“Ukutetekela Yesu”—Pa Kuti Tukesepusuka, Bushe Tufwile Ukupelela fye pa Kutetekela Yesu?

Icasuko ca mu Baibo

Abena Kristu basumina ukuti Yesu alifwile pa kuti alubule abantu ku lubembu. (1 Petro 3:18) Nomba pa kuti tukapusuke, tatufwile ukupelela fye pa kusumina muli Yesu. Ifibanda na fyo fyalishiba ukuti Yesu “Mwana wa kwa Lesa,” lelo bakafyonaula, tafyakapusuke.—Luka 4:41; Yuda 6.

• Finshi ningile ukucita pa kuti nkapusuke?

• Bushe “Ipepo lya Mubembu” ni cinshi?

• Ni kwi “Ipepo lya Mubembu” lyafuma?

Finshi ningile ukucita pa kuti nkapusuke?

• Mufwile ukusumina ukuti Yesu alifwile pa kuti atulubule ku lubembu. (Imilimo 16:30, 31; 1 Yohane 2:2) Kanshi mufwile ukusumina ukuti Yesu muntu wa cine cine uwaishile pano isonde, kabili mufwile no kucetekela ukuti fyonse ifyo Baibo ilanda pali ena fya cine.

• Mufwile ukusambilila ifyo Baibo isambilisha. (2 Timote 3:15) Baibo ilanda ukuti Paulo na Sila baebele uwalelinda icifungo ukuti: “Nga watetekela Shikulu Yesu, iwe na ba mu ng’anda yobe mukapusuka.” Lyena batendeke ukumusambilisha icebo ca kwa Yehova.a (Imilimo 16:31, 32) Ifi twalandapo filanga fye ukuti uwalelinda abafungwa alingile ukwishibako fimo ifyaba mu Cebo ca kwa Lesa pa kuti acetekele Yesu. Alingile ukwishiba icine icaba mu Malembo.—1 Timote 2:3, 4.

• Mufwile ukulapila. (Imilimo 3:19) Mufwile no kulapila nelyo ukumfwa sana ububi pa fyabipa ifyo mwalecita kale. Abantu kuti bamona ukuti namulapila nga ca kuti mwaleka ukucita ifyo Lesa apata kabili nga mulecita ‘ifilanga ukuti namulapila.’—Imilimo 26:20.

• Mufwile ukubatishiwa. (Mateo 28:19) Yesu alandile ukuti bonse abafwaya ukuba abasambi bakwe bafwile ukubatishiwa. Uwalelinda icifungo uo tulandilepo alibatishiwe. (Imilimo 16:23) Ifi fine e fyacitike na lintu umutumwa Petro asambilishe abantu abengi icine pali Yesu, “bonse abacetekele ifyo alelanda ne mitima yabo yonse balibatishiwe.”—Imilimo 2:40, 41.

• Mufwile ukulakonka ifyo Yesu atweba. (AbaHebere 5:9) ‘Abakonka fyonse’ ifyo Yesu alandile lyonse balacita ifilanga ukuti basambi bakwe. (Mateo 28:20) ‘Balacita ifyo icebo ca kwa Lesa cilanda, tabomfya fye.’—Yakobo 1:22.

• Mufwile ukushipikisha ukufika na ku mpela. (Marko 13:13) Abasambi ba kwa Yesu balingile “ukulashipikisha” pa kuti bakapusuke. (AbaHebere 10:36) Ku ca kumwenako, umutumwa Paulo alekonka fyonse ifyo Yesu alandile kabili ali uwa cishinka kuli Lesa. Na kabili, ukutula fye apo abelele Umwina Kristu, alitwalilile ukushipikisha mpaka ne mfwa.—1 Abena Korinti 9:27.

Bushe “Ipepo lya Mubembu” ni cinshi?

Mu mipepele imo abantu balapepa amapepo pamo nga “Ipepo lya Mubembu” e lyo na “Ipepo lye Pusukilo.” Ilingi line abapepa aya amapepo balasumina ukuti nababembuka, kabili balasumina no kuti Yesu alitufwilile pa kuti Lesa aletwelela imembu. Nga balepepa, balalomba no kuti Yesu engesa mu mitima yabo nelyo mu bumi bwabo. Nomba Baibo tayalandapo pa “Ipepo lya Mubembu” kabili tailanda ukuti abantu bafwile ukulapepa ipepo lya musango uyu.

Abantu bamo batontonkanya ukuti nga bapepa “Ipepo lya Mubembu” ninshi capwa bakapusuka kabili bakaba no mweo wa muyayaya. Nomba ukupepa fye ipepo kuli Lesa te kwingalenga umuntu apusuka. Apo fwe bantunse tatwapwililika, tulalufyanya. (1 Yohane 1:8) E co Yesu aebele abasambi bakwe ukuti balepepa lyonse pa kuti Lesa alebelela imembu. (Luka 11:2, 4) Na kabili, Abena Kristu bamo abaali no kukwata umweo wa muyayaya tabakaukwate pantu balileka ukubombela Lesa nelyo ukucita ifyo afwaya.—AbaHebere 6:4-6; 2 Petro 2:20, 21.

Ni kwi “Ipepo lya Mubembu” lyafuma?

Abasambilila amalyashi ya kale balalanda ifyapusanapusana pa “Ipepo lya Mubembu.” Bamo balanda ukuti lyatendeke ilyo amaceici yalepangwa ukufuma mwi ceici lya Katolika. E lyo bambi batila lyatendeke mu myaka ya ba 1700 na 1800 ilyo ilyo amaceici yatendeke ukupangwa. Nampo nga ifi balanda fya cine nelyo iyo, Baibo taitukoselesha ukulapepa “Ipepo lya Mubembu.” Ilanda ukuti tatufwile ukulapepa amapepo ya kuswatila.