Ababelenga Ino Magazini Balepusha Ukuti
Bushe Inte sha kwa Yehova Basumina Ukuti e Bakapusuka fye Beka?
Inte sha kwa Yehova basumina ukuti balisanga ukupepa kwa cine. Pantu nga ca kuti te fyo basumina, kuti batampa ukupepa kumbi. Nga filya fine na bantu bambi abapepa mu macalici ayalekanalekana bacetekela, na baNte nabo bene balicetekela ukuti bakapusuka. Lelo kwena balishiba no kuti te mulimo wabo ukupingula abantu ukuti bakafwa nelyo bakapusuka. Pantu Lesa umwine, e ukabapingula pantu e Kapingula.—Esaya 33:22.
Icebo ca kwa Lesa cisokolola ukuti abafwaya ukuti bakapusuke te kutila bafwile fye ukufwaya ukupusuka iyo, lelo balingile no kulakonka ifyo Umupusushi wabo afwaya. Lekeni tulangilile: Tutile umuntu uwatemwa ukwendauka mu mpanga aluba. Alefwaisha inshila pa kuti alondoke. Bushe kuti afwa nelyo ukupusuka? Ifyo acita nga bamwafwa kuli bambi e fingalenga apusuke nelyo ukufwa. Pa mulandu wa kuti nakwata icilumba, limbi kuti akaana ukuti umuntu umbi uulefwaya ukumupususha amwafwe. Nelyo limbi kuti asumina ukuti bamwafwe pa kuti alondoke no kupusuka.
E fyo caba na ku bantu abafwaya ukupusuka, pa kuti bapusuke kano baumfwila Umupusushi wa bantu, Yehova Lesa. Lesa alitupeela ishuko lya kupusuka, lelo te bonse abakapusuka. Yesu, Umwana wa kwa Lesa, atile: “Te onse uutila kuli ine, ‘Shikulu, Shikulu’ akengila mu bufumu bwa mu muulu, kano uucita ukufwaya kwa kwa Tata uwaba mu muulu e ukengilamo.”—Mateo 7:21.
Inte sha kwa Yehova basumina ukuti Lesa akapususha fye abacetekela mwi lambo lya kwa Yesu ilya tulubula ku lubembu kabili abakonka bwino bwino ifyo asambilishe. (Imilimo 4:10-12) Lekeni tulande pa fintu fitatu ifyacindama ifyaba mu Cebo ca kwa Lesa ifyo tulingile ukucita pa kuti tupusuke.
(1) Yesu aebele abasambi bakwe ukuti: “Nga muletemwana, e lyo bonse bakeshiba ukuti muli basambi bandi.” (Yohane 13:35) Filya Yesu apeele ubumi bwakwe pa kuti apusushe bambi e fitulanga ifyo ukutemwa kwacindama. Kanshi bonse abatemwa abanabo ninshi balikwata imibele iingalenga bapusuka.
(2) Ilyo Yesu alepepa kuli Wishi atile: “Nalenga beshibe ishina lyenu.” (Yohane 17:26) Yesu alishibe ifyo ishina lya kwa Lesa ilya kuti Yehova lyacindeme kuli Wishi. Yesu apepele ukuti ishina lya kwa Wishi “libe ilya mushilo.” (Mateo 6:9) Ukulenga ishina lya kwa Lesa ukuba ilya mushilo kwalola mu kuti umuntu afwile ukwishiba ishina lya kwa Lesa no kulalicindika icine cine. Nga filya Yesu alecita, abalefwaya ukupusuka balingile ukulabomfya ishina lya kwa Lesa. Balingile no kulasambilishako bambi pe shina lya kwa Lesa na pa mibele yakwe. (Mateo 28:19, 20) Na kuba, abalilila fye kwi shina lya kwa Lesa e bakapusuka.—Abena Roma 10:13.
(3) Yesu aebele Ponti Pilato ukutila: “Ubufumu bwandi te bwa pano calo.” (Yohane 18:36) Bantu fye abanono shino nshiku e bacita ifilanga ukuti balicindamika sana Ubufumu bwa kwa Lesa, ubo Yesu aba e Mfumu. Lelo abengi bacetekela sana utubungwe twa bantunse. Nomba abo Lesa akapususha ni balya abafwilisha Ubufumu bwakwe no kusambilisha bambi ifyo bulya Bufumu bukalubula abantu bonse aba cishinka.—Mateo 4:17.
Ilyo abasambi ba kwa Yesu baumfwile ifyo umuntu akabila ukucita pa kuti apusuke, baipwishe Yesu abati: “Nga kanshi nani engapusuka?” Yesu aaswike ati: “Ifyo abantu bengafilwa ukucita, Lesa ena kuti aficita.” (Luka 18:18-30) Inte sha kwa Yehova balesha na maka ukucita ifintu ifingalenga baisapusuka. Kabili balabombesha pa kuti bafwilisheko abantu bambi ukuti nabo bakesepuka.