Ulubali 2—Ifyo Tupaalwa nga Tuletasha pa fyo Yehova Atutemwa
1 Mu cipande calelanda pali ili lyashi uyu mweshi wapwile, twakomaile pa nshila shine umo twingatashisha Yehova mu butumikishi pa kutemwa kwakwe. (1 Yohane 4:9-11) Muli cino cipande twalalundako inshila na shimbi shisano isho twingacitilamo ici. Ilyo tulebombesha ukwafwa bambi lwa ku mupashi tulapaalwa.
2 Ubunte bwa mu Lyashi: Iyi ni nshila isuma iya kusangilamo abantu bakwete nsala ne cilaka ca bulungami no kubashiila impapulo sha kubafwa. Calicindama ‘ukubomfye nshita’ no kushimikila apali ponse kabili kuli onse uo twasanga. (Efes. 5:16) Pa kubomba muli iyi nshila tufwile ukushipa, lelo nga tulatasha pa kutemwa kwa kwa Lesa no kwishiba ifyo abantu bakabila, tuli no kushimikila ponse apo twaba ne shuko.—2 Tim. 1:7, 8.
3 Mishonari umo alipaalilwe sana lintu atendeke ukulanshanya no muyendo mubiye muli motoka. Umwaume alefwaisha ukwishibilapo na fimbi. Mishonari alimutandalile imiku iingi, kabili ne sambililo lya Baibolo lyalitendeke. Ulya mwaume alisambilile icine kabili alilundulwike ica kuti aba na eluda mu cilonganino!
4 Ukulemba Amakalata: Nalimo teti tuye ku ng’anda ne ng’anda pa mulandu wa kulwala. Kuti twalemba amakalata, ukushimikila mu kwipifya ku bantu abo twaishiba, abafwililwe abatemwikwa babo, nangu abashali pa ng’anda mu cifulo tushimikila. Kuti twaisalilamo trakti umo uwa pa nshita yalinga uukwete ubukombe bwa muli Baibolo kabili uukoselesha untu tuletumina ukulemba kalata nga nakwata ifipusho ifili fyonse. Bomfyeni akeyala kenu nelyo aka pa Ng’anda ya Bufumu; shi mwibomfya akeyala ka maofeshi ya Inte sha kwa Yehova.
5 Ukushimikila pa Lamya: Iyi ni nshila isuma iya kusangilamo abo tushingakumana na bo mu mulimo wa ku ng’anda ne ng’anda. Nga twaba abashilimuka, bacibusa, abacenjela, kabili abalamuka, kuti bayankulako bwino sana. Ubutumikishi Bwesu Ubwa Bufumu ubwa February 2001, pe bula 4, amaparagrafu 5 na 6 paba amapaalo yaba mu kubombesha kwa musango yo.
6 Ilyo nkashi aleshimikila pa lamya, aipwishe umwanakashi nga ca kutila alitontonkanyapo sana pa fyo ifintu fikaba ku ntanshi kuli ena na ku lupwa lwakwe. Umwanakashi ayaswike ati alitontonkanyapo. Amwebele ukuti pa mulandu wa kubula isubilo, talefwaya ukwikala na bantu pa ng’anda. Ilyo umwanakashi amwene ukuti nkashi nayangwako sana kuli ena, asumine ukukumana na o pa mushika wali lwa mupepi. Icacitike ca kuti umwanakashi asumine apo pene fye ukusambilila Baibolo!
7 Ukusengela Abeni: Nga twalitemwa abena mupalamano besu, tukaba abaibukila ukumona onse umweni uwaisa uko tulonganina no kumulenga omfwe ukuti nasekelelwa. (Rom. 15:7) Mulengeni amone ukuti ali pa kati ka bantu abo mu bufumacumi balefwaya ukuti abe bwino lwa ku mupashi. Ukumusakamana kwine kwine no kumweba ukusambilila na o Baibolo kuti fyamulenga ukusumina ubwafwilisho bwesu.
8 Imyendele Yesu Iisuma: Pa kuba ne myendele yesu isuma, tulapulamika icine. (Tito 2:10) Lintu aba ku calo balanda ifisuma pali ifwe fwe Nte sha kwa Yehova, bapeela umucinshi kuli Yehova. (1 Pet. 2:12) Imyendele isuma na yo kuti yalenga bambi ukutoola inshila ya kuya ku mweo.
9 Cinshi tushingabebetela ishi nshila shisano isho twingalangilamo ukutasha kwesu kuli Yehova pa kutemwa atutemwa no kushibomfya? (1 Yoh. 4:16) Nga mwacita ifyo, mukamwenamo nga nshi.