Ifya Kunashanasha Abantu
1 Umutumwa Paulo apangile ishina lya kuti aali mutumikishi uunashanasha. (Imil. 19:26) Nangu fye ni Mfumu Agrippa yamwebele ukuti: “Mu nshita inono ulenashanasho kubo mwina Kristu!” (Imil. 26:28) Cinshi calengele sana ukuti ubutumikishi bwa kwa Paulo bube ubwa kunashanasha abantu? Alebomfya amano pa kupelulushanya na bantu mu Malembo, alesala ifyebo ifyo abo alelandako baishiba.—Imil. 28:23.
2 Pa kupashanya Paulo, na ifwe bene tufwile ukunashanasha abantu mu butumikishi bwesu. Kuti twacita shani ico? Nga twaba no kushilimuka ilyo tulekutika no kulanda ku bantu. (Amapi. 16:23) Ifintu fitatu ifyacindama kuti fyatwafwa ukucite co.
3 Kutikisheni: Ilyo umuntu umbi alelanda, kutikisheni mumfwe ifyo aishiba ifyo na imwe mwingalandapo. Nga apindikapo cimo, esheni ukwiluka umo alosha. Kuti cawama mwaishiba bwino ico asuminamo, umulandu asuminina ifyo, ne calengele ukuti ashininkishe ukuti ico ca cine. (Amapi. 18:13) Mano mano, esheni ukulenga alondolole fyonse fi.
4 Ipusheni Ifipusho: Nga umuntu asumina mu cisambilisho ca Bulesa Butatu, nalimo kuti mwamwipusha ukuti: “Bushe mwasumina mu cisambilisho ca Bulesa Butatu lyonse?” Lyene mwipusheni na kabili ukuti: “Bushe mwalitala amufwailisha bwino bwino pa lwa co Baibolo isosa pali uyu mulandu?” Nalimo kuti mwaipusha no kuti: “Nga ca kuti Lesa alipendelwamo muli Bulesa Butatu, bushe Icebo cakwe, Baibolo, te kuti citwebe ulwa ico bwino bwino?” Ifyasuko fyakwe e fikalenga mukeshibe ifya kupelulushanya no muntu pa co Amalembo yalanda.
5 Pelulushanyeni Bwino: Nte umo aipwishe umwanakashi uwasumine ukuti Yesu e Lesa ati: “Nga mulefwaya ukunjeba ukuti abantu babili balilingana, kuti mwalangilila shani ico nga mwafwaya ukubomfya balupwa?” Atile: “Kuti nabomfya bamunyina babili.” Nte lyene atile: “Nakalimo kuti mwabomfya bampundu abapalana. Lelo ilyo Yesu aalefunda ukuti tufwile ukumona Lesa ukuti ni Wishi no kuti ena Mwana, cinshi Yesu aletusambilisha?” Umwanakashi alyumfwile icishinka ca kuti umo mukalamba kabili alicilapo amaka. (Mat. 20:23; Yoh. 14:28; 20:17) Kanshi kwali ukumufika pa mutima ukupitila mu kumunashanasha.
6 Kwena te bonse bapokelela icine, nangu tupelulushanye na bo shani no kulungika ukusosa. Kwati fye ni Paulo, natutulukushe ukusapika aba mitima yafumaluka mu cifulo cesu ica kubombelamo, ukubanashanasha ukuti bapokelele ubukombe bwa Bufumu.—Imil. 19:8.