‘Tubilisha Icebo’
1 Umwabela ubulondoloshi bwa Baibolo ubwa “nshiku sha kulekelesha,” abantu abengi ilelo bakwata fye “imimonekele ya bukapepa.” (2 Tim. 3:1, 5) Ici caba ni pa mulandu wa kuti intungulushi sha mipepele shalifilwa ukutungulula imikuni yabo lwa ku mupashi mu bufumacumi. Bashimapepo ba Kristendomu tabafwilisha Baibolo. Basoobolapo ukulongofyanya ifisambilisho fya fye ifya ba mano ya buntunse ne fya basambilila ifya mipepele nelyo ukukolobonda mu milandu ya mu bwikashi ne ya bupolitiki mu cifulo ca kushimikila Icebo ca kwa Lesa. Intungulushi sha mapepo ishingi tashasumina muli Baibolo. Shimona ukuti yalileka ukubomba, na muli ifyo mu bumankonso basumbula imfundo ya kusanguka mu cifulo ca cisambilisho ca Baibolo pa lwa kwa Kabumba Mukalamba. Bashimapepo abengi tababomfya fye ne shina lya kwa Lesa ilya pa lwakwe, kabili tabakaanya ukulifuuta ukufuma mu maBaibolo ya muno nshiku.
2 Nga fintu fye caali ku ntungulushi sha mipepele mu kasuba ka kwa Yesu, bashimapepo ba lelo baleshimikila muli bu ca fye. (Mat. 15:8, 9) Cili fye nga fintu kasesema Amose asobeele. Kwalibako “insala mu calo, te nsala ya cilyo kabili te cilaka ca menshi, lelo ica kuumfwe cebo ca kwa Yehova.” (Amose 8:11) Ukucila na pa cili conse, abantu balekabila ica kulya ca ku mupashi icaba mu Cebo ca kwa Lesa.
3 Ifya Kwikusha Ifyo Abantu Balekabila lwa ku Mupashi: Paulo akonkomeshe Timote ukukakatila ku ‘malembo ya mushilo ayaba na maka ya kulenga [umo] ukuba uwa mano ayalosha ku kupusuka,’ na muli ifyo mu kucincila amukambishe ‘ukubile cebo’ kuli bambi. (2 Tim. 3:14, 15; 4:2) Pamo nga Inte sha kwa Yehova, tufwile ukukakatila ku cintu Baibolo isambilisha lintu tuleshimikila, muli ifyo ukupashanya Ica kumwenako cesu, Yesu, uwatile: “Isambilisho lyandi te lyandi, lelo lya wantumine.” (Yoh. 7:16) Tubomfya Icebo ca kwa Lesa pamo nga ishinte mu kusambilisha kwesu .pantu twalishiba ifyo lyakwatamo amano ya bulesa, kabili tufwaya abantu ukwishiba intulo ya fyebo ifyo tulebasambilisha.—1 Kor. 2:4-7.
4 Ica kubalilapo abantu bafwile ukumfwa icine ukufuma muli Baibolo pa kuti bengasambilila pa lwa kwa Yehova no kutetekela wene. Paulo mu kubamo amano alembele ukuti: “Lelo bakatetekela shani uo bashaumfwile? Lelo bakomfwa shani, apabula kabila?” (Rom. 10:14) Pa kushimikila Icebo ca kwa Lesa, tulaafwa bambi ukunonka icitetekelo ukupitila mu kwishiba kwalungikwa. Ukwishiba kwa musango yo kuti kwayalula ubumi ukuba ubwawaminako kabili kulacita ifyo. Kalemba umuNgeleshi Charles Dickens alembele ukulosha kuli Baibolo ukuti: “Caba citabo cawamisha icabala nelyo icikabala acibako mu calo, pantu cisambilisha amasambililo yawamisha ayo icibumbwa ca buntunse icili conse icesha ukuba ica bucishinka kabili ica busumino cingatungulwilwako.”
5 Abo abakwata insala ya cine ca ku mupashi baleshiba ukuti citungililwa no bulashi bwa Cebo ca kwa Lesa. Ku numa mu 1913, Frederick W. Franz, pamo nga umusambi wa pa koleji uwacaice, alipeelwe akatabo akakwete umutwe waleti Where Are the Dead? Pa numa ya kubelenga icasuko ca mu Baibolo ica ici cipusho mu kuba no buseko bukalamba, atile: ‘Ici e cine.’ Amamilioni ya bafwaya icine baliyumfwa mu nshila imo ine. Natutwalilile ukushimikila Icebo mu mukoosha kabili mu kupimpa na muli ifyo ukuba aba buseko mu kumfwa bambi baletila: ‘Ici e cine.’