Inshita ya Cibukisho—Inshita ya Kubombesha
1. Bushe “inshita ya mitebeto” yalengele abena Israele baletiina Lesa ukucita cinshi?
1 Kwali nshita yasalilwe mu mwaka iyo abena Israele balesefyamo ‘imitebeto ya kwa Yehova.’ (Lebi. 23:2) Ukutontonkanya pa busuma bwa kwa Lesa kwalengele abena Israele ukusekelela no kupimpa mu kupepa kwa cine.—2 Imila. 30:21–31:2.
2, 3. Mulandu nshi cibelele calinga ukubombesha mu mulimo kwa Lesa mu nshita ya Cibukisho, kabili ni lilali tukasefya Icibukisho?
2 Mu nshita ya Cibukisho cila mwaka, tulabombesha mu mulimo wa kwa Lesa uutuleetela insansa. E nshita tutontonkanya sana pa bupe bwacila ubupe bonse ubo Yehova atupeele, ukutupeela Umwana wakwe uwafyalwa eka. (Yoh. 3:16; 1 Pet. 1:18, 19) Ilyo twatontonkanya pa kutemwa kwa kwa Lesa no kwa Mwana wakwe, tulatasha Yehova no kubomba no mweo wesu onse mukucita ukufwaya kwakwe.—2 Kor. 5:14, 15.
3 Uno mwaka Umulalilo wa kwa Shikulu ukaba pali Cine, pa March 24, ilyo akasuba kawa. Kuti twabombesha shani mu mulimo wa kushimikila mu myeshi ya March, April, na May?
4, 5. (a) Cinshi cayafwa bamo ukulanda na bantu abengi imbila nsuma? (b) Cinshi imwe mwasanga ukuti cilabomba bwino mu cifulo mushimikila?
4 Ukulanda ku Bantu Abengi: Ilyo muli mu mulimo wa mwi bala, fwayeni inshila sha kulandilamo na bantu abengi. Bushe kuti mwabombako umulimo wa ku ng’anda ne ng’anda ilyo abantu abengi baba pa ng’anda, sana sana mu nshita ya kasuba na mu cungulo? Nga ca kutila bamo abo musangwa nabo pe sambililo lya citabo kuti batemwa ukubomba umulimo wa mwi bala ilyo tamulatendeka isambililo, kangalila we sambililo lya citabo akatantika pa kuti kukabe ukulanshanya ukwipi ilyo tamulaya mu mulimo wa mwi bala pa kuti mukabombele mu cifulo cabela apepi.
5 Inshila na imbi iya kulandilamo na bantu abengi, kuya ku fifulo fya cintubwingi. Ku Japan nkashi umo alefwaya ukubomba bupainiya bwa kwafwilisha nangu ca kutila alebombe ncito. Eluda umo amupandileko amano ya kuti cila bushiku ilyo talaya ku ncito aleshimikila ku bantu mu musebo mupepi na pa citesheni ce shitima. Pa numa ya kufumyapo umwenso no kukanasakamana ukusekwa ku balenina mwi shitima, asukile akwata abantu 40 abo lyonse aletwalila bamagazini ukubikapo nabo aleenda nabo mwi shitima, na ku balebomba pa citesheni ce shitima e lyo na ku bene ba matuuka ayali mupepi. Nga kupendela pali avareji, cila mweshi aleshalika bamagazini 235. Ukulanda fye na bantu ifyebo fya mu Baibolo pa nshita fye inono cila bushiku, kwalengele atendeka amasambililo 6.
6. Imisepela kuti yabombesha shani mu milimo wa kwa Lesa?
6 Inshita ya Kucitilamo Ubunte: Kulabe nshita ilyo bakasabankanya abengi abacili baleya ku sukulu besala amasukulu. Iyi kuti yaba e nshita isuma iya kubombako bupainiya bwakwafwilisha. Abena Kristu imisepela nabo kuti babombesha ilyo baleshimikila pa sukulu. Mukapapa ukumona ukuti abanenu pa sukulu kuti bafwaya ukwishiba ifyo mwasumina. Mulandu nshi te kuti mucitilo bunte ku bo musambilila nabo lilya mukwata ifya kulanshanya e lyo na lilya kuba ukulemba amalyashi? Abanenu bamo balicita ifyo ukubomfya bavidio besu. Bambi nabo balitendeka amasambililo ya Baibolo kubo basambilila nabo kabili balibaafwa ukufika ku kuipeela na ku lubatisho. Ishi ni nshila shimo ishisuma isha ‘kutashishamo ishina lya kwa Yehova.’—Amalu. 148:12, 13.
7. (a) Munyinefwe acitile shani pa kuti aleshimikila kuli bambi? (b) Bushe na imwe mwalicitapo icapala ici?
7 Mu fyo mucita cila bushiku, fwailisheni inshila iya kulanshanishishamo na bantu pali Lesa wesu uwawamisha na pa malayo yakwe ayasuma. Munyinefwe uwenda mwi shitima limo line cila bushiku alacitilo bunte kubo enda nabo mwi shitima nga amona ukuti nacilinga ukucite fyo. Icalecitika ni ci. Ilyo alelolela ukunina ishitima limbi pa citesheni cimo, cila bushiku aleshimikila umulumendo pa maminiti mupepi na yasano. Icafuminemo ca kutila, uyu mulumendo no munankwe babomba nankwe batendeke ukusambilila Baibolo. Munyinefwe alesambilisha aba bantu ilyo baleenda mwi shitima. Ilyo papitile nshita, umwanakashi umukoloci uwalekutika ku fyo balelanshanya aebele munyinefwe ukuti na o alefwaya ukusambilila Baibolo. Na o alatemwa ukusambilila Baibolo pa nshiku shilya shine anina ishitima. E fyo munyinefwe asambilisha abantu bapusanapusana 10 ilyo eenda mwi shitima.
8. Ni nshila nshi abakoloci nelyo abalwalilila bengabomfya pa kuti babombeshe mu mulimo wa kushimikila?
8 Kuti mwacita shani nga ca kutila te kuti mucite ifyo mulefwaya pa mulandu wa kuti na mukula nelyo mulelwalilila? Kuti kwaba inshila na shimbi isho mwingatashishamo Yehova. Bushe mwalyeshako ubunte bwa pa foni? Nga ta mwishibe ifya kucita, landeni kuli kangalila wenu uwe sambililo lya citabo. Kuti afwaya bakasabankanya abacita ubunte bwa pa foni ukubomba na imwe. Nga mulebombela pamo kuti mwasambilishanya kabili kuti mwaafwana ukubomba bwino umulimo.
9. Kuti twaafwa shani abasambi ukufikapo ukubombela pamo ne cilonganino mu mulimo wa ku cintubwingi?
9 Abapya nga basangwa ku Cibukisho nalimo kuti bakoseleshiwa ukulundako ukutasha kwabo kuli Yehova. Kuti mwaafwa abapya ukupwisha umwenso uo nalimo bakwata uwa kushimikilako bambi, pa kubebako amalyashi yakukoselesha aya mu mulimo wa mwi bala. Cimbi ico mwingacita kubasambilisha panono panono ukulondolola ifyo Baibolo isambilisha no kubasambilisha ifya kuisosela abene pa citetekelo cabo. (1 Pet. 3:15) Nga ca kutila umusambi alefwaya ukutendeka ukulanda kuli bambi imbila nsuma, ebeni kangalila wa kutangilila. Akeba abakulanda no musambi pa kuti bamone nga nafikapo ukubombela pamo ne cilonganino mu mulimo wa ku cintubwingi. Yehova alatemwa ukumona abapya baba ku lubali lwakwe muli ili lyashi lya bumulopwe bwa mu kubumbwa konse!—Amapi. 27:11.
10. (a) Ukupekanya bwino kuti kwatwafwa shani ukubomba bupainiya bwa kwafwilisha? (b) Bushe mwalibombeleko bupainiya bwa kwafwilisha uyu mwaka wapwile mu nshita ya Cibukisho? Mwacitile shani?
10 Bushe Kuti Mwabomba Bupainiya bwa Kwafwilisha? Ukufika pa maawala 50 aya bapainiya ba kwafwilisha kwalicindama sana. (Mat. 5:37) Pa kukafika pa maawala aya, avareji wa maawala mulekabila ukulabomba cila mulungu ni 12. Bushe ukutantika kuli pe bula 5 e kwingalinga inshita mukwata? Nga ca kutila te kuti mukonke ifyo balangilile pe bula 5, bushe kuti mwapekanya inshila imbi pa kuti mukabombeko bupainiya bwa kwafwilisha mu March, April, nelyo mu May? Pepeni kuli Yehova pa kuti akapaale ukubombesha kwenu ilyo mulebombela pa kulundako umulimo wenu uwa mwi bala.—Amapi. 16:3.
11. Baeluda na babomfi batumikila kuti baafwa shani abakalabomba bupainiya bwa kwafwilisha?
11 Baeluda na babomfi batumikila bakamukoselesha mukubombesha kwenu pa kuti na uno mwaka inshita ya Cibukisho ikabe ni nshita yacindama iya kutashishamo Yehova. Nalimo nabo bene bakabombako bupainiya bwa kwafwilisha. Baeluda bakapekanya inshita na imbi iya kukumana pa kuya mu mulimo wa mwi bala, inshita ya mu cungulo, na mu kati ka mulungu icungulo e lyo na pa mpela ya mulungu nga kwaba abalefwaya. Pa kwishiba ukwa kukumanina ne nshita ya kukumana e lyo na bakalatungulula pa kuya mu mulimo wa mwibala, baeluda kuti balanda nabapekanya kale ukubombako bupainiya nelyo na balepanga ukubombako. Baeluda bafwile ukutantika bwino pa kuti kukaleba bakasabankanya na bambi aba kubomba nabo pa nshiku ne nshita musalile iya kuya mu mulimo wa mwi bala. Baeluda nga bapekanya bwino, ifyo mulepanga ukucita fikapampamikwa kabili mukapwishishisha ifingi.—Amapi. 20:18.
12. Cinshi cilenga tuletasha Yehova inshita yonse?
12 Bombesheni: Nga ca kuti te kuti mubombe bupainiya bwa kwafwilisha, muleibukisha ukuti Yehova alatasha ukubombesha kwesu na malambo tupeela ‘ukulingana no mo tukwatile, te mo tushakwatila.’ (2 Kor. 8:12) Fingi twingatashishapo Yehova. Kwali ifyalengele Davidi ukulemba ati: “Nkacindika Yehova inshiku shonse, ukumutasha kukaba pe mu kanwa kandi.” (Amalu. 34:1) Shi na natukabombeshe mu nshita ya Cibukisho ukutasha Yehova.
[Akabokoshi pe bula 3]
Mukacita Shani pa Kuti Mukabombeshe?
◼ Ukushimikila ilyo abantu bali pa ng’anda
◼ Ukushimikila mu fifulo fya cintubwingi
◼ Ukushimikila pa ncito nelyo pa sukulu
◼ Ukushimikila pa foni
◼ Ukubombako bupainiya bwa kwafwilisha
[Charti pe bula 5]
Ifyo Mwingatantika pa Kubomba Bupainiya Bwa Kwafwilisha—Ifyo Mwingatantika pa kufisha amaawala 12 aya Mulimo wa mwi Bala Cila Mulungu
Ulucelo—Pali Cimo Ukufika pa Cibelushi
Nga mulefwaya ukutuusha ubushiku bumo pali ishi shine, limbi kuti mwabomba pa Mulungu.
Ubushiku Inshita Amaawala
Pali Cimo Ulucelo 2
Pali Cibili Ulucelo 2
Pali Citatu Ulucelo 2
Pali Cine Ulucelo 2
Pali Cisano Ulucelo 2
Pa Cibelushi Ulucelo 2
Amaawala Yonse Pamo: 12
Inshiku Shibili
Kuti mwasalapo inshiku shibili ishili shonse mu mulungu (Ukulingana ne nshiku mwasala, uku kutantika kuti kwalenga mwafika fye pa maawala 48 mu mweshi.)
Ubushiku Inshita Amaawala
Pali Citatu Ubushiku Bonse 6
Pa Cibelushi Ubushiku Bonse 6
Amaawala Yonse Pamo: 12
Ifyungulo Fibili na pa Mpela ya Mulungu
Mu kati ka mulungu kuti mwasalamo inshiku shibili mu cungulo.
Ubushiku Inshita Amaawala
Pali Cimo Icungulo 11⁄2
Pali Citatu Icungulo 11⁄2
Pa Cibelushi Ubushiku Bonse 6
Pa Mulungu Ukufika pa Kati ka Kasuba 3
Amaawala Yonse Pamo: 12
Ifyungulo Fitatu ne Cibelushi
Nga mulefwaya ukutuusha ubushiku bumo pali ishi shine, limbi kuti mwabomba pa Mulungu.
Ubushiku Inshita Amaawala
Pali Cimo Icungulo 2
Pali Citatu Icungulo 2
Pali Cisano Icungulo 2
Pa Cibelushi Ubushiku Bonse 6
Amaawala Yonse Pamo: 12
Ukutantika Kwandi Ukwa Mulimo wa Mwi Bala
Tantikeni amaawala mukalabomba cila bushiku.
Ubushiku Inshita Amaawala
Pali Cimo
Pali Cibili
Pali Citatu
Pali Cine
Pali Cisano
Pa Cibelushi
Pa Mulungu
Amaawala Yonse Pamo: 12