Sambilileni Icebo ca kwa Lesa

Cinshi Cikacitikila Imipepele?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Bushe imipepele yonse ya cine?

Mu mipepele iingi mwaliba abantu abafwaya ukulacita ifyo Lesa afwaya. Lesa alamona aba musango uyu kabili alabasakamana. Ku ca bulanda, abantu bamo balabomfya imipepele pa kuti balecita ifyabipa. Ku kale, intungulushi sha mapepo shalecusha abalekaanya imipepele yabo. (2 Abena Korinti 4:3, 4; 11:13-15) Ukulingana ne fyo abasabankanya ilyashi balanda, muno nshiku, bashimapepo bamo balaluminisha ukusansa kwa tupondo, nelyo inkondo kabili bamo balolungana na bana abanono.—Belengeni Mateo 24:3-5, 11, 12.

Baibolo isambilisha ukuti imipepele yaba mu misango ibili, kwaba imipepele ya cine e lyo ne ya bufi. Imipepele ya bufi taisambilisha icine pali Lesa. Lelo, Yehova Lesa afwaya abantu ukwishiba icine pali ena.—Belengeni 1 Timote 2:3-5.

2. Cinshi cikacitikila imipepele?

Lesa tafwaya abantu ukubepwa ku ba mu mipepele abaitunga ukutemwa Lesa lelo abashisambilisha icine pali ena. Na kuba, abakosa muli iyi mipepele balitemwa ukuba ifibusa fya calo icitekwa na Satana Kaseebanya. (Yakobo 4:4; 1 Yohane 5:19) Icebo ca kwa Lesa cilondolola ukuti imipepele iitungilila amabuteko ukucila Lesa yaba kwati ni cilende. Baibolo ita uyu cilende ukuti “Babiloni Mukalamba.” Ili ishina lyafumine ku musumba wa kale ukwatendekele imipepele ya bufi pa numa ya Lyeshi ilyaliko mu nshiku sha kwa Noa. Nomba line, Lesa ali no konaula imipepele iilufya no kutitikisha abantu.—Belengeni Ukusokolola 17:1, 2, 5, 17; 18:8, 23, 24.

3. Bushe Lesa akalenga shani abantu bonse pa calo ukusekelela?

Ilyashi lya kuti Lesa akapingula imipepele ya bufi lyashi ilisuma. Ubu bupingushi bukapwisha umutitikisha uwaba mu calo conse. Imipepele ya bufi tayakatale ailufya abantu no kubapaatukanya. Bonse pa calo bakalapepa fye Lesa umo uwa cine.—Belengeni Esaya 11:9; Ukusokolola 18:20, 21; 21:3, 4.

4. Cinshi abafwaya ukupepa Lesa ne cishinka balingile ukucita?

Lesa talabako ku bantu ba cishinka ababa mu mipepele ya bufi iyalekanalekana. Pali ino nshita alelonganika no kwikatanya aba musango uyu pa kubasambilisha icine.—Belengeni Mika 4:2, 5.

Yehova alapokelela abafwaya ukumubombela mu lupwa lwakwe. Nangu ca kuti ifibusa na balupwa kuti bafulwa nga twatendeka ukubombela Yehova, amapaalo tukwata yengi nga nshi. Tulaba ifibusa fya kwa Lesa, tulaba mu lupwa ulupya ulwa batemwana, kabili tulaba ne subilo lya kwikala umuyayaya.—Belengeni Marko 10:29, 30; 2 Abena Korinti 6:17, 18.

Nga mulefwaya ukwishibilapo na fimbi, belengeni ifipandwa 15 na 16 mu ci citabo citila Bushe Cinshi Baibolo Isambilisha? icalembwa ne Nte sha kwa Yehova.

[Abatusuminishe Ukubomfya Icikope pe bula 16]

The Complete Encyclopedia of Illustration/J. G. Heck