Muletasha Yehova Na o Akamupaala

1. Mulandu nshi tulingile ukulatashisha Yehova?

YEHOVA, kapeela wa ca “bupe conse icisuma no bupe bonse ubwapwililika,” alilinga ukumutasha. (Yako. 1:17) Apo mucemi wesu uwaba no kutemwa, alatupeela fyonse ifyo tukabila mu mikalile ne fitwafwa ukuba na bucibusa nankwe. (Amalu. 23:1-3) Alitulanga ukuti “e cubo cesu kabili e maka yesu” maka maka mu nshita ya mafya! (Amalu. 46:1) Kanshi na ifwe kuti twasuminishako ku mashiwi ayo uwaimbile amalumbo alembele aya kuti: “Tooteleni Yehova, pantu musuma; pantu icikuuku cakwe ca muyayaya.”—Amalu. 106:1.

2, 3. (a) Finshi fingacitika nga ca kuti tatuletasha pa mapaalo ayo twakwata? (b) Fipusho nshi ifyo twalalanshanyapo muli cino cipande?

² Mulandu nshi cicindamine ukuti tulande pa kutasha? Nga fintu casobelwe, abantu muli shino nshiku sha kulekelesha tabatasha. (2 Tim. 3:2) Abantu abengi tabatasha pa mapaalo bakwata. Bamo balakonkelela ifyo abamakwebo basabankanya, ica kuti balafwaisha ukukwata ifipe ifingi ukucila pa fyo bakwata. Na ifwe bene kuti twaba nga aba bantu abashitasha. Nga filya abena Israele baali, na ifwe kuti twaleka ukulatasha no kuleka ukumona bucibusa bwesu na Yehova na mapaalo ayo atupeela ukuti fyalicindama.—Amalu. 106:7, 11-13.

³ Na kabili, taleni, tontonkanyeni na pa cingacitika nga ca kuti twaba na mesho. Pali utu tushita, kuti twalatontonkanya fye pa mesho ayo tukwete no kuleka ukulatontonkanya pa mapaalo twakwata. (Amalu. 116:3) Kuti twalanga shani ukuti tulatwalilila ukutasha? Kabili cinshi cikatwafwa ukulatasha na lintu tuli na mafya? Natumone.

“IFYO MWACITA FINGI MWE YEHOVA”

4. Bushe kuti twatwalilila shani ukulatasha pa mapaalo twakwata?

⁴ Nga tulefwaya ukutwalilila ukulatasha, tufwile ukwishiba no kulatontonkanya sana pa mapaalo ayo Yehova atupeela na pa cikuuku cakwe. Ilyo uwaimbile amalumbo acitile ifi, alipapile ilyo aishibe ifintu ifisuma ifingi ifyo Yehova acita.—Belengeni Amalumbo 40:5; 107:43.

5. Finshi twingasambilila ku mutumwa Paulo pa fyo tulingile ukulatasha?

⁵ Kuti twasambilila ifingi ku mutumwa Paulo pa fyo tufwile ukulatasha. Ukwabula no kutwishika, Paulo aletontonkanya sana pa mapaalo akwete, pantu imiku iingi aletasha. Paulo alishibe bwino ukuti ali ‘uwa miponto kabili alecusha Abena Kristu kabili aali uwa musaalula.’ Nangu ca kuti alecita ifyabipa kale, Paulo aletasha pantu Lesa na Yesu balimubelele uluse kabili balimupeele no mulimo. (Belengeni 1 Timote 1:12-14) Paulo na kabili aletasha sana Abena Kristu banankwe kabili aletasha Yehova pa mibele yabo iisuma na pa fyo balebomba na bucishinka. (Fil. 1:3-5, 7; 1 Tes. 1:2, 3) Na lintu Paulo akwete amafya, alitashishe Yehova pa fyo ababwananyina bamwafwile. (Imil. 28:15; 2 Kor. 7:5-7) Kanshi te kuti tupape, ukuti ifyo Paulo alembele fyalikoseleshe Abena Kristu ilyo atile: ‘Muletootela mulekonkomeshanya mu nyimbo sha malumbo, mulelumbanya Lesa, ku nyimbo shakwe no kumucindika.’—Kol. 3:15-17.

UKULATONTONKANYA PA FYO YEHOVA ATUCITILA NO KUPEPELAPO—KUTI KWALENGA TWALATASHA

6. Finshi ifyo mwingatashishapo Yehova?

⁶ Kuti twapashanya shani Paulo pa fyo tulingile ukulatasha? Nga filya Paulo alecita, na ifwe tufwile ukulatontonkanya sana pa fyo Yehova atucitila cila muntu. (Amalu. 116:12) Kuti mwayasuka shani nga balimwipwishe ukuti, Mapaalo nshi ayo Yehova amupeela ayo mu mutashishapo sana? Bushe kuti mwalanda pali bucibusa bwenu na Yehova? Nelyo bushe kuti mwalanda pa fyo Yehova amweleela imembu pa mulandu wa kuti mwalikwata icitetekelo mwilambo lya cilubula ilya kwa Kristu? Bushe kuti mwalumbula bamunyina na bankashi abamwafwile ilyo mwali na mafya yalekanalekana? Ca cine ukuti, te kuti mulabe ukulumbula abena mwenu nelyo abana benu. Ukulatontonkanya sana pali aya mapaalo ayo Shinwe waba no kutemwa, Yehova amupeela, kuti kwamulenga ukulamutasha cila bushiku.—Belengeni Amalumbo 92:1, 2.

7. (a) Mulandu nshi tulingile ukulapepela amapepo ya kutasha? (b) Kuti mwanonkelemo shani nga muletasha mu mapepo yenu?

⁷ Nga tuletontonkanya lyonse pa mapaalo ayo Yehova atupeela, tukalapepa kuli ena no ku mutasha. (Amalu. 95:2; 100:4, 5) Abantu abengi bapepa kuli Yehova ilyo balefwaya ukuti abacitilepo fimo. Lelo ifwe twalishiba ukuti Yehova alatemwa nga tuletasha pa fyo atucitila. Mu Baibolo mwalilembwa amapepo aya kutasha ayo bamo bapepele, pali aya mapepo paba na ya kwa Hana na Hesekia. (1 Sam. 2:1-10; Esa. 38:9-20) E ico mulepashanya aba ababomfi ba cishinka aba kwa Yehova abaletasha. Muletasha Yehova mu mapepo mupepa pa mapaalo ayo mwakwata. (1 Tes. 5:17, 18) Mukanonkelamo sana nga muletasha. Mukalaba ne nsansa, mukatemenwako Yehova kabili mukapalama kuli ena.—Yako. 4:8.

8. Finshi fingalenga twaleka ukulatasha pali fyonse ifyo Yehova atucitila?

⁸ Mulandu nshi tulingile ukwishibila ifingalenga twaleka ukutasha pa busuma bwa kwa Yehova? Pantu twalipyana imibele ya kukanatasha. Tontonkanyeni pa bafyashi besu aba kubalilapo, Adamu na Efa, Lesa ababikile mwi bala ilya paradaise. Alibapeele fyonse ifyo balekabila, kabili baali no kwikala umuyayaya mu mutende. (Ukute. 1:28) Lelo tabaletasha pa mapaalo ayo bakwete. Balefwaya ifintu na fimbi ifingi. Ne ci calengele ukuti bapanye ne fyo bakwete. (Ukute. 3:6, 7, 17-19) Apo twikala mu calo umwaba abantu abashitasha, na ifwe kuti twaleka ukumona ifintu fyonse ifyo Yehova atucitila ukuti fyalicindama. Kuti twaleka ukutasha pali bucibusa twakwata na Yehova. Nalimo kuti twaleka no kutasha pe shuko twakwata ilya kuba pa ba bwananyina aba mwi sonde lyonse. Kuti twatendeka ukulacita ifya muli ici calo ifili mupepi no kupita. (1 Yoh. 2:15-17) Nga tatulefwaya ukuti ifya musango uyu fikatucitikile, tufwile ukulatontonkanya sana pa mapaalo twakwata kabili tulingile ukulatasha Yehova lyonse pe shuko twakwata ilya kuba abantu bakwe.—Belengeni Amalumbo 27:4.

ILYO TULESHIPIKISHA AMESHO

9. Ilyo twaba na mafya ayakalamba, mulandu nshi tulingile ukulatontonkanishisha pa mapaalo ayo Yehova atupeela?

⁹ Ukulatasha pa fyo Yehova atucitila kuti kwatwafwa ukushipikisha amesho ayakalamba. Nga twaponenwa na mesho ayo tatuleenekela ayengalula imikalile yesu, kuti nalimo twalatontonkanya fye pali ayo yene mesho, pamo nga amafya ya mu cupo, ubulwele ubwingatwipaya, imfwa ya kwa lupwa wesu, nelyo akayofi. Pali utu tushita kuti twasansamushiwa no kukoseleshiwa nga tuletontonkanya pa mapaalo ayo twakwata. Moneni amafya ayo bamo bakwete.

10. Bushe ukulatontonkanya pa mapaalo, kwayafwa shani ba Irina?

¹⁰ Ba Irinaa, ababomba bupainiya ku North America baupilwe kuli eluda uushali uwa cishinka kuli bena, uyu eluda alifumine pa ng’anda asha ba Irina na bana. Cinshi cayafwile ba Irina ukutwalilila ukubombela Lesa na bucishinka? Ba Irina batile, “Ndatasha pa fyo Yehova ansakamana. Ukulatontonkanya cila bushiku pa mapaalo nakwata, kulalenga ndemona ukuti lishuko ukwishibikwa no kutemwikwa na Shifwe wa ku muulu uutucingilila. Nalishiba no kuti teti anshe.” Nangu ca kuti ba Irina balikwete amafya ayengi, ukutasha pa mapaalo ayo bakwata kwalibafwile ukushipikisha amafya kabili balakoseleshako na bambi.

11. Cinshi cayafwile ba Kyung-sook ukushipikisha ubulwele ubwali no kubepaya?

¹¹ Ba Kyung-sook, abekala ku Asia, babombele bupainiya na bena mwabo pa myaka 20. Ukwabula no kwenekela, ba Kyung-sook babasangile no bulwelele bwa kansa ya kuli bapwapwa kabili babebele ukuti tabakakokole, baali no kufwa pa numa ya myeshi nalimo 6. Nangu ca kuti ba Kyung-sook na bena mwabo balikwete amesho ayengi ayanono na yakalamba, tabalesakamana pa fyo ubumi bwabo bwali no kuba. Lelo ilyo ba Kyung-sook balwele, batile: “Ubu bulwele bwalencusha ica kuti naleumfwa kwati nalilufishe fyonse ifyo nakwata kabili naleumfwa umwenso nga nshi.” Cinshi cayafwile ba Kyung-sook ukushipikisha? Ba Kyung-sook batile: “Cila bushiku ilyo nshilaya mu kulaala, naleya pa mutenge wa ng’anda yesu kabili nalepepa mwi shiwi ilikalamba ukulumbula ifintu 5 ifyalelenga ukuti ntashe pali ubo bushiku. Pa numa ya kupepa, naleleka ukusakamikwa sana, kabili ici calengele ukuti ndelanga ifyo natemwa Yehova.” Bushe ba Kyung-sook banonkelemo shani mu mapepo yabo ayo balepepa ilyo tabalaya mu kulaala? Batile: “Nomba nalishiba ukuti Yehova alatukosha mu nshita sha mafya kabili nalishiba no kuti amapaalo tukwata yengi ukucila pa mesho ayo tukwata.”

12. Finshi fyayafwile ba Jason ukusanga icisansamushi ilyo abena mwabo bafwile?

¹² Ba Jason, ababombela pa Bethel imo iya mu Africa, balibomba umulimo wa nshita yonse pa myaka ukucila pali 30. Ba Jason batile: “Apo umwina mwandi afwila na papita imyaka 7, kabili ncili ndayumfwa uwa bulanda icine cine. Ukulatontonkanya sana pa fyo umwina mwandi alecula ku bulwele bwa kansa kulanenga ukuba no bulanda sana.” Cinshi cayafwa ba Jason ukushipikisha? Ba Jason batile, “Inshita imo, naleibukisha utushita tumo uto twaleba pamo no mwina mwandi, kabili naletasha Yehova mwi pepo pali ifi naleibukisha. Nalisansamwike kabili pa numa natendeke ukutasha Yehova lyonse pali filya naleibukisha utushita tusuma uto twalekwata no mwina mwandi. Ukulatasha kwalilenga ukuti nilaumfwa ubulanda sana. Ncili ndayumfwa uwa bulanda, lelo ukulatasha Yehova pa cupo icisuma ico nakwete na pe shuko nakwete ilya kumubombela pamo no mwina mwandi uwantemenwe sana kwalingafwa ukushipikisha.”

13. Finshi fya yafwile Sheryl ukushipikisha ilyo balupwa bakwe abengi bafwile?

¹³ Ilyo kwali inkuuka iikalamba ku Philippines mu 2013, Sheryl, uwali fye ne myaka 13 ilyo ici cacitike atile: “Ing’anda yesu yalibongolweke, kabili balupwa wandi abengi balifwile.” Ba wishi, banyina, na bana banankwe, balifwile kuli kankungwe iikalamba. Cinshi cayafwile Sheryl ukushipikisha ubu busanso? Alatasha pa mapaalo ayo akwata. Atile, “Nalimwene fyonse ifyo bamunyina na bankashi balecita pa kwafwa no kukoselesha abali mu busanso. Nalishibe ukuti bamunyinefwe icalo fye conse balempepelako.” Sheryl alandile no kuti: “Ndatasha sana apo Yehova e Lesa wandi. Lyonse alatupeela ifyo tukabila.” E ico ukwishiba amapaalo ayo twakwata kuti kwatwafwa ukukanaba no bulanda sana. Ukulatasha pa mapaalo twakwata kuti kwatwafwa ukushipikisha amafya ayo twingakwata.—Efes. 5:20; belengeni Abena Filipi 4:6, 7.

“INE, NAKULA-ANGILA MULI YEHOVA”

14. Mapaalo nshi ayo tuli no kukwata ku ntanshi? (Moneni icikope icili pa ntendekelelo ya cino cipande.)

¹⁴ Ukutula fye na kale, abantu ba kwa Yehova balasekelela pa mapaalo ayo bakwata. Ku ca kumwenako, ilyo Yehova alubwile abena Israele kuli Farao na bashilika bakwe pali Bemba wa Kashika, balisekelele ica kuti balimbile ne inyimbo sha kulumbanya no kutasha Yehova. (Ukufu. 15:1-21) Pali lelo, pa mapaalo ayo twatemwa sana paba ne subilo twakwata ilya kulubulwa kuli fyonse ifituletela amafya. (Amalu. 37:9-11; Esa. 25:8; 33:24) Elenganyeni ifyo tukatemwa ilyo Yehova akonaula abalwani bakwe bonse no kutwingisha mu calo cipya ica mutende umukaba ubulungami. Ala ubu bukaba bushiku bwa kutootela Yehova icine cine!—Ukus. 20:1-3; 21:3, 4.

15. Finshi mulefwaisha ukulacita mu mwaka wa 2015?

¹⁵ Tuleenekela ukuti Yehova akatupaala sana mu mwaka wa 2015. Ca cine, nalimo tukakwata na mesho, lelo te mulandu na mesho tukakwata twalishiba ukuti Yehova akaba na ifwe. (Amala. 31:8; Amalu. 9:9, 10) Akatwalilila ukutupeela fyonse ifyo tukabila pa kuti tulemubombela na bucishinka. E ico tufwile ukutwalilila ukuba nga filya kasesema Habakuki aali uwalandile ukuti: “Nangu umukunyu taubalwile, ne myangashi taitwele ifisabo; umuolife wafilwa ukutwala, na mabala yakaana ukufumya ifya kulya; impaanga shaloba mu macinka, na mu matanga tamuli ing’ombe; na lyo line, ine, nakula-angila muli Yehova; nakulasekelela muli Lesa we pusukilo lyandi.” (Haba. 3:17, 18) Kanshi mu mwaka wa 2015 onse, natuletontonkanya pa mapaalo ayo twakwata no kulakonka ifyo ilembo lya mwaka wa 2015 liletweba ukuti: “Tooteleni Yehova, pantu musuma.”—Amalu. 106:1.