Tufwile Ukucindika Ubutungulushi bwa kwa Yehova

Cinshi mutontonkanyapo ilyo mwaumfwa amashina ya pa kale aya kuti Kora, Datani, na Abiramu? Bucipondoka! Ukupondokela cinshi? Ubutungulushi bwa kwa Lesa. Amalanda yabaponene yalilembwa mwi buuku lya Impendwa icipandwa 16, kabili ukusupulwa kwa ili lyashi kusangwa mu cipande ca mu Ulupungu lwa kwa Kalinda ulwa August 1, 2002, icitila “Nakileni Muli Bucishinka Ku Bantu Lesa Alaasa.” Mukanonkelamo sana nga mwabelenga ili lyashi no kutamba ifikope pali vidio wa mutwe wa kuti Respect Jehovah’s Authority nelyo nga mwakutika kuli tepu wa cilangililo citila Cindikeni Ubutungulushi bwa kwa Yehova. Mukamona ifikansa ifyaimine pali bamwana Kora aba busumino na wishi uwalelwisha Mulopwe wa kubumbwa konse. (Impe. 26:9-11) Ici cilangililo icilanda pa fyacitike cifwile ukucincisha ifwe bonse ukucishapo ukuba na bucishinka kuli Yehova.

Ilyo muletamba vidio nelyo ukukutika kuli tepu, pooseni amano ku fintu 6 ifilelangilila umo Kora na bacipondoka banankwe babulishe bucishinka: (1) Bushe basuulile shani ubutungulushi bwa bulesa? (2) Bushe balekele shani icilumba, ukufwaya ukulumbuka, na kalumwa ukubasonga? (3) Bushe bapoosele shani amano pa kukanapwililika kwa bantu Yehova asontele ukulabatungulula? (4) Mutima nshi uwa kuilishanya balundulwile? (5) Cinshi basuulile ishuko bapeelwe ilya kubomba umulimo waibela? (6) Bushe bacindamike shani bacibusa na balupwa ukucila ukuba na bucishinka kuli Lesa?

Tontonkanyeni pa fyo aya masambililo twasambilile muli ici cilangililo ca mu Baibolo yabomba ku fyo ifwe tumona ubutungulushi bwa bulesa pali leelo: (1) Bushe tulingile ukwankulako shani ku fyo baeluda mu cilonganino bapingula, kabili mulandu nshi? (2) Bushe kuti twapwisha shani amatontonkanyo yabipa ayo twaba na yo? (3) Bushe kuti twacita shani nga ca kuti abasontwa ukututungulula batena? (4) Kuti twacita shani nga ca kuti twatendeka ukuba no mutima wa kuilishanya? (5) Bushe tulingile ukumona shani umulimo untu twapeelwa? (6) Ni bani abo tushilingile ukuumfwila nga bapinkana na bucishinka bwesu kuli Lesa, kabili ni lilali ubwesho bwa musango yo bwingatukosela?

Pa numa ya kulanshanya ifi fyebo mu cilonganino, tambeni vidio na kabili nelyo kutikeni ku cilangililo ca pali tepu icitila Cindikeni Ubutungulushi bwa kwa Yehova. Shi lekeni imwafwe sana ukulaibukisha lyonse imilandu iyo tulingile ukulacindikila ubutungulushi bwa kwa Yehova!—Amalu. 18:25; 37:28.