Baafwe Ukubombela pa Bukombe
1 Umulimo wesu uwa kushimikila upeela abantu ishuko lya mu nshita ilya ‘kumfwa ifyebo fya kusesema kwa Ukusokolola.’ (Ukus. 1:3) Lelo nga bali no kupusunsuka “Ubucushi bukalamba,” bafwile na kabili ukubomba pali fyene. (Ukus. 7:14) Ubumi nabubimbwamo! E co shininkisha ukubwelelako kuli abo abalangishe ubuseko pa kubalilapo mu mipeelele imo iyo wabomfeshe uno mweshi.
2 Nga ca kuti walishiile icitabo ca “Akalume ka Ukusokolola,” kuti pambi watila:
◼ “Cawama ukumumona na kabili. Umuku walekelesheko lintu twalanshenye, twalandile pa lwa bumo ubwa masesemo aya mwi buuku lya Ukusokolola, kabili namushilile ulupapulo ululondolola bwene. Napamo mwalimwene ukuti nangula ca kuti ibuuku lya Baibolo ilya Ukusokolola lyaliba ilyashika nga nshi, kuti twalyumfwikisha pa kulanguluka ificitika fya ndakai no kubomfya icine ca Baibolo ica kutendekelako icafulilako. Kuti natemwa ukusendako amaminiti yanono ukwebekesha ifintu ifinono ifyo Baibolo itweba pa lwa nshita shesu.” Lyene alukila ku lupapulo lwalinga ulo wingabomfya ukutampa isambililo lya Baibolo.
3 Nga ca kuti washalike trakiti wa “Bushe Ici Calo Cikapusunsuka?” pa kutandala kwa kubalilapo, kuti wasosa icapale ci:
◼ “Ndi uwa nsansa pa kumusanga pa ŋanda na lelo. Lintu namutandalile mu nshiku sha nomba line, twalanshenye pa lwa fya kuponako ifipanga icishibilo icali no kucitika pa ntanshi fye ya kupwa kwa calo. [Pituluka mu mbali shalinga isha cishibilo pali Mateo 24:3-14.] Bushe namumonapo ica kuponako icili conse icacitika mu nshita sha nomba line mu calo nelyo mu bwikashi bwesu ico muletontonkanya ifyo pambi kuti caba kufikilishiwa kwa lubali lwa ico cishibilo?” Ukubomfya ifikope mu cipandwa 16 ica citabo ca Akalume ka Ukusokolola, landa pa kufikilishiwa kwa yamo aya aya masesemo ya Baibolo. Pa kusondwelela kwa kutandala, lumbula umutwe wa lyashi lya cintubwingi ilya uyo mulungu, kabili tambulula ubwite kuli wene ku kuilunda kuli iwe pa Ŋanda ya Bufumu.
4 Nga ca kuti walaalike mwine ŋanda ku Cibukisho, sosa ukuti:
◼ “Lintu namutandalile umuku wafumineko, twalandile pa lwa fintu imfwa ya kwa Yesu yacindama ku mutundu wa muntu. Na kabili namulaalike ukusangwa ku Cibukisho ca mfwa yakwe, ico Abena Kristu bakalasefya ukushinguluke calo pa March 26. Nabwela ilelo ku kumucinkulako ukuti namulaalikwa kuli cilya ica kucitika cakatama. [Londolole nshita ne cifulo ca kusefya.] Kuti pambi camwaafwa ukutesekesha ubucindami bwa aka kashita nga ca kuti twapituluka mu mapaalo yamo ayo tuipakisha nomba pamo nge ca kufumamo ca cintu Yesu acitiile umutundu wa muntu, pamo pene na mapaalo ayali no kwisa.” Lyene tukuta ukulanda pa fishinka fyalinga ukufuma muli bamagazini ba nomba line nelyo ukufuma mu cipandwa 41 ica citabo ca Akalume ka Ukusokolola. Na kabili kuti pambi waebekesha ifikope pa mabula 294, 299, na 308. Nga cingacitika, tantika ukwaafwa uulesekelela ukusangwa ku Cibukisho.
5 Nga ca kuti uyo muntu ali fye ni kakutika musuma, ici kuti pambi cabomba:
◼ “Naliipakishe nga nshi ukulanshanya kwesu ukwa nomba line pa lwa Baibolo. Nacibwela pantu kuti natemwa ukumumona muleipakisha cintu Lesa alaya kuli bonse abalefwaya ukusambilila ifyafulilako pa lwa wene.” Belenga Yohane 17:3, lyene losha kuli trakiti wa Ubumi mu Calo Cipya Ica Mutende.
6 Shi ukutemwa kobe ukwa bumi no kutesekesha kobe ukwa cilubula kukuseshe ku kucita ifipempu fya kubwelelamo pa balesekelela. Baafwe ukubombela pa bukombe bwa kucincimusha ubwa mu Ukusokolola. Ibukisha, “inshita ili mupepi”!—Ukus. 1:3.