imo nelyo pa mulandu wa kuti Yehova aalifumyapo ipaalo lyakwe. Ukutontonkanya kwa kufuupula lintu twalolenkana no bucushi kuti kwanasha icitetekelo cesu. (1 Abena Tesalonika 3:1-3, 5) Lintu mwakumanya ukumanama, cilacilapo kuwama ukwetetula pa cishinka ca kuti Yehova na Yesu balapalama ku mulungami te mulandu ne cingacitika.
15. Twaishiba shani ukuti Yehova alyangwako pa lwa tuyofi uto abantu bakwe bakumanya?
15 Umutumwa Paulo atusumbamo ukupitila mu kusoso kuti: “Nani akatupaatululako ku kutemwa kwa kwa Kristu? Bushe bucushi, napamo kushikitika, napamo kupakaswa, napamo cipowe, napamo bwamba, napamo kupooswa ku bulwani, napamo lupanga? . . . Ndesuubila, ndeti, nangu ni mfwa, nangu mweo, nangu ni bamalaika nangu ni bamulopwe, nangu fintu ifyabapo nangu fintu ifikesabako, nangu fya maka, nangu kusansama nangu kushika, nangu icibumbwa cimbi, te kuti cibe na maka ya kutupaatululako ku kutemwa kwa kwa Lesa ukwa muli Kristu Yesu Shikulwifwe.” (Abena Roma 8:35, 38, 39) Yehova alyangwako nga nshi pa lwa ifwe kabili alishiba ukucula kwesu. Lintu aali acili uwauluba, Davidi alembele ati: “Amenso ya kwa Yehova alosha pa balungama, na matwi yakwe alosha ku nkuuta yabo; Yehova aba mupepi na ku baputuke misana.” (Ilumbo 34:15, 18; Mateo 18:6, 14) Shifwe wa ku muulu alatusakamana kabili alomfwila ubulanda abalecula. (1 Petro 5:6, 7) Alatupayanishisha fintu tukabila ukuti tushipikishe, te mulandu no kucula uko pambi twingapitamo.
Ifya Bupe fya kwa Yehova Filatwikasha
16. Kupayanya nshi ukwafuma kuli Yehova uko kutwaafwa ukushipikisha, kabili mu nshila nshi kutwafwila?
16 Nangu cingati tatwingenekela ubumi bwabulamo bulanda muli ino micitile ya fintu iikote, twaba “abashilekeleshiwa.” (2 Abena Korinti 4:8, 9) Yesu alaile ukupayanishisha abakonshi bakwe kaafwa. Atile: “Nkalomba kuli Tata, na o akamupo Bukota bumbi, ukuti bwikale na imwe umuyayaya, Umupashi wa cine.” (Yohane 14:16, 17) Pa Pentekoste 33 C.E., umutumwa Petro aebele bakakutika bakwe ukuti baali no kupokelele “ca bupe Umupashi wa mushilo.” (Imilimo 2:38) Bushe umupashi wa mushilo uletwaafwa ilelo? Ee! Amaka yabomba aya kwa Yehova yatupeela ifisabo fishaiwamina: “Ukutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.” (Abena Galatia 5:22, 23) Iyi yonse yaba mibele yaumo mutengo iitwaafwa ukushipikisha.
17. Finshi fimo ifyaba cine ca mu Baibolo ifikosha icitetekelo cesu no mupampamina uwa kulolela mu kutekanya pali Yehova?
17 Umupashi wa mushilo na kabili ulatwafwilisha ukumfwikisho kuti ubucushi bwa ndakai bwaba “ubwayanguka ubwa kashita akanononono” lintu bwalinganishiwa ku cilambu ca bumi bwa muyayaya. (2 Abena Korinti 4:16-18) Twalishininwa ukuti Lesa takalabe imilimo yesu no kutemwa kuntu tulanga kuli wene. (AbaHebere 6:9-12) Lintu tubelenga amashiwi yapuutwamo aya mu Baibolo, tulasansamushiwa ku fya kumwenako fya babomfi ba busumino aba kale abaashipikiishe utuyofi utwingi lelo abo casoselwe ukuti bansansa. Yakobo alemba ati: “Mwe bamunyinane, moneni bakasesema abalandiile mwi shina lya kwa Shikulu babe kuli imwe ica kumwenako ca kucula ne ca kutekanya. Moneni, tuletila balishuka abashipikisha.” (Yakobo 5:10, 11) Baibolo ilaya “ukucishamo kwa maka” ku kutwaafwa ukushipikisha ifya kwesha. Yehova na kabili alitupeela isubilo lya kubuuka. (2 Abena Korinti 1:8-10; 4:7) Ukupitila mu kubelenga Baibolo cila bushiku no kwetetula pali aya malayo, kuti twakoshe citetekelo cesu no mupampamina wa kuti tukapembelela mu kutekanya pali Lesa.—Ilumbo 42:5.
18. (a) Pali 2 Abena Korinti 1:3, 4, cinshi cintu tukoseleshiwa ukucita? (b) Ni shani fintu bakangalila ba Bwina Kristu bengaba intulo ya cisansamushi no kupembesula?
18 Ukulundapo, Yehova aalitupeela paradise wa ku mupashi umo twingaipakisha ukutemwa kwa cine cine ukwa bamunyina na bankashi aba ku mupashi. Bonse twalikwata ulubali ulo twingabomba mu kusansamushanya. (2 Abena Korinti 1:3, 4) Bakangalila ba Bwina Kristu na kucilisha kuti baba ni ntulo ikalamba iya cisansamushi no kupembesula. (Esaya 32:2) Pamo nge “fya bupe ku bantu,” balipeelwa umulimo wa kukuulilila abalecula, ‘ukukosha abatompoke mitima,’ e lyo no ‘kukoselesha abanaka.’ (Abena Efese 4:8, 11, 12; 1 Abena Tesalonika 5:14) Baeluda balakoseleshiwa ukubomfya bwino bamagazini ba Ulupungu lwa kwa Kalinda na Loleni!, pamo ne mpapulo shimbi ishipayanishiwa no “musha wa cishinka kabili uwashilimuka.” (Mateo 24:45-47) Muli ishi mpapulo mwabamo ukufunda kwaumo mutengo ukwashimpwa pali Baibolo ukwingatwaafwa ukupikulula—nangu fye ukucilikila—amafya yamo ayatulenga ukusakamikwa. Shi natulepashanya Yehova ukupitila mu kusansamushanya no kukoseleshanya muli shino nshita ishayafya!
19. (a) Cinshi citwaafwa ukusengaukako utulanda tumo tumo? (b) Kwi pele pele, ni ani untu tufwile ukucetekela, kabili cinshi cikatulenga ukukanatiine fya kwesha?
19 Ilintu tuleshikilako mu kati ka nshiku sha kulekelesha ne mibele ya micitile ya fintu ileya ilebipilako, Abena Kristu balesha na maka yabo yonse ukusengauka utuyofi. (Amapinda 22:3) Ukutontonkanya bwino, ukutekanya, no kwishiba ifishinte fya mu Baibolo kuti fyatwaafwa ukupingula pa fintu bwino. (Amapinda 3:21, 22) Tukutika ku Cebo ca kwa Lesa no kucumfwila pa kuti twingasengauka ifilubo fishafwaikwa. (Ilumbo 38:4) Nangu ni fyo, twalishibo kuti nangu twingabombesha shani tatwingafumyapo ukucula mu bumi bwesu nakalya nakalya. Muli ino micitile ya fintu, abalungami abengi balalolenkana no bulanda bwatapata. Nangu cibe fyo, kuti twalolenkana ne fya kwesha mu kuba no kucetekela kwakumanina ukwa kuti “Yehova takashe abantu bakwe.” (Ilumbo 94:14) Kabili twalishibo kuti ino micitile ya fintu no kucululusha kwa iko Nomba line fye fikaya. E ico, shi natupampamine ukuti “twinenuka mu kucite cawama; pantu ku nshita iiyene tukalobolola, nga tatutompweke.”—Abena Galatia 6:9.
Cinshi Cintu Twacisambilila?
Fya kwesha nshi ifilepitamo bamunyina bonse aba Bwina Kristu?
Fya kumwenako nshi ifya mu Baibolo ifitwaafwa ukumfwikisha ukuti utuyofi tatuba bushinino bwa kuti Yehova nafulwa?
Bushe Yehova ayumfwa shani pa lwa tulanda utucusha abantu bakwe?
Fya bupe nshi fimo ififuma kuli Yehova ifitwaafwa ukushipikisha ifya kwesha?
[Ifikope pe bula 10]
Davidi, Nabote, na Yosefe ni batatu abapitile mu tuyofi