Amepusho Ukufuma ku Babelenga
Mulandu nshi umwana wa kwa Davidi na Bati-sheba afwilile, ilyo abafyashi bakwe abacitile ubucende bena tabafwile?
Ifunde lya kwa Mose lyatile: “Umwaume nga asangwa nalaala no mwanakashi uwaupwa ku mwaume, bakafwe bonse babili, umwaume uwalaala no mwanakashi, no mwanakashi; e fyo mukakufye ububi ubo muli Israele.” (Amalango 22:22) Nga ca kuti Yehova alekele abantunse ukupingula ulubembu lwa kwa Davidi na Bati-sheba, aba babili nga balipaiwe. Apo abantunse tabamona mu mitima ya bantu, bali no kupingula umulandu ukukonke fyo Davidi na Bati-sheba bacitile. Ifunde lyatile abacita ubucende bali no kwipaiwa. Abapingushi ba mu Israele tabapeelwe insambu sha kulekelela ulubembu lwa musango uyu.
Lelo, Lesa wa cine alamona mu mitima ya bantu kabili alalekelela imembu nga ca kuti amono kuti nacilinga ukulekelela. Apo uwabembwike ni Davidi, untu apangene nankwe icipingo ca Bufumu, Yehova umwine asalilepo ukumupingula. (2 Samwele 7:12-16) “Kapingula wa pano isonde ponse” alikwate nsambu sha kusalapo ukucite ci.—Ukutendeka 18:25.
Finshi Yehova amwene ilyo alebebeta umutima wa kwa Davidi? Utulembo twa pa muulu wa Amalumbo 51 tutila ici cipandwa cilanda pa fyo Davidi aumfwile “pa kwisa Natani kasesema kuli wene, ilyo aingile kuli Bati-sheba.” Muli Baibolo wa New World Translation, Amalumbo 51:1-4 yatila: “Nsenamineni mwe Lesa, umwabelo kutemwa kwenu ukwa cishinka. Umwabele nkumbu shenu ishingi fumyenipo bumpulamafunde bwandi. Nsambeni bwino bwino ku bupulumushi bwandi kabili nsangululeni na ku lubembu lwandi. Pantu nalishiba bumpulamafunde bwandi, kabili ulubembu lwandi luli pa mulola wandi pe. Kuli imwe, imwe mweka fye, e ko nabembuka, kabili ncitile icabipa mu menso yenu.” Yehova afwile amwene uku kubipilwa kwali mu mutima wa kwa Davidi ngo bushininkisho bwa kuti alilapile ukufuma pa nshi ya mutima kabili uyu e mulandu Yehova abelele shilya ncitatubi uluse. Na kabili, Davidi ali no luse ku banankwe, e lyo Baibolo itila Yehova wa luse ku ba luse. (1 Samwele 24:4-7; Mateo 5:7; Yakobo 2:13) Kanshi, ilyo Davidi asumine ukuti alibembwike, Natani amwebele ukuti: “Yehova na o naleko lubembu lwenu ukupita, tamwakafwe.”—2 Samwele 12:13.
Davidi na Bati-sheba tabali na kulubuka kuli fyonse ifyali no kufuma mu lubembu lwabo. Natani aebele Davidi ukuti: “Apo mwasaalula Yehova kuli ci cintu, umwana uukafyalwa kuli imwe, ukufwa akafwa.” Umwana wabo alilwele no kufwa te mulandu no kuloosha no kuleko kulya uko Davidi acitile pa nshiku 7.—2 Samwele 12:14-18, NW.
Bamo balifilwa ukumfwikisha umulandu umwana afwilile, pantu Amalango 24:16 yatila: “Abana bekepailwa pali bashibo.” Lelo, twilalaba ukuti abantunse nga e bapingwile umulandu, abafyashi kumo no mwana mwi fumo nga balifwile. Ukulofya umwana na ko limbi kwalyafwile Davidi ukwibukila ukuti ico acitile na Bati-sheba, calengele Yehova ukufulwa. Kanshi kuti twashininkisha ukuti Yehova alipingwile umulandu bwino bwino pantu “imibele yakwe yalipwililika.”—2 Samwele 22:31, NW.
[Icikope pe bula 31]
Davidi alilapiile ukufuma pa nshi ya mutima